CƏMİYYƏT
Ümummilli lider Heydər Əliyevin anadan olmasının 93-cü ildönümü Tibb Universitetində qeyd olunub
Bakı, 6 may, AZƏRTAC
Mayın 6-da Azərbaycan Tibb Universitetində (ATU) ümummilli lider Heydər Əliyevin anadan olmasının 93-cü ildönümünə həsr olunmuş tədbir keçirilib.
AZƏRTAC xəbər verir ki, tədbir iştirakçıları əvvəlcə ulu öndərin ATU-nun 5 saylı tədris binasındakı büstü önünə əklil və gül dəstələri qoyub, onun nurlu xatirəsini dərin ehtiramla yad ediblər.
Sonra Tədris Terapevtik Klinikasında keçirilən tədbiri giriş sözü ilə açan universitetin rektoru, professor Gəray Gəraybəyli ulu öndər Heydər Əliyevin müasir müstəqil Azərbaycan dövlətinin qurulmasında, inkişafında əvəzsiz tarixi xidmətlərindən danışıb. O, ümummilli liderin həyat yoluna nəzər salaraq onun dövlət vəzifələrində çalışdığı müddətdə gördüyü işlər haqqında məlumat verərək deyib: “Ulu öndər səhiyyə sahəsinin inkişafı istiqamətində çox işlər görüb. Məhz onun dövründə tibb müəssisələri əsaslı təmir edilib, yeni səhiyyə ocaqları tikilib, onlar müasir tibb avadanlıqları və aparatlarla təmin edilib”.
“Azərbaycan digər ölkələrlə müqayisədə böyük ölkə deyil. Fikrimcə, bu, böyük bir xoşbəxtlikdir ki, Tanrı elə də böyük olmayan bir ölkəyə Heydər Əliyev kimi şəxsiyyət bağışlayıb. Heydər Əliyev Azərbaycanın ən ağır məqamlarında hakimiyyətə gəlib, ölkəmizi parçalanmaqdan, dünya xəritəsindən silinməkdən qoruyub. Təxminən 30 il bundan əvvəl mən xarici ölkəyə gedəndə, pasportuma baxırdılar, amma ölkəmi tanımırdılar. İndi isə Azərbaycan tanınır, özünə görə nüfuzu var və buna görə də biz ulu öndər Heydər Əliyevə borcluyuq", - deyə rektor bildirib.
Ümummilli lider Heydər Əliyevin hələ XX əsrin 70-80-ci illərində respublikaya rəhbərlik etdiyi dövrdə ATU üçün zəngin maddi-texniki baza yaradıldığı diqqətə çatdırılıb.
Nəsimi Rayon İcra Hakimiyyətinin başçısı Asif Əsgərov çıxışında bildirib ki, ümummilli lider Heydər Əliyev Azərbaycan üçün bir tapıntıdır. Çünki Heydər Əliyev işlədiyi bütün dövrlərdə yalnız millətinin gələcəyini düşünüb.
Akademik Böyükkişi Ağayev, ATU-nun kafedra müdirləri Qoşqar Əliyev və Məhbubə Vəliyeva, müalicə-profilaktika fakültəsinin 4-cü kurs tələbəsi Nailə Şirəliyeva çıxış edərək ulu öndər Heydər Əliyevin Azərbaycan xalqı qarşısında misilsiz xidmətlərindən danışıblar.