ELM VƏ TƏHSİL
Ümumi orta təhsil bazasında (9 illik) orta ixtisas təhsili müəssisələrinin boş qalan plan yerlərinə qəbul başlanır
Bakı, 3 avqust, AZƏRTAC
Tələbə Qəbulu üzrə Dövlət Komissiyası (TQDK) ümumi orta təhsil bazasında orta ixtisas təhsili müəssisələrinin boş qalan yerləri üzrə avqustun 4-dən 10-dək internet vasitəsilə ixtisas seçimi elan edir.
TQDK-dan AZƏRTAC-a bildiriblər ki, ixtisas seçimində ümumi balı 16-dan və hər bir fənn üzrə balı 8-dən az olmayan, orta ixtisas təhsili müəssisələrinə qəbul olunmayan və ya qəbul olunduğu təhsil müəssisəsində müəyyənləşdirilmiş vaxtda qeydiyyatdan keçməyən abituriyentlər buraxılırlar. İmtahan nəticələrinə görə orta ixtisas təhsili müəssisələrinə qəbul olunub qeydiyyatdan keçən abituriyentlərin boş qalan yerlərə keçirilən müsabiqədə iştirak hüququ yoxdur.
İxtisas seçmək hüququ olan abituriyent orta ixtisas təhsili müəssisələrinin dövlət hesabına və ödənişli əsaslarla olan 12-dək ixtisas kodunu seçib www.eservices.tqdk.gov.az/erizetex/ixtisas2 internet ünvanındakı “Abituriyentin elektron ixtisas seçimi ərizəsi”ni doldurmalı və təsdiqləməlidir.
İxtisas kodlarının ardıcıllığını abituriyent özü müəyyənləşdirir. Müsabiqə zamanı həmin ardıcıllıq hüquqi əsas kimi nəzərə alınır və abituriyent müsabiqədən keçdiyi ixtisasların birincisinə yerləşdirilir. Elektron ərizəsini təsdiqləməyən abituriyentlər müsabiqəyə buraxılmayacaqlar.
Xüsusi qabiliyyət tələb edən ixtisasları TQDK tərəfindən yaradılmış müvafiq Qeydiyyat Komissiyasında mayın 20-dən iyunun 2-dək qeydiyyatdan keçmiş abituriyentlər seçə bilərlər.
Xanəndəlik, vokal sənəti, dizayn, təsviri incəsənət müəllimliyi, zərgərlik məmulatları və bəzək əşyalarının hazırlanması, geyimlərin modelləşdirilməsi və konstruksiya edilməsi, dekorativ tətbiqi incəsənət və xalq sənəti, bədii yaradıcılıq işi ixtisaslarını iyulun 7-dən 11-dək keçirilmiş seçmə tur zamanı müvafiq yoxlamadan “məqbul” almış abituriyentlər seçə bilərlər.
Abituriyentlər xüsusi qabiliyyət tələb edən ixtisaslarla yanaşı, digər ixtisasları da seçə bilərlər.
Boş qalan ixtisasların siyahısı “Abituriyent” jurnalının xüsusi buraxılışında təqdim olunacaq.