Bakı, 21 sentyabr, AZƏRTAC

Hər bir istehlakçı satışdan xalça, kovrolin, kilim, linoleum və sair döşəmə örtüklərini alarkən onların keyfiyyəti ilə bağlı bəzi məqamları aydınlaşdırmalıdır. Bu baxımdan xalça və kovrolin alarkən bilməli olduğumuz zəruri məlumatları qeyd etmək yerinə düşər.

İqtisadiyyat Nazirliyinin Antiinhisar Siyasəti və İstehlakçıların Hüquqlarının Müdafiəsi Dövlət Xidmətindən AZƏRTAC-a bildiriblər ki, xalça və ya kovrolin aldıqda istehlakçı onların hansı otaqda istifadə edilməsini, interyerin xüsusiyyətlərini, otaqda gediş-gəlişin intensivliyini, ekolojı tələbləri və s. mütləq nəzərə almalıdır. Bu malları seçərkən model, forma və keyfiyyət baxımından diqqətli olmaq vacibdir. İstehlakçı qərarında yanılmamaq üçün onları hansı otağa görə seçdiyini əvvəlcədən müəyyən etməlidir. Bundan başqa, xalça alarkən birinci növbədə, onu diqqətlə yoxlayın, sapların keyfiyyətinə, ilmələrin sıxlığına, rəng çalarlarına fikir verin. Xalçanın hansı növ xovlu (qalın tüklü və yumşaq) və yaxud xovsuz (nazik və şumal) olmasına, hansı sapdan hazırlanmasına, qalınlığına və sıxlığına diqqət yetirin. İlmələrin sıxlığı onların yüksək keyfiyyətli olmasına dəlalət edir.

Kovrolinlər isə istehsal üsuluna, lifin materialına, xovun tipinə görə bir-birindən fərqlənir. İstehsal üsuluna görə kovrolin toxunulmuş və toxunulmamış olur. Kovrolinin hazırlanmasında müxtəlif materiallardan, əsasən yun, polipropilen, poliamiddən istifadə edilir.

Yun lifli kovrolinlər yumşaqlığını, elastikliyini, rəngini və strukturunu uzun illər qoruyub saxlayır, ekoloji göstəriciləri yüksəkdir, yanğına davamlıdır. Yundan olan kovrolinlər daha keyfiyyətli, gözəl və cəlbedici olurlar. Lakin onların satış qiymətləri kifayət qədər baha olur.

Məişətdə poliamid və polipropilen kimi sintetik liflərdən hazırlanmış xalça örtüklərdən də geniş istifadə olunur. Poliamid davamlılığına görə ən yüksək sintetik materialdır. Ondan hazırlanmış xalça örtükləri hərəkətin daha çox olduğu dəhlizlərdə, zallarda və başqa yerlərdə istifadə olunur. Bəzi hallarda yun lifli kovrolinlərin davamlılığını və istifadə müddətini uzatmaq üçün onlara poliamid və polipropilen əlavə edilə bilər. Polipropilenin davamlılığı poliamiddən aşağı olsa da çirklənməyə daha davamlı olur.

Kovrolinin də digər döşəmə örtükləri kimi bir sıra üstünlükləri və çatışmaz cəhətləri var. Kovrolinin otağa rahatlıq və hərarət verməsi, səs keçirməməsi onun üstün cəhətlərindəndir. Plintus vasitəsi ilə bərkidilmiş kovrolin döşəmənin üstündə sürüşmür və onu istənilən növ döşəmə üzərində (beton, parket, lamınat və s.) istifadə etmək olar. Çatışmayan cəhətləri sırasında isə yüksək dərəcədə toz yığmasını, allergiyası olanlara mənfi təsir göstərə bilməsini qeyd etmək olar.

Hazırda satışda müxtəlif qiymət və keyfiyyətdə xalça və kovrolin tapmaq mümkündür. Amma bu malların uzunmüddətli istifadə üçün alındığını nəzərə alaraq keyfiyyətli olanını seçmək tövsiyə olunur. Mal alarkən zəmanətlə satılan xalça örtüklərinə üstünlük verin. Eyni zamanda, bu məhsulları alarkən satıcıdan qəbz, kassa çeki almağı unutmayın. Bu, sizi satışdan sonra yarana biləcək çətinliklərdən sığortalayacaq, malda qüsur ortaya çıxdığı zaman istehlakçı hüquqlarınızın qorunmasına imkan verəcək.

Məlumat almaq hüququnuzdan istifadə edin və bu məhsullarla bağlı satıcıdan bilmək istədiklərinizi soruşun. Satıcı tərəfindən istehlakçıya malın adı, istehlak xüsusiyyətləri, istifadə qaydaları, istehsalçı, malın standartları və hansı tələblərə cavab verməsi haqqında dolğun məlumat verilməlidir. Bu məlumatda, həmçinin istehlakçıya malın zəmanət müddəti, etibarlılıq və istifadə müddəti haqqında məlumat əksini tapmalıdır. Xalça alarkən satıcıdan sertifikat tələb edin.

Xalçaların saxlanılmasına da diqqət edilməlidir. Xalça saxlanan yerlər təmiz, quru və işıqlı, havanın nisbi rütubəti isə ən çox 60-65 faiz olmalıdır. Məişət şəraitində xalçanı yayda yığışdırmaq üçün onu bükmək lazımdır. Heç bir halda xalçanı dördqat qatlamayın. Əks halda xalçanın xovu əzilər və bürüşər. Xalçanı uzun müddət üçün bükərkən güvəyə qarşı vasitələrdən istifadə etmək lazımdır. Xalçaların vaxtında təmizlənməsi onun istifadə müddətini artırır.

Bir daha bildiririk ki, hər bir istehlakçı bu məhsulları alarkən qeyd olunanları nəzərə almalı və hüquqlarının müdafiəsində aktiv olmalıdır. Əgər bu məhsulların satışı zamanı hər hansı qanun pozuntularına rast gəlsəniz, dərhal aidiyyəti üzrə Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə müraciət edin.