Ağcabədi, 24 fevral, Tahir Ağaməmmədov, AZƏRTAC

1992-ci il fevralın 25-dən 26-na keçən gecə erməni silahlı qüvvələri keçmiş SSRİ-nin 366-cı motoatıcı alayının köməyi ilə Azərbaycanın qədim yaşayış məskəni olan Xocalıda bəşər tarixinin ən qanlı cinayətlərindən birini törədiblər. 25 il əvvəl baş verən Xocalı qətliamı hər bir azərbaycanlının yaddaşında silinməz izlər buraxıb.

AZƏRTAC xəbər verir ki, bu fikirlər Yeni Azərbaycan Partiyası (YAP) Ağcabədi rayon təşkilatında Xocalı soyqırımının 25-ci ildönümü ilə bağlı keçirilən tədbirdə səslənib.

Tədbir iştirakçıları əvvəlcə Xocalı faciəsi qurbanlarının, həmçinin Azərbaycanın müstəqilliyi və ərazi bütövlüyü uğrunda şəhid olan soydaşlarımızın xatirəsini bir dəqiqəlik sükutla yad ediblər.

YAP Ağcabədi rayon təşkilatının sədr müavini Nazim Bünyatov, təşkilatın Qadınlar Şurasının sədri Radə Qafarova, Qarabağ Müharibəsi Əlilləri, Veteranları və Şəhid Ailələri İctimai Birliyinin sədri İsmayıl Məhərrəmov, N saylı hərbi hissənin əsgəri Bəhruz Qədirli və başqaları çıxış edərək, ermənilər tərəfindən Azərbaycan xalqına qarşı yüz illər boyu həyata keçirilən soyqırımı və deportasiya siyasətindən danışıblar. Bildirilib ki, mərhələ-mərhələ həyata keçirilən bu siyasət nəticəsində azərbaycanlılar tarixi-etnik torpaqlarından didərgin salınaraq, kütləvi şəkildə qətl və qırğınlara məruz qalıb, xalqımıza məxsus minlərlə tarixi-mədəni abidə və yaşayış məskəni dağıdılaraq viran edilib.

Diqqətə çatdırılıb ki, 1992-ci il fevralın 25-dən 26-na keçən gecə Xocalıda 613 nəfər, o cümlədən 106 qadın, 63 uşaq, 70 qoca xüsusi amansızlıqla qətlə yetirilib. 8 ailə tamamilə məhv edilib, 25 uşaq hər iki valideynini, 130 uşaq isə valideynlərdən birini itirib, 487 nəfər, o cümlədən 76 uşaq ağır yaralanıb, 1275 nəfər girov götürülüb, 197 nəfər itkin düşüb.

Tədbirdə Azərbaycan Yazıçılar Birliyinin üzvləri Məhsəti Musa və Tahirə İsaqızı Xocalıya həsr etdikləri şeirlər söyləyiblər. Sonra Heydər Əliyev Mərkəzində fəaliyyət göstərən “Həvəskar aktyorluq və bədii qiraət” kursunun üzvlərinin və Ağcabədi şəhər 5 nömrəli uşaq bağçasının fidanlarının ifasında ədəbi-bədii kompozisiya göstərilib.

Tədbir Xocalı soyqırımından bəhs edən sənədli filmin nümayişi ilə başa çatıb.