Hanoy, 27 fevral (AZƏRTAC). Azərbaycan Respublikasının Vyetnam Sosialist Respublikasındakı səfirliyi paytaxt Hanoyda Xocalı soyqırımının 22-ci ildönümü ilə əlaqədar “Azərbaycan: təhlükələr və çağırışlar” mövzusunda tədbir keçirmişdir.

Tədbirdə Vyetnam parlamentinin, digər dövlət və hökumət qurumlarının üzvləri, o cümlədən Xarici İşlər Nazirliyinin rəsmiləri, Vyetnam Kommunist Partiyasının yüksək rütbəli şəxsləri, diplomatlar, yerli ictimaiyyətin nümayəndələri, Azərbaycanın ali təhsil ocaqlarının vyetnamlı məzunları, QHT-lərin və nüfuzlu KİV-lərin təmsilçiləri iştirak etmişlər.

Azərbaycanın Vyetnamdakı səfiri Anar İmanov Ermənistan-Azərbaycan, Dağlıq Qarabağ münaqişəsindən bəhs edərək, onun tarixi, qonşu dövlətin yürütdüyü təcavüzkar və etnik təmizləmə siyasətinin tərkib hissəsi olaraq, 1988-ci ildə Ermənistan ərazisində yaşayan soydaşlarımızın zorla öz ata-baba yurdlarından didərgin salınması ilə başlanan münaqişə nəticəsində Azərbaycanın Dağlıq Qarabağ bölgəsi və ona bitişik 7 rayonun işğalı, təcavüzün ağır nəticələri, bir milyondan artıq azərbaycanlının qaçqın və məcburi köçkünə çevrilməsi barədə məlumat vermişdir.

Münaqişə zamanı Ermənistan silahlı qüvvələrinin azərbaycanlılara qarşı törətdiyi vəhşiliklərdən danışan səfir 1992-ci ilin fevralında Xocalıda törədilmiş soyqırımı, soydaşlarımızın xüsusi qəddarlıq və amansızlıqla qətlə yetirilməsi, əsir götürülən insanların dəhşətli işgəncə, zülm və təhqirlərə məruz qalması barədə söhbət açmışdır. Azərbaycanlılara qarşı etnik təmizləmə siyasətinin artıq Ermənistanın dövlət siyasətinə çevrildiyini diqqətə çatdıran diplomat Xocalı soyqırımına rəvac verən, təşkil edən və törədən şəxslərin indiyədək məsuliyyətə cəlb olunmadıqlarını böyük təəssüf hissi ilə bildirmiş, beynəlxalq ictimaiyyətin bu istiqamətdə daha prinsipial mövqedən çıxış etməsinin vacibliyini vurğulamışdır.

Ermənistan-Azərbaycan, Dağlıq Qarabağ münaqişəsinin hüquqi aspektləri və həlli yollarına toxunan səfir A.İmanov demişdir ki, indiyədək BMT Təhlükəsizlik Şurasının, ATƏT, AŞPA, İslam Əməkdaşlıq Təşkilatı, Qoşulmama Hərəkatı kimi nüfuzlu beynəlxalq qurumların Ermənistanın hərbi birləşmələrinin işğal olunmuş Azərbaycan ərazilərindən dərhal və qeyd-şərtsiz çıxarılması, Azərbaycanın ərazi bütövlüyü, suverenliyi və sərhədlərinin toxunulmazlığını tələb edən müxtəlif qətnamə və qərarlarına baxmayaraq, Ermənistan beynəlxalq birliyin çağırışlarına məhəl qoymur. O, iri dövlətlərin və beynəlxalq birliyin qəti siyasi iradə nümayiş etdirməməsini və mövcud ikili standartları buna səbəb olan əsas amil kimi göstərmişdir.

Diplomat soyqırımı, hərbi və insanlığa qarşı cinayətlərin qarşısının alınmasının bütün dövlətlərin marağında olduğunu vurğulayaraq, beynəlxalq təşkilatların nüfuzunun qorunması baxımından qəbul edilmiş qətnamə və qərarların yerinə yetirilməsinin vacibliyini bildirmişdir. Ermənistan-Azərbaycan, Dağlıq Qarabağ münaqişəsinin yalnız iki həlli yolu olduğunu bildirən səfir A.İmanov bunun ya beynəlxalq birliyin səyləri ilə və yaxud da Azərbaycanın öz səylərini səfərbər etməklə Ermənistanı işğala son qoymağa məcbur etməkdən ibarət olduğunu söyləmiş, hər iki yolun beynəlxalq hüquqa, ilk növbədə isə BMT Nizamnaməsinə tam uyğunluğunu qeyd etmişdir.

Sonra A.İmanov qonaqların suallarını cavablandırmışdır.

Tədbirdə çıxış edən Vyetnam parlamentinin üzvləri, bir sıra ölkələrin səfirləri və jurnalistlər Azərbaycan xalqına Xocalı soyqırımı ilə bağlı başsağlığı vermiş, mövzu ətrafında fikirlərini bölüşmüşlər.

Tədbirdə Xocalı soyqırımına dair film və fotosərgi nümayiş olunmuşdur.

Tədbir çərçivəsində səfirliyin Vyetnam dilində nəşr etdirdiyi “Erməni terrorizmi” kitabının təqdimatı da keçirilmişdir.

Ermənistan-Azərbaycan, Dağlıq Qarabağ münaqişəsinə dair materiallar, Azərbaycan Respublikasının Xarici İşlər Nazirliyinin “Diplomatiya aləmi” jurnalının Xocalı soyqırımına həsr olunmuş xüsusi buraxılışı və Vyetnam dilində nəşr edilmiş “Erməni terrorizmi” kitabı tədbir iştirakçılarına paylanmışdır.

Şahin Cəfərov

AZƏRTAC-ın xüsusi müxbiri

Hanoy