REGİONLAR
Ümumdünya Əhali Günü ilə əlaqədar Cəlilabadda konfrans keçirilib
Bakı, 7 iyul, AZƏRTAC
Azərbaycan Respublikası insan hüquqları üzrə müvəkkilinin (ombudsman) təşəbbüsü və BMT-nin Əhali Fondu (UNFPA) ilə əməkdaşlıq çərçivəsində Сəlilabad rayonunda 11 iyul – Ümumdünya Əhali Gününə həsr olunan konfrans keçirilib.
Ombudsman Elmira Süleymanova tədbirdə çıxış edərək hər il dünya ölkələrinin Ümumdünya Əhali Gününü qeyd etdiyini bildirib, bu günün əhəmiyyətini vurğulayıb. O, UNFPA-nın hələ 1989-cu ildə bu tarixi əhali günü kimi təsis etdiyini, hər il BMT baş katibinin bu təqvim günü ilə bağlı dünya ictimaiyyətinə müraciətlər ünvanladığını, cari ilin müraciətində prioritet məsələ kimi fövqəladə vəziyyətlərdə insan hüquqlarının qorunmasının və həssas təbəqələrdən olan insanların müdafiəsinin göstərildiyini və bu sahədə müvafiq tədbirlərin görülməsinin tövsiyə edildiyini bildirib.
Müvəkkil Qahirə konfransında qəbul edilmiş Əhali İnkişafı üzrə Fəaliyyət Proqramının prinsiplərinin ölkəmizdə həyata keçirilməsi sahəsində mühüm işlər görüldüyünü, MDB məkanında ilk dəfə olaraq 1999-cu ildə əhali sakinliyi və demoqrafiya sahəsində dövlət strategiyasını müəyyən edən Azərbaycan Respublikasının Demoqrafik İnkişaf Konsepsiyasının, 2004-cü ildə Azərbaycan Respublikasında demoqrafiya və əhali sakinliyinin inkişafı sahəsində Dövlət Proqramının təsdiq edildiyini və hazırda ölkə əhalisinin sayının 9 milyon 500 mindən artıq olduğunu bildirib.
E.Süleymanova ümummilli lider Heydər Əliyevin əsasını qoyduğu və bu gün Prezident İlham Əliyev tərəfindən uğurla həyata keçirilən davamlı iqtisadi, sosial və hüquqi islahatlar nəticəsində ölkəmizin bütün sahələrdə, o cümlədən iqtisadi və sosial sahədə uğurlar qazandığını, həmçinin Qahirə konfransının prinsiplərinin yerinə yetirildiyini, respublikamızın iqtisadi inkişaf tempinə görə MDB məkanında birinci və dünyada aparıcı yerlərdən birini tutduğunu qeyd edib. Həm də bu uğurların qısa müstəqillik dövründə və 25 ildən çox davam edən, ağır itkilərlə müşayiət olunan erməni təcavüzünə məruz qalan, ərazisinin 20 faizinin zəbt olunmuş, 20 mindən çox şəhid, minlərlə əsir və girovu, bir milyondan artıq qaçqın və məcburi köçkünü olan bir ölkədə baş verdiyini vurğulayıb.
Cəlilabad Rayon İcra Hakimiyyətinin başçısı Əziz Əzizov regionların sosial-iqtisadi inkişafı dövlət proqramlarının icrası nəticəsində başqa rayonlar kimi, Cəlilabad rayonunun da sosial-iqtisadi sahədə inkişaf etdiyini və burada belə regional konfransın keçirilməsinin müsbət hal olduğunu, bu tədbirin əhalinin fikir mübadiləsi apararaq bilik və bacarıqlarının artırılması baxımından çox mühüm əhəmiyyət daşıdığını deyib. O, rayonda insan hüquqlarının təmin olunması, o cümlədən qadın və uşaq məsələlərinə xüsusi diqqət yetirildiyini, hər bir sakinin müraciətinə həssaslıqla yanaşıldığını və Ombudsman təsisatı ilə səmərəli əməkdaşlıq əlaqələrinin qurulduğunu qeyd edib.
