Bakı, 4 may, Pərvanə İmanova, AZƏRTAC

Mayın 4-də Azərbaycan Milli Elmlər Akademiyası (AMEA) rəyasət heyətinin binasında ümummilli lider Heydər Əliyevin anadan olmasının 92-ci ildönümünə həsr edilən “Müstəqil Azərbaycan: Heydər Əliyevdən İlham Əliyevə” mövzusunda elmi konfrans keçirilib.

AZƏRTAC xəbər verir ki, konfransda AMEA-nın prezidenti, akademik Akif Əlizadə Ulu Öndərin ölkəmizə rəhbərlik etdiyi bütün dövrlərdə onun Azərbaycan elminin inkişafındakı misilsiz rolundan söz açıb. Bildirilib ki, bütün fəaliyyəti xalqa xidmət nümunəsi olan ümummilli lider Heydər Əliyev Azərbaycan elminin inkişafında böyük xidmətlər göstərib. Ulu Öndərin sovet hakimiyyəti illərində həyata keçirdiyi elm siyasətinin nəticəsi olaraq əldə edilən böyük nailiyyətlər həm o dövrdə, həm də sonrakı müstəqillik mərhələsində Azərbaycanın sosial-iqtisadi inkişafının əsas dayaqlarından olub.

Vurğulanıb ki, Ümummilli Lider elmə, alimlərə həmişə yüksək qiymət verib. Bu gün akademiyanın 70 illik tarixinə nəzər salarkən bu elm məbədinin xalqımızın taleyində necə mühüm rol oynadığının bir daha şahidi oluruq. Akademiyada Azərbaycan xalqının tarixinin, mədəniyyətinin, dilinin, milli mənəvi dəyərlərinin tədqiqi istiqamətindəki araşdırmaların aparılmasında da görkəmli dövlət xadimi Heydər Əliyevin uzaqgörən siyasəti mühüm rol oynayıb.

AMEA-nın rəhbəri bildirib ki, ümummilli lider Heydər Əliyevin 1993-cü ildə xalqın təkidli tələbi ilə yenidən hakimiyyətə qayıdışından sonra Azərbaycanda vətəndaş müharibəsinin qarşısı alınıb, respublikanın parçalanması təhlükəsi aradan qalxıb, ölkənin ictimai-siyasi, sosial-iqtisadi, elmi-mədəni həyatında, beynəlxalq əlaqələrində dönüş yaranıb, elmi əsaslara, beynəlxalq norma və prinsiplərə uyğun müstəqil dövlət quruculuğu prosesi başlanılıb.

Ulu Öndər ilə bağlı xatirələrini bölüşən akademik A.Əlizadə diqqətə çatdırıb ki, AMEA-nın inkişafının böyük bir mərhələsi bu dahi şəxsiyyətin adı ilə birbaşa bağlıdır. Ulu öndər Heydər Əliyevin ikinci dəfə hakimiyyətə qayıdışından sonra akademiyaya dövlət statusu verilib. Bu elm ocağı “Milli Elmlər Akademiyası” statusunu ümummilli lider Heydər Əliyevin 2001-ci il 15 may tarixli Fərmanı ilə qazanıb.

Konfransda AMEA-nın vitse-prezidenti, akademik İsa Həbibbəyli “Heydər Əliyev və Azərbaycan dövlətçiliyi” mövzusunda məruzəsində Ulu Öndərin Azərbaycan xalqı və dövləti qarşısındakı tarixi xidmətlərindən, zəngin və çoxşaxəli ictimai-siyasi fəaliyyətindən, respublikanın sosial-iqtisadi və mədəni quruculuq sahəsinin inkişafındakı misilsiz rolundan söz açıb. Bildirilib ki, Azərbaycan Respublikası bütün sahələrdə sürətli inkişafa məhz bu müdrik siyasi xadimin böyük səyləri sayəsində müvəffəq olub. Ümummilli lider Heydər Əliyevin dünya miqyasında qəbul edilən böyük şəxsiyyət olduğunu söyləyən akademik qeyd edib ki, Ulu Öndərin Azərbaycana rəhbərlik etdiyi bütün dövrlərdə çoxşaxəli fəaliyyəti xalqa xidmət nümunəsi olub. Görkəmli dövlət xadiminin Azərbaycan elminin, AMEA-nın tarixində və inkişafında böyük xidmətləri olub. Vurğulanıb ki, 1969–1982-ci illər Azərbaycan tarixində hərtərəfli, köklü yenilənmə dövrü, dinamiklik, işgüzarlıq kimi keyfiyyətlərin formalaşması dövrüdür. Ümummilli lider Heydər Əliyevin Azərbaycana birinci rəhbərliyi dövründə həyata keçirdiyi bütün bu əzəmətli quruculuq işlərinin böyük tarixi əhəmiyyəti vardır. Ulu Öndərin bu siyasəti onun ölkəmizə rəhbərlik etdiyi müstəqillik dövründə də uğurla davam etdirilib.

Vurğulanıb ki, bu gün ümummilli lider Heydər Əliyevin siyasi kursunun layiqli davamçısı Prezident İlham Əliyevin məqsədyönlü siyasəti nəticəsində dövlətimiz bütün istiqamətlərdə dünyanın dinamik inkişafda olan ölkələrindən birinə, tolerantlıq və multikulturalizmin beynəlxalq mərkəzinə çevrilib. Artıq Azərbaycan müxtəlif sahələrdə beynəlxalq səviyyəli mötəbər tədbirlərə və idman yarışlarına ev sahibliyi edir.

Akademik İ.Həbibbəyli ölkəmizin qabaqcıl ölkələrdən birinə çevrilməsinin, iqtisadi, siyasi, mədəni və mənəvi yüksəlişinin əsas istiqamətlərini diqqətə çatdırıb, “Əsrin müqaviləsi” adı ilə tarixə düşən ‎beynəlxalq neft layihəsinin Azərbaycanın dövlət müstəqilliyinin qorunub saxlanılmasında və ‎möhkəmləndirilməsində müstəsna əhəmiyyətini qeyd edib.

Sonra akademik Fəxrəddin Qədirovun “Heydər Əliyev və Azərbaycan nefti”, AMEA-nın müxbir üzvü Nərgiz Axundovanın “Azərbaycan tarixinin Heydər Əliyev dövrü” mövzularında məruzələri dinlənilib. Məruzələrdə Ümummilli Liderin neft strategiyasından, ölkəmizdə neft sənayesinin inkişafındakı tarixi xidmətlərindən, görkəmli ictimai-siyasi xadimin idarəçilik məharətindən və zəngin mənəvi keyfiyyətlərindən geniş bəhs edilib.