Vaşinqton, 29 yanvar, AZƏRTAC 

ABŞ-ın ən nüfuzlu analitik mərkəzlərindən biri olan Vudro Vilson Mərkəzinin Kennan İnstitutu və Enerji, Təbii Ehtiyatlar və Geosiyasət Mərkəzi yanvarın 28-də “Ukraynadan sonra Cənubi Qafqaz üçün təhlükəsizlik və enerji sahəsində doğan nəticələr” mövzusunda geniş birgə tədbir keçiriblər. Azərbaycanın bəhs edilən hər iki sahədə oynadığı mühüm rol və malik olduğu geosiyasi əhəmiyyət çıxışçıların gəldikləri ümumi qənaətlər arasında yer alıb.

ABŞ enerji nazirinin beynəlxalq məsələlər üzrə köməkçisi vəzifələrini icra edən Conatan Elkaynd (Jonathan Elkind) Azərbaycan qazını Avropa bazarına daşıyacaq “Cənub” qaz dəhlizinin qlobal enerji bazarında çox əhəmiyyətli rola malik olduğunu bəyan edib. O, həmçinin Azərbaycandan start götürən enerji layihələrini Avropanın enerji təhlükəsizliyinin onurğa sütunu kimi səciyyələndirib.

Massaçusets Amherst Universitetinin professoru və hazırda Vaşinqtonda Vudro Vilson Mərkəzində ziyarətçi tədqiqatçı olan Odri Olstadt (Audrey Altstadt) Azərbaycanın üzləşdiyi təhdidlər arasında Ermənistanın ötən 20 ildən çox müddət ərzində Dağlıq Qarabağ regionunu və ətraf əraziləri işğal altında saxlamasının dayandığını xüsusi vurğulayıb.

Amerika İşgüzarlıq İnstitutunun tədqiqatçısı Maykl Rubin (Michael Rubin) müstəqil enerji siyasətinin Azərbaycan üçün həyati önəm daşıdığını qeyd edərək, son dövrlərdə ABŞ-ın Azərbaycana münasibətdə apardığı diplomatiyanın “qısa müddətli yanaşmalar” üzərində qurulduğunu tənqid edib və ABŞ-Azərbaycan münasibətlərinin müxtəlif kiçik miqyaslı problemlərdən qat-qat vacib olduğunu söyləyib.

Bundan əlavə, Enerji, Təbii Ehtiyatlar və Geosiyasət Mərkəzinin direktoru Ariel Kohen (Ariel Cohen) enerji istehsalçısı və potensial tranzit ölkə olan Azərbaycanın strateji mövqeyindən, bp şirkətinin Vaşinqton ofisinin beynəlxalq işlər üzrə direktoru Qreq Saunders (Greg Saunders) isə Xəzər qazını Avropa bazarına çatdıracaq “Cənub” qaz dəhlizinin gerçəkləşdirilməsi istiqamətində uğurla start verilmiş işlərdən bəhs ediblər.

Yusif Babanlı

AZƏRTAC-ın xüsusi müxbiri

Vaşinqton