Qax, 3 avqust, Mustafa Dadaşov, AZƏRTAC

Son illər Qax rayonunda turizm infrastrukturunun yaradılması və genişləndirilməsi istiqamətində davamlı tədbirlər həyata keçirilir. Hazırda rayonda 12 turizm obyekti fəaliyyət göstərir. Bu turizm mərkəzlərində yerlərin ümumi sayı 700-dən artıqdır.

AZƏRTAC xəbər verir ki, əvvəlki illərdə olduğu kimi, builki yay istirahət mövsümündə də rayonun İlisu kəndində yerləşən “Uludağ” turizm və istirahət mərkəzinə üz tutanların sayı yetərincədir. Kəndin yuxarı hissəsində, uca dağlarla əhatə olunmuş səfalı guşədə yerləşən bu turizm mərkəzi əsasən ailəvi istirahət edənlər üçün nəzərdə tutulub. Burada istirahətçilər üçün hər cür şəraiti olan iki və dörd nəfərlik kottec tipli mənzillər fəaliyyət göstərir.

Turizm mərkəzinin icraçı direktoru Anar Zərbəliyev AZƏRTAC-a müsahibəsində bildirib ki, kompleks eyni vaxtda 150 nəfərədək turisti qəbul edə bilir. Cari mövsümdə qiymətlərə endirimlər də olunub. 4 nəfərlik kottecin bir günlük qiyməti əvvəlki illərdə 120 manat idisə, hazırda 100 manat təşkil edir. Yəni, səhər yeməyi də daxil olmaqla, 1 nəfərin bir günlük qalma xərci 25 manatdır. Tur-ekskursiya və ya qrup şəklində gələnlər üçün qiymətlər bir az da endirilir.

İcraçı direktorun sözlərinə görə, turistlər mərkəzin iki kiçik və bir böyük su hovuzundan, stolüstü oyunlar zalından, idman qurğularından, futbol, voleybol və basketbol meydançalarından pulsuz istifadə edirlər. Hər gün təşkil edilən diskotekaya giriş də pulsuzdur. Burada səyyar kitabxana da fəaliyyət göstərir.

Turistlərlə söhbətdən məlum oldu ki, onlar da “Uludağ”da yaradılan şəraitdən, qiymətlərdən razıdırlar. Sumqayıt şəhərindən gəlmiş Tərlan Nuriyev burada ailəsi ilə birlikdə istirahət edir. O qeyd edib ki, ilk dəfədir İlisu kəndinə gəlir. Bu yerlərin havasını, iqlimini, təbiətini çox bəyənib. Vaxt tapıb, kəndin ərazisində yerləşən “Sumuq qala”, “Ulu körpü”, qala bürcləri və digər qədim tarixi abidələrə də baş çəkib.

Səfər Mirzəyev isə respublikamızın cənub bölgəsindən, Masallıdan gəlib. O da Qaxda ailəsi ilə birlikdə dincəlir. İlisu kəndinin Azərbaycanın ən gözəl guşələrindən biri olduğunu bildirən Səfər kişi deyib: “Havaların indi hər yerdə həddindən artıq isti keçməsinə baxmayaraq, bura çox sərindir. İlisu kəndi istirahət üçün əsl məkandır”.