REGİONLAR
Ümumtəhsil müəssisələrinin şagirdləri arasında peyntbol üzrə birincilik keçirilib
Naxçıvan, 9 oktyabr, AZƏRTAC
Naxçıvan Muxtar Respublikası Gənclər və İdman Nazirliyi, Atıcılıq Federasiyasının birgə təşkilatçılığı ilə Naxçıvan şəhərində fəaliyyət göstərən ümumtəhsil müəssisələrinin şagirdləri arasında 18 oktyabr - Dövlət Müstəqilliyi Gününə həsr olunmuş peyntbol üzrə birincilik keçirilib.
AZƏRTAC xəbər verir ki, Naxçıvan Atıcılıq Mərkəzində keçirilən birincilikdə 19 komandanın tərkibində 120-yə yaxın şagird iştirak edib.
Yarışın açılış mərasimində çıxış edən Naxçıvan Muxtar Respublikası Gənclər və İdman Nazirliyinin kütləvi bədən tərbiyəsi və idman şöbəsinin müdiri Taleh İbrahimov Dövlət Müstəqilliyi Günü münasibətilə keçirilən birincilikdə iştirak edən idmançıları təbrik edib və ölkəmizin müstəqillik tarixi barədə danışıb. Muxtar respublikada idmana və idmançılara göstərilən diqqət və qayğıdan bəhs edən nazirliyin əməkdaşı, şagirdləri yarışın qaydaları haqqında məlumatlandırıb.
İki gün davam edən yarış olimpiya sistemi üzrə keçirilib. Yarımfinal mərhələsində 15 və 16 nömrəli tam orta məktəblərin komandalarını məğlub edən Heydər Əliyev adına Hərbi Lisey və 9 nömrəli tam orta məktəbin komandaları adlarını finala yazdırıblar. İlk olaraq peyntbol sahəsinə üçüncü yer uğrunda 15 və 16 nömrəli tam orta məktəbin komandaları daxil olub. Bu görüşdə 15 nömrəli tam orta məktəbin şagirdləri qələbə qazanaraq birinciliyi üçüncü pillədə başa vurublar.
Final görüşündə isə hərbi liseyin kursantları 9 nömrəli tam orta məktəbin şagirdlərini üstələyiblər.
Mükafatlandırma mərasimində çıxış edən Naxçıvan Muxtar Respublikasının gənclər və idman naziri Azad Cabbarov, Naxçıvan Muxtar Respublikası Atıcılıq Federasiyasının sədri Asəf Məmmədov və Naxçıvan şəhərində yerləşən Heydər Əliyev adına Hərbi Liseyin rəisi Elman Orucov muxtar respublikada idmanın inkişafı istiqamətində həyata keçirilən tədbirlərdən danışıb, qalibləri təbrik ediblər.
Qaliblərə diplom, medal, kubok və hədiyyələr verilib.