CƏMİYYƏT
YAP Səbail rayon təşkilatının kollektivi Dövlət Bayrağı Meydanı Kompleksində olub
Bakı, 7 noyabr, AZƏRTAC
Yeni Azərbaycan Partiyası (YAP) Səbail rayon təşkilatının kollektivi və rayon ictimaiyyətinin nümayəndələri Dövlət Bayrağı Günü münasibətilə noyabrın 7-də Dövlət Bayrağı Meydanı Kompleksini ziyarət ediblər.
YAP Səbail rayon təşkilatından AZƏRTAC-a bildiriblər ki, kompleksdəki Dövlət Bayrağı Muzeyi ilə tanışlıq zamanı ziyarətçilər Azərbaycanın müxtəlif dövrlərdəki bayraqları və digər eksponatlarla, o cümlədən ölkəmizin ərazisində mövcud olmuş qədim dövlətlərin bayraqları, rəmzləri, sikkələri, dövlət orden və medalları, Silahlı Qüvvələrin geyim formaları və s. ilə yaxından tanış olublar. Onlara muzeydə nümayiş etdirilən eksponatlar və fotoşəkillər barədə ətraflı məlumat verilib.
Qeyd edilib ki, Dövlət Bayrağı Meydanı Azərbaycan Prezidenti İlham Əliyevin 2007-ci il noyabrın 17-də imzaladığı Sərəncam əsasında yaradılıb. Meydanın təməli 2007-ci il dekabrın 30-da dövlətimizin başçısının iştirakı ilə qoyulub, 2010-cu il sentyabrın 1-də isə təntənəli açılış mərasimi keçirilib.
Məlumat verilib ki, ümumi ərazisi 60 hektar olan Dövlət Bayrağı Meydanında inşa edilən bayraq dirəyinin hündürlüyü 162 metrdir. Qurğunun ümumi çəkisi isə 220 tondur. Bayrağın eni 35 metr, uzunluğu 70 metr, ümumi sahəsi 2450 kvadratmetr, çəkisi isə təqribən 350 kiloqramdır. Ginnes dünya rekordları təşkilatı 2010-cu il mayın 29-da meydandakı Dövlət Bayrağı dirəyinin dünyada ən hündür bayraq dirəyi olduğunu təsdiq edib.
Tədbir iştirakçıları Dövlət Bayrağı Meydanı Kompleksi, o cümlədən Dövlət Bayrağı Muzeyi ilə tanışlıqdan xoş təəssüratla ayrılıblar.