SİYASƏT


Vaşinqtonda “Cənub Qaz Dəhlizi” layihəsi müzakirə edilib

A+ A

Vaşinqton, 22 sentyabr, AZƏRTAC 

Vaşinqtonda “Atlantika Şurası” analitik mərkəzi tərəfindən “Cənub Qaz Dəhlizi” layihəsi qrafik üzrə gedirmi?” mövzusunda “dəyirmi masa” təşkil edilib. Tədbirdə Avropanın enerji təhlükəsizliyinin təmini məsələləri və “Cənub Qaz Dəhlizi” layihəsinin detalları müzakirə olunub.

“Atlantika Şurası” Qlobal Energetika Mərkəzinin direktoru Riçard Morninqstarın moderatorluğu ilə keçirilən tədbirdə bp şirkətinin “Cənub Qaz Dəhlizi” layihəsinin vitse-prezidenti Con Merfi, “Atlantika Şurası” yanında Dinu Patrişiu adına Avrasiya Mərkəzinin ştatdankənar əməkdaşı Aqniya Qriqas və ABŞ Dövlət Departamentinin Avrasiyanın enerji məsələləri üzrə xüsusi nümayəndəsinin və beynəlxalq energetika əlaqələri üzrə koordinatorunun sabiq böyük müşaviri Daniel Stayn çıxış ediblər.

C.Merfi “dəyirmi masa” iştirakçılarına “Cənub” Qaz Dəhlizinin tərkib hissəsi olan dörd meqa-layihə və bu istiqamətdə iş qrafiki haqqında ətraflı məlumat verib. Qeyd edilib ki, Transadriatik qaz kəməri üzrə işlər Albaniyada və Yunanıstanda cari ilin avqust ayında start götürüb, İtaliyada isə işlər noyabr ayında başlanacaq. İlkin mərhələlərdə Qərbə 16 milyard kubmetr qaz nəql etmək (Avropaya 10 milyard, Türkiyəyə 6 milyard) planlaşdırılır. Perspektivdə isə boru kəmərinin buraxılış qabiliyyəti 32 milyard kubmetr təşkil edəcək ki, bu da gələcəkdə “Cənub” Qaz Dəhlizinə digər potensial boru kəmərlərinin qoşulmasına imkan verəcək.

A.Qriqas və D.Stayn Cənubi Qafqazda və Orta Asiyada layihələrin tarixindən və geosiyasi vəziyyətdən, habelə Cənub-Şərqi Avropada boru kəmərləri şəbəkəsinin inkişafından danışıblar. Həmçinin Aralıq dənizinin şərq hissəsində qaz yataqları layihəsi və bu potensial mənbələrin “Cənub” Qaz Dəhlizinə qoşulması müzakirə edilib.

Məruzəçilər Avropanın enerji təhlükəsizliyinin təmin olunmasında “Cənub” Qaz Dəhlizinin strateji rolunu vurğulayıblar.

Yusif Babanlı

AZƏRTAC-ın xüsusi müxbiri

Vaşinqton

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.