SİYASƏT
Xarkovda keçirilən tədbirdə Xocalı soyqırımını törədənlərin beynəlxalq tribunala verilməsi tələb olunub
Bakı, 24 fevral, AZƏRTAC
Xarkov şəhərində Xocalı soyqırımının 25-ci ildönümünə həsr olunan tədbir keçirilib. Azərbaycanın Ukraynadakı səfirliyinin mətbuat xidmətindən AZƏRTAC-a bildiriblər ki, Azərbaycanın Xarkov şəhərindəki fəxri konsulluğunun təşəbbüsü ilə keçirilən tədbirdə Xarkov Vilayət Administrasiyasının nümayəndələri, səfirliyin diplomatları, nüfuzlu ali təhsil ocaqlarının rektorları, elm və mədəniyyət xadimləri, diaspor və kütləvi informasiya vasitələri nümayəndələri iştirak ediblər.
Azərbaycanın Xarkov şəhərindəki fəxri konsulu Əfqan Salmanov çıxışında bildirib ki, Xocalı soyqırımına hüquqi-siyasi qiymət verməyən ölkələr tarix qarşısında bu cinayəti törədənlər qədər məsuliyyət daşıyacaq. O, son illər Heydər Əliyev Fondunun vitse-prezidenti Leyla Əliyevanın rəhbərliyi ilə “Xocalıya ədalət!” kampaniyası çərçivəsində həyata keçirilən tədbirlərin erməni vəhşiliyinin dünya ictimaiyyətinə çatdırılmasında müstəsna rol oynadığını vurğulayıb.
Sonra tədbir iştirakçıları Heydər Əliyev Fondu tərəfindən hazırlanmış “Qarabağ həqiqətləri” filminə baxıb, ermənilərin Xocalıda törətdikləri misli görünməmiş vəhşiliklərlə tanış olublar. Xocalı faciəsini qəddarlıq baxımından insanlığa yönəlik faşizm nümunəsi adlandıran Xarkov Milli Daxili İşlər Universitetinin rektoru Valeri Sokurenko, Azərbaycanın Ukraynadakı səfirliyinin müşaviri Elman Bağırov, Xarkov şəhərindəki Dostluq Cəmiyyətinin sədri Murad Ömərov, Ukrayna Dövlət Nəqliyyat və Dəmiryolu Universitetinin rektoru Sergey Pançenko, Albaniyanın Xarkov şəhərindəki fəxri konsulu Şahin Ömərov və digər şəxslər belə bir ağır cinayəti törədənlərin beynəlxalq tribunal qarşısında cavab vermələrinin vacibliyini vurğulayıblar.
Anım mərasimində tədqiqatçı-jurnalist Elşad Eyvazlının Ukrayna dilinə tərcümə edilmiş “Böyüməyən uşaqlar” kitabı tədbir iştirakçılarına təqdim olunub. Xocalıda hər iki valideynini itirmiş uşaqların acı xatirələrindən bəhs edən kitab erməni vəhşiliyinin dünya ictimaiyyətinə çatdırılmasında dəyərli əyani vəsait kimi qiymətləndirilib. Qeyd olunub ki, Xarkovdakı Azərbaycan Ukrayna Dostluq Cəmiyyətinin sədri Murad Ömərovun təşəbbüsü ilə Ukrayna dilinə tərcümə olunan kitab 1992-ci il fevralın 25-dən 26-na keçən gecə Xocalıda hər iki valideynini itirmiş 25 uşağın ürəkdağlayan xatirələrindən bəhs edir.