Vladimir Putin parlamentə müraciətində Rusiyanın yeni nüvə silahlarından danışıb
Bakı, 1 mart, AZƏRTAC
Rusiya Prezidenti Vladimir Putinin Federal Məclisə müraciətinin təxminən yarısı ölkənin müdafiə potensialı və beynəlxalq təhlükəsizlik məsələlərinə həsr olunub.
AZƏRTAC Rusiya KİV-lərinə istinadla xəbər verir ki, Vladimir Putin çıxışında Rusiyanın yeni nüvə silahlarından danışıb, ABŞ-ın “nüvə silahı ilə bağlı təhqiqat sənədində” yer alan ifadədən narahat olduğunu bildirib.
Rusiyanın yalnız müdafiə məqsədli nüvə silahlarını inkişaf etdirdiyini deyən Putin ölkəsinə və ya müttəfiqlərinə nüvə hücumu zamanı dərhal cavab veriləcəyini vurğulayıb. Onun sözlərinə görə, Rusiya indi nüvə başlığı daşıya bilən sualtı pilotsuz üzən aparata malikdir. Təyyarədaşıyan gəmiləri və sahil mühafizə obyektlərini məhv etməyə qadir olan yüksək sürətli aparat qitələrarası məsafəni qət edə və radarlardan yayına bilir.
Rusiya Prezidenti, həmçinin heç bir ölkədə analoqu olmayan raketlərin istehsalından da danışıb. “Ötən ilin payızında hava hücumundan müdafiə vasitələri tərəfindən qarşısı alınmayan və dünyanın bütün nöqtələrini vura bilən raketlərin sınağını keçirdik”, - deyə Putin bildirib.
Qeyd edək ki, proqram sənədinin oxunması 1 saat 55 dəqiqə çəkib və bununla da rekorda imza atılıb.
Bölmənin digər xəbərləri
