Ağcabədi, 9 may, Tahir Ağaməmmədov, AZƏRTAC

Azərbaycan tarixinin yetişdirdiyi ən parlaq simalardan biri, türk dünyasının və ümumən sivil dünyanın qüdrətli şəxsiyyətlərindən olan ulu öndər Heydər Əliyevin həyatı və siyasi fəaliyyəti çoxəsrlik dövlətçilik tariximizə qızıl hərflərlə yazılıb.

AZƏRTAC xəbər verir ki, bu fikir laçınlı məcburi köçkünlərin müvəqqəti məskunlaşdıqları Ağcabədi rayonu ərazisindəki Taxtakörpü qəsəbəsində ümummilli lider Heydər Əliyevin anadan olmasının 94-cü ildönümünə həsr olunan tədbirdə səsləndirilib. Laçın Rayon İcra Hakimiyyəti və Yeni Azərbaycan Partiyası rayon təşkilatının birgə keçirdiyi tədbirin iştirakçıları əvvəlcə dahi rəhbər Heydər Əliyevin Taxtakörpü qəsəbəsindəki büstü önünə gül dəstələri qoyaraq xatirəsini ehtiramla yad ediblər.

Laçın Rayon İcra Hakimiyyətinin başçısı Aqil Nəzərli çıxış edərək ulu öndər Heydər Əliyevin keçdiyi şərəfli həyat yolundan və çoxşaxəli fəaliyyətindən danışıb. O, məhz dahi şəxsiyyətin qətiyyəti, cəsarəti və uzaqgörənliyi nəticəsində Azərbaycanda ictimai-siyasi sabitliyə nail olunduğunu, dövlətçiliyimizin məhv olmaq təhlükəsindən xilas edildiyini, onun hakimiyyəti dövründə respublikamızın ictimai-siyasi, iqtisadi və mədəni tərəqqisində misilsiz nailiyyətlər qazanıldığını diqqətə çatdırıb.

Tədbirdə rayon icra hakimiyyəti başçısının birinci müavini Tofiq Mirzəyevin ulu öndər Heydər Əliyevin zəngin və şərəfli ömür yolundan bəhs edən məruzəsi dinlənilib. Məruzə və çıxışlarda ümummilli lider Heydər Əliyevin müasir Azərbaycanın formalaşmasında rolundan, dövlətimiz və xalqımız üçün gördüyü misilsiz xidmətlərdən bəhs edilib, dahi rəhbərin siyasətinin Prezidenti İlham Əliyev tərəfindən uğurla davam etdirildiyi bildirilib.

Sonra ulu öndər Heydər Əliyevin anadan olmasının 94-cü ildönümü münasibətilə məktəblilər arasında keçirilən inşa yazı müsabiqəsinin, futbol və voleybol yarışlarının qaliblərinə fəxri fərman və qiymətli hədiyyələr, Yeni Azərbaycan Partiyası sıralarına qəbul edilən bir qrup gəncə üzvlük vəsiqələri təqdim edilib.

İştirakçılar Ümummilli Liderin həyat və fəaliyyətindən bəhs edən videoçarxa baxıblar.