CƏMİYYƏT


YAP Səbail rayon təşkilatında “Gəlin birgə yaşadaq” mövzusunda konfrans keçirilib

A+ A

Bakı, 1 noyabr, AZƏRTAC

Noyabrın 1-də Yeni Azərbaycan Partiyası Səbail rayon təşkilatının, Azərbaycan Talassemiya Federasiyasının və Mərkəzi Qan Bankının birgə təşkilatçılığı ilə “Gəlin birgə yaşadaq” mövzusunda konfrans keçirilib.

AZƏRTAC xəbər verir ki, YAP Səbail rayon təşkilatının inzibati binasında keçirilən maarifləndirici tədbirdə bu qurumun, habelə Azərbaycan Talassemiya Federasiyasının, Mərkəzi Qan Bankının və Respublika Talassemiya Mərkəzinin məsul şəxsləri, gənclər iştirak ediblər.

Konfransda əvvəlcə qan donorluğu ilə bağlı videoçarx nümayiş olunub.

YAP Səbail rayon təşkilatının sədr müavini Muxtar Nağıyev konfransda çıxış edərək tədbirin əhəmiyyətini yüksək qiymətləndirib. YAP Səbail rayon təşkilatının ölkəmizdə müxtəlif sahələrdə həyata keçirilən layihə və tədbirlərə qatıldığını vurğulayan M.Nağıyev təmsil etdiyi qurumun bu aksiyaya da fəal qoşulduğunu diqqətə çatdırıb. Sədr müavini YAP Səbail rayon təşkilatının son dövrlərdə həyata keçirdiyi və iştirak etdiyi layihə və tədbirlərdən danışıb.

Respublika Talassemiya Mərkəzinin poliklinika şöbəsinin müdiri Zemfira Mirzəyeva talassemiya xəstəliyinin fəsadları, onun yaranmasına səbəb olan amillər, müalicəsi üsulları barədə ətraflı məlumat verib. Tədbirin əsas məqsədinin qan donorluğunun inkişafına diqqətin cəlb edilməsi və talassemiya haqda ətraflı məlumatın verilməsi olduğunu vurğulayan Z.Mirzəyeva ölkəmizdə qan donorluğunun inkişafında KİV nümayəndələrinin rolunu yüksək qiymətləndirib.

Sonra Mərkəzi Qan Bankının direktor müavini Namirə Abbasova, Azərbaycan Talassemiya Federasiyasının vitse-prezidenti Fuad Rəsul çıxış ediblər.

Tədbirdə qeyd olunub ki, qanvermə aksiyaları və təbliğat xarakterli tədbirlər Azərbaycan Respublikasının Prezidenti İlham Əliyevin Sərəncamı ilə təsdiq edilmiş “Hemofiliya və talassemiyadan əziyyət çəkən uşaqlara qayğı” Dövlət Proqramına əsasən, həmçinin Heydər Əliyev Fondunun “Talassemiyasız həyat naminə” layihəsi çərçivəsində təşkil olunur. Fond tərəfindən təşkil olunan “Talassemiyasız həyat naminə” mövzusunda “dəyirmi masa”dan sonra xeyli sayda dövlət və kommersiya təşkilatı qanvermə aksiyalarında fəal iştirak edirlər. Hazırda Azərbaycanda iki mindən artıq talassemiya və digər irsi qan xəstəliyinə məruz qalmış insan var ki, belə aksiyalar onların həyatı üçün mühüm əhəmiyyət daşıyır.

Diqqətə çatdırılıb ki, Heydər Əliyev Fondunun “Talassemiyasız həyat naminə” layihəsi çərçivəsində Azərbaycan Talassemiya Federasiyasının qan donorluğu barədə ictimaiyyəti daha geniş məlumatlandırması əhalinin, dövlət təşkilatlarının və biznes qurumlarının cəlb edilməsi ilə qan toplama kampaniyalarının mütəmadi təşkilinə xidmət edir. Qan donorluğunun inkişafı məqsədilə Azərbaycan Talassemiya Federasiyası və Mərkəzi Qan Bankı mütəmadi qaydada belə tədbirlər həyata keçirir.

Çıxışlardan sonra mövzu ilə bağlı ədəbi-bədii kompozisiya təqdim olunub.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.