Bakı, 4 mart, AZƏRTAC

Yunanıstanın paytaxtı Afina şəhərində “Lillian Voudouri” Böyük Musiqi Kitabxanasının Megaron konsert zalında Avropa Azərbaycan Cəmiyyətinin (TEAS) Strasburq ofisi və Azərbaycanın Yunanıstandakı səfirliyi tərəfindən “Xocalıya ədalət!” beynəlxalq təbliğat kampaniyası çərçivəsində anım konserti təşkil edilib.

TEAS-dan AZƏRTAC-a bildiriblər ki, əvvəlcə Xocalı soyqırımı qurbanlarının xatirəsi bir dəqiqəlik sükutla yad edilib.

Tədbirdə çıxış edən Azərbaycanın Yunanıstandakı səfiri Rəhman Mustafayev deyib: “Necə ola bilər ki, 1992-ci ilin fevral ayında Xocalıda törədilmiş qanlı hadisə kimi dəhşətli bir cinayət baş versin, lakin heç vaxt tanınmasın? Cavab sadədir: Ermənistan Azərbaycan xalqına qarşı XX əsr ərzində törətdiyi cinayətlərə görə heç vaxt məsuliyyət daşımayıb. Azərbaycan Xocalı faciəsi haqqında həqiqətləri beynəlxalq ictimaiyyətə çatdırmaq və bütün dünyada hökumətlərin və parlamentlərin bu soyqırımına siyasi və hüquqi qiymət vermələrinə nail olmağa çalışır.

Biz bu cinayəti pisləməli və ona hüquqi qiymətin verilməsi məsələsində həmrəylik nümayiş etdirməliyik. Bu yalnız qətlə yetirilmiş və işgəncələrə məruz qalmış Azərbaycan vətəndaşlarının xatirəsi üçün deyil, həmçinin dünya xalqları üçün çox vacib məsələdir. Bu cür faciələrin təkrarlanmasına yol verilməməlidir.

Fürsətdən istifadə edərək, mən sizi və sizin vasitənizlə Yunanıstan vətəndaşlarını, parlament üzvlərini “Xocalıya ədalət!” beynəlxalq kampaniyasından kənarda qalmamağa və onu dəstəkləməyə çağırıram”.

Yüz əlli nəfərdən artıq siyasətçidən, ictimai xadimlər, diplomatlar və mətbuat nümayəndələrindən ibarət auditoriya qarşısında çıxış edən Yunanıstan-Azərbaycan Gənclər Mərkəzinin prezidenti İoannis Papaqriqoriou və Avropa Azərbaycan Cəmiyyətinin Strasburq ofisinin rəhbəri Eliza Piter bildiriblər ki, bu axşam keçirilən tədbir insanın nə dərəcədə qeyri-insani hərəkətlər edə, müharibənin nə qədər dəhşətli nəticələri ola biləcəyini xatırlamağa yardım edir. Bu, qisasa deyil, ədalətə çağırışdır. Anım konserti millətlər arasında sülhə həsr olunmuş qəsidədir. Bu konsert sülh və ədalət ruhundadır.

“Xocalı 613” simfonik poemasının müəllifi, fransız bəstəkarı Pyer Tilloy yaratdığı əsərin yaranma tarixçəsindən bəhs edib: “Son 20 il ərzində Azərbaycana dəfələrlə səfərlər etmişəm. Belə olanda, təbii ki, çoxlu dostlar əldə edirsən. Dostluq yalnız dostunun sevincini deyil, kədərini də bölüşmək deməkdir. Buna görə də hiss etdim ki, Xocalı faciəsi haqqında yazmalıyam. “Xocalı 613” əsəri üzərində çalışanda mən sanki bir quş olub 1992-ci il fevralın 26-da həmin faciəli gecədə Xocalı üzərində uçurdum, hər şeyi görürdüm və bunları musiqi vasitəsilə ifadə edirdim”.

Tədbir “Rhein-Quartett” kamera ansamblı tərəfindən Qərb və Azərbaycan bəstəkarlarının əsərlərinin ifa olunması ilə davam edib. Özü Birinci Dünya müharibəsinin qurbanı olmuş bəstəkar Enrike Qranadosun “Orientale” (ispan üslubunda kompozisiya), Əfrasiyab Bədəlbəylinin duyğusal “Azad bir quşdum”, Xəyyam Mirzəzadənin həzin “Bərzani” adlı əsərləri ecazkar şəkildə ifa edilib.

Anım gecəsi məşhur fransız bəstəkarı Pyer Tilloyun həmin faciəli gecənin dəhşətlərindən xəbər verən “Xocalı 613” adlı simfonik poemanın ifası ilə yekunlaşıb.