SİYASƏT
Qadınlar dövlətçiliyimizin və müstəqilliyimizin, bu günümüzün və gələcəyimizin dayağıdır
Bakı, 6 may, Xatirə Cəfərova, AZƏRTAC
Ailə, Qadın və Uşaq Problemləri üzrə Dövlət Komitəsi (AQUPDK) tərəfindən Azərbaycan xalqının ümummilli lideri Heydər Əliyevin xatirəsinə həsr olunmuş “Qadınlar dövlətimizin, dövlətçiliyimizin, müstəqilliyimizin, bu günümüzün, gələcəyimizin dayağıdır” mövzusunda keçirilən məqalə müsabiqəsinə yekun vurulub. Mayın 6-da müsabiqə qaliblərinin mükafatlandırılması mərasimi keçirilib.
AZƏRTAC xəbər verir ki, tədbir iştirakçıları əvvəlcə Fəxri xiyabana gələrək, müasir müstəqil Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad edib, məzarı önünə əklil qoyublar.
Görkəmli oftalmoloq alim, akademik Zərifə xanım Əliyevanın da xatirəsi yad olunub, məzarı üstünə gül dəstələri düzülüb.
AQUPDK-da keçirilən tədbirdə Dövlət Komitəsinin sədri Hicran Hüseynova müsabiqənin nəticələri barədə məlumat verib. O bildirib ki, müsabiqə ümummilli lider Heydər Əliyevin Azərbaycan qadını haqqında söylədiyi müdrik fikirlərin və verdiyi tövsiyələrin dövlət qadın siyasətinin inkişaf istiqamətlərinin proqramı kimi gənclər arasında təşviq edilməsi, istedadlı jurnalistlərin yaradıcılıq imkanlarının aşkara çıxarılması məqsədi ilə təşkil olunub.
“Gender, qadın və uşaq hüquqları, məişət zorakılığı kimi mövzular mediadan spesifik yanaşma və məsuliyyət tələb edir. Əfsuslar olsun ki, bəzən jurnalistlər bununla bağlı məlumatları və toxunduqları məsələləri tam araşdırmadan, subyektiv formada çatdırırlar. Bu isə əlbəttə ki, insanlara səhv inormasiya çatdırılmasına, bəzən isə hətta, bir sıra xoşagəlməz halların yaranmasına gətirib çıxarır. Ona görə də müsabiqədə istedadlı jurnalistlərin yaradıcılıq imkanlarının və bu sahəyə dair biliklərinin aşkar edilməsi də qarşıda duran vacib məsələlərdən biri olub ”, - deyə H.Hüseynova bildirib.
Qeyd olunub ki, ölkəmizdə aparılan ardıcıl və uğurlu siyasət qadınların vəziyyətinə və cəmiyyətdəki mövqeyinə də öz müsbət təsirini göstərir. Son zamanlar yerli özünüidarəetmə orqanlarında qadınların sayının artması, bütün şəhər və rayonlarda icra hakimiyyəti strukturlarında qadın müavinlərin təyin olunması buna əyani sübutdur. Digər vacib məsələlərdən biri də qadınların ictimai fəallığının artmasıdır. Əgər 1990-cı illərin əvvəlində bir neçə qadın təşkilatı var idisə, hazırda onların sayı 200-dən çoxdur.
Azərbaycan Respublikası Prezidenti Administrasiyasının ictimai-siyasi məsələlər şöbəsinin əməkdaşı Vüqar Səlimov qeyd edib ki, Ulu Öndər Azərbaycanda qadın hərəkatının inkişafına, onların ölkənin ictimai-siyasi həyatında fəal iştirak etməsinə hər zaman xüsusi önəm verirdi. Azərbaycan dövlət müstəqilliyini bərpa etdikdən sonra qadınların cəmiyyətdə rolunun artırılması, onların ictimai-siyasi proseslərdə daha yaxından iştirakının, gender bərabərliyinin təmin olunması, dövlət idarəçiliyində və seçkili orqanlarda təmsilçiliyinin artması ölkəmizdə uğurla həyata keçirilən dövlət qadın sıyasətinin bariz nümunəsidir. V.Səlimov qadınların ictimai-siyasi fəallığının artırılmasında qəbul olunmuş müvafiq sənədlərin əhəmiyyətini vurğulayıb.
Tədbirdə çıxış edən Milli Məclisin deputatı Gülçöhrə Məmmədova, “Yeni Azərbaycan” qəzetinin baş redaktoru Hikmət Babaoğlu, ”525-ci qəzet”in baş redaktoru Rəşad Məcid, əməkdar jurnalist Flora Xəlilzadə və başqaları ulu öndər Heydər Əliyevin qadın hüquqlarının müdafiəsi istiqamətində həyata keçirdiyi dövlət siyasətindən, bu sahədə qazanılan uğurlardan bəhs ediblər. Çıxış edənlər dövlətin gender siyasətini, bu sahədə qazanılan uğurları, problemləri işıqlandıran gənc jurnalistlərə yaradıcılıq uğurları arzulayıblar.
Sonda qaliblər mükafatlandırılıb. Müsabiqənin nəticələrinə əsasən, Ağcabədi rayonunda nəşr olunan “Aran” qəzetinin müxbiri Məhsəti Ağayeva birinci yerə layiq görülüb. “Kaspi” qəzetinin müxbiri Aygün Cəfərova və “Millixəbər.az” informasiya portalının baş redaktoru Zamin Zeynalov ikinci, “Hacıqabul” qəzetinin müxbiri Səadət Kərimova və “Bakupost.az” internet qəzetinin müxbiri Fərəh Əliyeva isə üçüncü yerə sahib olublar.