BMT-nin Əhali Fondunun Azərbaycan nümayəndəliyinin baş müşaviri Fərid Babayev hər il Ombudsman təsisatı ilə birlikdə əhali məsələləri üzrə tədbirlərin təşkil edildiyini, builki tədbirin regionda və ətraf rayonların iştirakı ilə keçirilməsinin əhali məsələlərinin təşviqi və təbliği baxımından mühüm əhəmiyyət daşıdığını bildirib. O, son dövrlərdə dünyada baş verən münaqişə və müharibə nəticəsində 60 milyon insanın məcburi yerdəyişməyə məruz qaldığını, o cümlədən Ermənistanın təcavüzü nəticəsində bir milyondan artıq soydaşımızın da bu problemdən əziyyət çəkdiyini və bu insanların hüquqlarının pozulduğunu vurğulayıb.
Milli Məclisin sosial siyasət komitəsinin sədri Hadi Rəcəbli ölkəmizdə BMT-nin qurumlarının fəaliyyəti, əhalinin sosial və sağlamlıq hüquqları ilə bağlı qanunvericilik aktları, demoqrafik təhlükəsizlik məsələləri haqqında məlumat verib. O, ölkəmizdə doğum hallarının çoxaldığını, ana və körpə ölümünün azaldığını bildirib. Həmçinin texnogen qəzalar zamanı insanların həlak olması, boşanma, selektiv abort kimi problemləri önə çəkərək bu məsələlərdə hamının həmrəylik göstərməsinin vacibliyini diqqətə çatdırıb.
Tədbirdə İqtisadiyyat və Sənaye Nazirliyinin İqtisadi İslahatlar Elmi-Tədqiqat İnstitutunun direktoru Vilayət Vəliyev “Minilliyin İnkişaf Məqsədləri: hədəflər və nəticələr”, Fövqəladə Hallar Nazirliyinin Mülki Müdafiə Qoşunlarında və Xilasetmə Qurumlarında İşin Təşkili İdarəsinin rəisi Fərhad Səmədov “Fövqəladə halların nəticələrinin aradan qaldırılması istiqamətində dövlət siyasəti”, Əmək və Əhalinin Sosial Müdafiəsi Nazirliyi yanında Dövlət Sosial Təminat Xidmətinin rəisi Çingiz Əliyev “Həssas təbəqələrdən olan insanların müdafiəsi üzrə dövlət proqramları”, Ekologiya və Təbii Sərvətlər Nazirliyinin Milli Hidrometeorologiya Departamentinin direktor müavini İmran Əbdülov “Ekoloji tarazlığın qorunması üzrə dövlət siyasəti” mövzularında məruzələrlə çıxış ediblər.
Fövqəladə Hallar və Ekologiya və Təbii Sərvətlər nazirlikləri tərəfindən hazırlanmış və bu qurumların fəaliyyətlərini əks etdirən filmlər nümayiş etdirilib. Eyni zamanda, Təhsil Nazirliyinin və Ailə, Qadın və Uşaq Problemləri üzrə Dövlət Komitəsinin məsul əməkdaşları çıxış edərək təmsil etdikləri qurumlar tərəfindən müvafiq sahələrdə görülən işlər haqqında məlumat veriblər.
Konfransda reproduktiv sağlamlıq strategiyasının inkişaf etdirilməsi, “Reproduktiv sağlamlıq” haqqında qanunun qəbul edilməsi, Ailə Planlaşdırılması mərkəzlərinin işinin səmərəliliyinin artırılması, reproduktiv sağlamlıq və ailə planlaşdırılması mövzusunda silsilə maarifləndirmə tədbirlərinin regionlarda, qaçqın və məcburi köçkün icmalarında davamlı olaraq keçirilməsi kimi təkliflər irəli sürülüb.
Müvəkkil tərəfindən hazırlanmış yeni nəşrlərdən olan “Ailə planlaşdırılmasında ictimai xidmətin təşkili üzrə vəsait” adlı kitab və “Sağlam və xoşbəxt olun!” adlı liflet iştirakçılara təqdim edilib və həmin nəşrlər hər bir rayon üzrə doğum şöbəsinin nümayəndələrinə paylanıb.