CƏMİYYƏT
Veteranlarımızın keçdiyi şərəfli döyüş yolu və qəhrəmanlıq tarixi bütün gənclər üçün nümunədir
Bakı, 9 oktyabr, AZƏRTAC
Oktyabrın 9-da Müharibə Veteranları və Beynəlmiləlçi Hərbçilər İctimai Birliyinin Azərbaycan Respublikası Prezidenti yanında Gənclər Fondu ilə birgə icra etdiyi VIII qrant müsabiqəsinin qalibi Nuranə Nəcəfovanın “Qarabağ müharibəsində hərbi hissələrimizin qəhrəmanlıqlarının torpaqlarımızın azad edilməsində rolunun gənclər arasında təbliği” adlı layihəsinin təqdimatına həsr olunmuş tədbir keçirilib.
Azərbaycan Respublikası Müharibə, Əmək və Silahlı Qüvvələr Veteranları Təşkilatında keçirilən tədbir, eyni zamanda, Milli Ordumuzun ilk təməl daşı olan 18110 saylı hərbi hissənin bazasında yaradılmış 701 saylı hərbi hissənin 25 illik yubileyinə həsr olunub.
Tədbirdə İctimai Birliyinin üzvləri, hərbi hissənin keçmiş döyüşçüləri, veteranlar, gənclər təşkilatlarının nümayəndələri, məktəblilər iştirak ediblər.
Əvvəlcə Azərbaycan xalqının ümummilli lideri Heydər Əliyevin, Vətənimizin azadlığı və ərazi bütövlüyü uğrunda canlarından keçmiş şəhidlərimizin xatirəsi bir dəqiqəlik sükutla yad edilib.
Mərasimdə çıxış edən Respublika Veteranlar Təşkilatının sədr müavini, ehtiyatda olan polkovnik Cəlil Xəlilov deyib ki, Qarabağ müharibəsində qəhrəmanlıq göstərmiş şəxslərin tanıdılmasında, gənclərimizə örnək göstərilməsində təbliğata və müxtəlif tədbirlərin keçirilməsinə ehtiyac var. Gənclər Fondu, Respublika Veteranlar Təşkilatı, həm də Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası bu layihəyə dəstək göstərir. Gənclərimiz Böyük Vətən müharibəsində və Qarabağ müharibəsində igidliklər göstərmiş insanların şərəfli həyat və xidmət yolunu öyrənməlidirlər. Bu, gənclərimizin tarixlə bağlı yaddaşını möhkəmləndirəcək, onların mənəvi-psixoloji vəziyyətinə və hərbi hazırlığına diqqəti artıracaq. Bu məqsədlə veteranlar təşkilatları da gənclərlə bağlı bir sıra tədbirlər keçirir.
Müsabiqənin qalibi Nuranə Nəcəfova “Qarabağ müharibəsində hərbi hissələrimizin qəhrəmanlıqlarının torpaqlarımızın azad edilməsində rolunun gənclər arasında təbliği” mövzusunda geniş məruzə ilə çıxış edib. Bildirib ki, layihə Azərbaycan Milli Ordusunun çağdaş hərb tarixinin bir sıra mühüm məqamlarına işıq salmaq baxımından əhəmiyyətlidir. O deyib ki, layihənin icrası gənclərimiz arasında vətənpərvərlik ruhunun yüksəlməsinə səbəb olacaq.
Sonra Silahlı Qüvvələrimizin hərbi hissələrinin döyüş yoluna həsr olunmuş “Mühasirə” adlı tarixi-xroniki qısametrajlı sənədli film göstərilib, gənclərin müharibə və qəhrəmanlıq mövzularında çəkdikləri rəsm əsərləri nümayiş olunub.
İctimai Birliyin sədri, 701 saylı hərbi hissənin sabiq komandiri, ehtiyatda olan polkovnik Əzizağa Qənizadə hərbi hissənin yaranma tarixi, keçdiyi şanlı döyüş yolu haqqında ətraflı məlumat verib. Bildirilib ki, o zaman Kəlbəcər uğrunda gedən gərgin döyüşlərdə Milli Ordumuzun əsgər və zabitləri böyük əzmkarlıqla vuruşaraq, özlərindən dəfələrlə üstün olan düşmən qüvvələri qarşısında mətanətlə dayanıblar. Hərbi hissənin adı Şərqin ilk demokratik respublikası olan Azərbaycanın 701 gün fəaliyyət göstərməsinin şərəfinə adlandırılıb. 1993-cü ildə döyüşlər zamanı Silahlı Qüvvələrimiz Kəlbəcər rayonunun 60 minlik mülki əhalisini soyqırımından xilas edib. Briqadanın şəxsi heyəti müxtəlif fəxri adlar və mükafatlarla təltif olunub. Hazırda həmin briqadanın döyüş əməliyyatları Müdafiə Nazirliyinin tədris müəssisələrində dərindən öyrənilir və onlar əsasında metodiki vəsaitlər çap olunur.
Əzizağa Qənizadə briqadanın yaradılması günü münasibətilə veteranları təbrik edib. Veteranlarımızın qəhrəmanlıqlarının gənclər arasında təbliğinin onların milli-mənəvi tərbiyəsində mühüm əhəmiyyət daşıdığını diqqətə çatdırıb, layihənin əhəmiyyətindən danışıb.
Tədbirdə Qarabağ müharibəsində böyük fədakarlıq göstərmiş, torpaqlarımızın düşmənlərdən azad olunması yolunda əzmlə vuruşmuş 701 saylı hərbi hissənin veteranları öz şanlı tarixləri, keçdikləri döyüş yolları barədə fikirlərini və xatirələrini gənclərə bölüşüblər.
Digər çıxış edənlər tədbirin hərb sənətinə və Orduya marağın artması baxımından önəmindən bəhs ediblər. 701 saylı hərbi hissənin keçdiyi döyüş yolunun və qəhrəmanlıq tarixinin bütün gənclər üçün nümunə olduğu vurğulanıb. Aprelin əvvəllərində qəhrəmancasına şəhid olan əsgərlərimizin rəşadətindən söz açılıb. Qeyd edilib ki, aprel döyüşlərində Azərbaycan Ordusu gücünü bir daha nümayiş etdirdi. Bu gün Ordumuzda xidmət edən gənclərimiz Vətən uğrunda döyüşməyə hazırdırlar.
Diqqətə çatdırıb ki, bu gün veteranlarımız Prezident İlham Əliyevin hərtərəfli diqqət və qayğısı ilə tam əhatə olunublar.
Sonda bir qrup veterana və Azərbaycan Hərb Tarixi Muzeyinin əməkdaşı Nuranə Nəcəfovaya general Əlağa Şıxlinskinin 150 illik yubileyi ilə bağlı Respublika Veteranları Təşkilatının Rəyasət Heyətinin təsis etdiyi medallar təqdim edilib.