QAN YADDAŞI
Xocalı soyqırımı insanlığa qarşı törədilmiş ən dəhşətli faciələrlə bir sırada durur
Bakı, 24 fevral, AZƏRTAC
Fevralın 24-də Daxili İşlər Nazirliyində Xocalı faciəsi zamanı şəhid olmuş polis əməkdaşlarının ailə üzvlərinin iştirakı ilə anım mərasimi keçirilib.
Daxili İşlər Nazirliyinin mətbuat xidmətindən AZƏRTAC-a bildiriblər ki, əvvəlcə soyqırımı qurbanlarının, eləcə də Azərbaycanın ərazi bütövlüyü və suverenliyi uğrunda canlarından keçən soydaşlarımızın əziz xatirəsi bir dəqiqəlik sükutla yad edilib.
Tədbiri giriş sözü ilə açan daxili işlər nazirinin müavini, polis general-leytenantı Oruc Zalov öz tarixinin müxtəlif mərhələlərində erməni millətçiləri tərəfindən soyqırımlarına məruz qalan Azərbaycan xalqının növbəti belə faciə ilə 25 il əvvəl Xocalıda üzləşdiyini diqqətə çatdırıb.
Nazir müavini vurğulayıb ki, dinc əhalimizə qarşı törədilən soyqırımına yalnız xalqın təkidli tələbi ilə hakimiyyətə qayıdan ulu öndər Heydər Əliyevin prinsipial mövqeyi sayəsində obyektiv hüquqi-siyasi qiymət verilib. Milli Məclisin 1994-cü il 24 fevral tarixli qərarı ilə 26 fevral “Xocalı Soyqırımı Günü” elan olunub. Ümummilli lider Heydər Əliyev 1997-ci il fevralın 25-də “Xocalı soyqırımı qurbanlarının xatirəsinə sükut dəqiqəsi elan edilməsi haqqında” Sərəncam imzalayıb.
Diqqətə çatdırılıb ki, Xocalının müdafiəsi zamanı düşmənlə qeyri-bərabər döyüşlərdə 17 polis əməkdaşı qəhrəmancasına həlak olub. Xocalı soyqırımının insanlığa qarşı törədilmiş ən dəhşətli faciələrlə bir sırada durduğunu, eyni zamanda, bəşər sivilizasiyasına, insan haqlarına qarşı törədilmiş qatı cinayət olduğunu deyən polis general-leytenantı Oruc Zalov qeyd edib ki, illər keçməsinə baxmayaraq, qətliam qurbanlarının əziz xatirəsi anılır, dünya ictimaiyyəti Xocalı faciəsini yad edərək Azərbaycan ilə həmrəy olduğunu bildirir, erməni millətçilərinin törətdikləri bədnam əməlləri pisləyir.
Prezident İlham Əliyevin tapşırığı ilə bu faciənin bütün dünyada tanınması istiqamətində görülən işləri, Heydər Əliyev Fondunun dəstəyi ilə Azərbaycan həqiqətlərinin dünyanın hər yerində yayılmasını, beynəlxalq aləmin məlumatlandırılmasını, torpaqlarımızın işğal faktı və Xocalı soyqırımı ilə bağlı xaricdə yaşayan həmvətənlərimizin həmrəyliyini diqqətə çatdıran nazir müavini vurğulayıb ki, yalan və saxtakarlıq üzərində qurulmuş erməni təbliğatının iç üzü artıq ifşa olunub və dünya ictimaiyyəti Xocalı qətliamını soyqırımı kimi qəbul edir.
Oruc Zalov bu gün Azərbaycanın bölgədə həlledici söz sahibinə çevrildiyini, ölkəmizin dünyada gedən mühüm proseslərlə bağlı öz prinsipial mövqeyini ortaya qoyduğunu, iqtisadi potensialımızın, siyasi və hərbi qüdrətimizin durmadan artdığını, ordumuzun Ali Baş Komandanın əmrinə hər an hazır olduğunu xatırladaraq dövlətimizin öz ərazi bütövlüyünü istənilən yolla bərpa edəcəyi barədə dövlətimizin başçımızın qətiyyətli mövqeyini bir daha diqqətə çatdırıb. O, respublikanın daxili işlər naziri, general-polkovnik Ramil Usubovun adından qəhrəman şəhərin müdafiəsində şəhid olmuş polis əməkdaşlarının ailə üzvlərinə bir daha başsağlığı verib, onların problemləri və qayğıları ilə maraqlanıb, qaldırılan məsələlərin tezliklə həlli istiqamətində müvafiq tədbirlərin görüləcəyini bildirib.
Şəhid ailələri adından çıxış edənlər - Vərziyar Əliyeva, Qiymət Kərimova və Şamilə Məmmədova onlara göstərilən diqqət, qayğıya görə ölkə və Daxili İşlər Nazirliyinin rəhbərliyinə minnətdarlıqlarını çatdırıblar.