MƏDƏNİYYƏT
Ustad aşığın yubileyi qeyd olunub
Bakı, 28 aprel, Zərəngiz Mansurova, AZƏRTAC
Aprelin 28-də R.Behbudov adına Azərbaycan Dövlət Mahnı Teatrında tanınmış ustad aşıq, Prezident təqaüdçüsü Mahmud Məmmədovun anadan olmasının 80 illiyinə həsr olunmuş yubiley tədbiri keçirilib.
AZƏRTAC xəbər verir ki, Mədəniyyət və Turizm nazirliyi və Aşıqlar Birliyinin birgə təşkilatçılığı ilə keçirilən tədbirdə folklorşünas alimlər, ustadın sənət dostları və yetirmələri ilə yanaşı, İrandan gələn aşıqlar da çıxış ediblər.
Azərbaycan Aşıqlar Birliyinin sədri, xalq şairi Zəlimxan Yaqub ölkəmizdə sənətə və sənətkara göstərilən diqqət və qayğıdan, aşıq sənətinin inkişafı naminə həyata keçirilən məqsədyönlü işlərdən, həmçinin yubilyarın həyat və yaradıcılığından söz açıb.
Bildirib ki, Azərbaycan hökuməti aşıq sənətinə, aşıqların yaradıcılığına yüksək qiymət verir. Təsadüfi deyil ki, bu müqəddəs sənət Azərbaycanın birinci xanımı Mehriban Əliyevanın səyi nəticəsində UNESCO-nun Bəşəriyyətin Qeyri-Maddi Mədəni irsinin reprezentativ siyahısına daxil edilib. Bu olduqca təqdirəlayiq bir işdir. Bu, həm də sənətə və sənətkara verilən qiymətin bariz nümunəsidir.
Diqqətə çatdırılıb ki, Aşıq Mahmud Məmmədov 1935-ci il mayın 22-də sazın-sözün beşiyi olan Göyçə mahalının Ağbulaq kəndində dünyaya göz açıb. 1946-cı ildə ailəliklə Tovuz rayonunun Bozalqanlı kəndinə köçüblər. Aşıqlığın sirlərini, incəliklərini XX əsr Azərbaycan aşıq sənətinin görkəmli nümayəndələri- Aşıq Hüseyn Bozalqanlı və İmran Həsənovdan öyrənib, neçə-neçə böyük ustadlarla Azərbaycanda və bir sıra xarici ölkələrdə bu qədim sənəti layiqincə təmsil edib.
Sənətdə ilk uğurunu 1957-ci ildə Bakıda keçirilən folklor festivalında birinci dərəcəli diploma layiq görülməklə qazanıb. Sonralar isə ümumittifaq və beynəlxalq festivalların laureatı olub.
Aşığa yubileyi münasibətilə Azərbaycan Aşıqlar Birliyinin diplomu təqdim olunub.
Professor Qəzənfər Paşayev də aşığın bənzərsiz sənət dünyasından, zəngin yaradıcılıq axtarışlarından, Azərbaycan aşıq sənətinin inkişafı naminə gördüyü işlərdən söz açıb.
Vurğulanıb ki, Aşıq Mahmud həm də poetik yaradıcılıqla məşğul olur, 2007-ci ildə “Hörmət olan yerdə, məhəbbət olar”, 2011-ci ildə isə “Allah qəlbə görə verir” adlı şeirlər kitabları çap olunub.
Yubiley tədbirində qocaman aşığın şagirdləri onun şeirlərini ifa ediblər.
Sonda Aşıq Mahmud tədbirin təşkilatçılarına və iştirakçılarına minnətdarlığını bildirib.