İQTİSADİYYAT


Vergi nəzarəti tədbirləri zamanı qanunsuz sahibkarlıq faktları aşkarlanıb

Bakı, 2 avqust, AZƏRTAC 

Bakı şəhərində keçirilmiş vergi nəzarəti tədbirləri zamanı vergi orqanlarında qeydiyyata durmadan qanunsuz sahibkarlıqla məşğul olma faktları aşkarlanıb.

Bu barədə AZƏRTAC-a Vergilər Nazirliyinin Media və Kommunikasiya Mərkəzindən bildirilib. Məlumata əsasən, vergi orqanları tərəfindən iyulun 24-də Bakı şəhəri Nizami rayonu, Keşlə ŞTQ, Köndələn eninə 4-cü küçə, ev 1 ünvanında yerləşən ümumi sahəsi 2000 kvadratmetr olan mebel sexində vergi nəzarəti tədbirləri keçirilib.

Nəzarət tədbirləri zamanı həmin obyektdə Türkiyə Respublikasının vətəndaşı Uğur Safi Mustafa tərəfindən vergi orqanında uçota durmadan mebel istehsalı fəaliyyəti ilə məşğul olunduğu və Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən fiziki şəxslərin müxtəlif işlərin yerinə yetirilməsinə cəlb edildiyi aşkar edilib.

U.Safi izahatında bu fəaliyyətlə vergi orqanında uçota durmadan məşğul olduğunu, eləcə də 16 nəfər fiziki şəxsi əmək müqaviləsi bağlamadan müxtəlif işlərə cəlb etdiyini bildirsə də, götürülmüş sənədlərə əsasən müəyyən olunub ki, həmin obyektdə təkcə istehsalla əlaqədar işlərə 31 nəfər əmək müqaviləsiz işçi cəlb edilib. Obyektdə olan işçilər nəzarət tədbirini həyata keçirən vergi orqanı əməkdaşlarına izahat verməkdən boyun qaçıraraq obyekti tərk etsələr də, sonradan vergi orqanlarının uçot-baza məlumatlarına əsasən həmin işçilərin şəxsiyyətləri müəyyən olunub.

İyul ayının 25-də həmin ərazidə keçirilmiş növbəti vergi nəzarəti tədbiri zamanı Uğur Safiyə məxsus olan vergi orqanında uçotda qoyulmamış daha 2 mebel istehsalı sexi (sahələri müvafiq olaraq 1000 kvadratmetr və 900 kvadratmetr olmaqla), sahəsi 60 kvadratmetr olan mebel aksesuarları anbarı, sahəsi 180 kvadratmetr olan köhnə mebellerin saxlanıldığı anbar, 2 hazır məhsul saxlama anbarı (sahələri müvafiq olaraq 700 kvadratmer və 600 kvadratmetr olmaqla) və 3 otaqlı ofis müəyyən edilib.

Qeyd olunan obyektlərdən 2 ədəd kompüter və xeyli sayda qara mühasibatlıq sənədləri qanunvericilikdə nəzərdə tutulmuş qaydada götürülərək müvafiq aktla rəsmiləşdirilib. Sözügedən obyektlərdə keçirilən vergi nəzarəti tədbirləri zamanı ümumilikdə 701,0 min manat dəyərində (270,0 min manat dəyərində avadanlıq, 240,0 min manat dəyərində hazır mebel məhsulları, 191,0 min manat dəyərində isə xammal materialları) uçotdan gizlədildiyi müəyyən edilib, sənədsiz mallar aşkar edilərək müvafiq qaydada rəsmiləşdirilib.

Aparılmış araşdırmalar zamanı, Uğur Safinin digər bir Türkiyə Respublikasının vətəndaşı Zengin Hakanla ticarət əlaqələri təhlil edilib və U.Safinin sözügedən mebel sexində istehsal olunan mebelləri heç bir sənəd təqdim etmədən, satış dövriyyəsini uçotdan gizlədərək Z.Hakana təqdim etdiyi müəyyən edilib. Sonuncu isə öz növbəsində, Bakı şəhəri Nizami rayonu, Babək prospekti, ev 41a ünvanında yerləşən ona məxsus “VİVA-RİVA” adlı mebel mağazasında həmin malların satışını həyata keçirib.

İyul ayının 28-də Zengin Hakana məxsus “VİVA-RİVA” adlı mebel mağazasında keçirilən vergi nəzarəti tədbiri zamanı Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən işlərin (xidmətləri) yerinə yetirildiyi, habelə 90 min manat dəyərində uçotdan gizlədildiyi müəyyən edilib, sənədsiz mallar aşkar edilərək müvafiq qaydada rəsmiləşdirilib.

Aparılan araşdırmalar zamanı müəyyən olunub ki, Uğur Safi qanunsuz olaraq fəaliyyət göstərdiyi mebel sexini "Azinşaat Servis" Açıq Səhmdar Cəmiyyətindən müvafiq icarə müqaviləsinə əsasən icarəyə götürüb. Obyektin faktiki sahəsi 5000 kvadratmetrdən çox olmasına baxmayaraq, icarə müqaviləsində 1000 kvadratmet, aylıq icarə haqqının faktiki məbləği isə 4500 manat olmağına baxmayaraq, müqavilədə 1400 manat kimi rəsmiləşdirilib.

Sözügedən ünvanda icarəyə verilmiş obyektlərdə aparılan vergi nəzarəti tədbirləri zamanı “Azinşaat Servis" ASC tərəfindən bir sıra vergiödəyicilərinin həmin obyektlərdə qanunsuz sahibkarlıqla məşğul olması faktları da aşkar edilib. Belə ki, Qurbanov Saleh Vəzir oğlunun ayaqqabı istehsalı sexində, Vəliyev Rəşad Tahir oğlunun dəmir profil istehsalı sexində, Heydərov Vüsal Şahin oğlunun taxta qapıların boyadılması sexində vergi orqanında uçota durmadan qanunsuz sahibkarlıq fəaliyyəti ilə məşğul olduqları, habelə İbrahimov Kamran İbrahim oğlunun taxta qapıların istehsalı sexini, Dəmirov Sübhan Kamran oğlunun döşək istehsalı sexini, Tağıyev Əli Teyyub oğlunun isə istehsal sexini vergi orqanında uçota qoymadan sahibkarlıq fəaliyyəti göstərdikləri aşkar edilərək həmin şəxslər barəsində qanuna müvafiq tədbirlər görülüb.

Qeyd olunanlarla əlaqədar, Uğur Safi Mustafanın, eləcə də Zengin Hakan və "Azinşaat Servis" Açıq Səhmdar Cəmiyyətinin fəaliyyətlərinin qanunvericiliyin tələblərinə uyğunluğunun yoxlanılması məqsədilə adları hallanan sahibkarlıq subyektlərində səyyar vergi yoxlaması həyata keçirilir, yoxlamanın nəticəsinə dair aşkar olunan cinayət əməlləri üzrə qanunvericiliklə müəyyən edilmiş qaydada əməliyyat-istintaq tədbirləri aparılacaq.

Vergilər Nazirliyi vergi əməliyyatlarında şəffaflığın təmin edilməsi, o cümlədən, vergi orqanında uçota durmadan qanunsuz sahibkarlıq fəaliyyəti ilə məşğul olan şəxslərin, mallarını və pul vəsaitlərini uçotdan gizlədən, habelə dövriyyələrini gizlədərək vergidən yayınan şəxslərin aşkar edilməsi məqsədilə vergi nəzarəti tədbirlərini davam etdirir və bir daha xəbərdarlıq edir ki, qanun pozuntularına yol verilməsi və vergidən yayınma hallarının qarşısı gələcəkdə də qətiyyətlə alınacaq, intizamsız vergiödəyicilərinə qarşı qanunvericilikdə nəzərdə tutulan tədbirlər görüləcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.