Yeni Azərbaycan Partiyası (YAP) Naxçıvan Muxtar Respublikası Şərur rayon təşkilatının növbəti şura iclasında 2014-cü ilin doqquz ayında görülmüş işlərə yekun vurulub, qarşıda duran vəzifələr müəyyənləşdirilib.

AZƏRTAC xəbər verir ki, gündəlikdə duran məsə­lə ilə əlaqədar təşkilatın sədri, Naxçıvan Muxtar Respublikası Ali Məclisinin deputatı Əmir Babayevin məruzəsi dinlənilib.

Qeyd olunub ki, təşkilatın növbəti şura iclası dövlət müstəqilliyinin 23-cü ildönümünün qeyd edildiyi dövrə təsadüf edir. 1993-cü ildə müasir Azərbaycan dövlətinin memarı və qurucusu ulu öndər Heydər Əliyevin hakimiyyətə qayıdışı ilə dövlətçiliyin məhv olması təhlü­kə­si aradan qaldırılıb, Ümummilli Liderimizin rəhbərliyi ilə on il ərzində müstəqil dövlət quruculuğu istiqamətində məqsədyönlü, ardıcıl işlər görülüb. Görkəmli dövlət xadimi Heydər Əliyevin müəyyənləşdirdiyi quruculuq siyasətini bu gün Ulu Öndərin layiqli davamçısı, ölkə Prezidenti İlham Əliyev uğurla həyata keçirir. Dövlət başçısının rəhbərliyi ilə Azərbaycan siyasi, iqtisadi və hərbi sahələrdə böyük nailiyyətlər qazanıb.

Əmir Babayev YAP Şərur rayon təşkilatının ötən doqquz ayda əlamətdar və tarixi günlərlə bağlı, həmçinin “Muxtariyyət ili” çərçivəsində bir sıra tədbirlər ke­çirdiyini diqqətə çatdırıb.

Vurğulanıb ki, YAP Şərur rayon təşkilatının tərkibində 163 ilk partiya təşkilatı fəaliyyət göstərir. Bunların 63-ü kənd ərazi, 64-ü məktəb və 36-sı idarə, müəssisə ilk təşkilatlarıdır. Təşkilatın uçotunda 10 min 576 nəfər partiya üzvü vardır ki, bunların 2 min 917 nəfərini, yəni 27,6 faizini qadınlar, 3 min 661 nəfərini, yəni 34,6 faizini gənclər təşkil edir. İlin 9 ayı ərzində Şərur rayonunda Yeni Azərbaycan Partiyasının sıralarına qəbul olunanların sayı 103 nəfər olub.

Ə. Babayev qarşıda duran vəzifələrdən də danışaraq qeyd edib ki, əsas vəzifəmiz əhali arasında ideya-siyasi işi gücləndirmək, partiya üzvlərinə təmsil etdiyi təşkilatın işində fəal olmağı aşılamaqdan iba­rət olmalıdır. Hər bir partiya üzvü YAP-ın Proqram və Nizamnaməsinin tələblərinə, prinsiplərinə əməl etməli, rayonda gedən tikinti-quruculuq, abadlıq işlərində, yaşıllaşdırma tədbirlərində və qarşıya qoyulan digər vəzifələrin həyata keçirilməsində səyini əsirgəməməlidir.

Yığıncaqda YAP fəalları Elmira Rzayeva, Ofeliya İbrahimova və Ədalət Əhmədov da çıxış ediblər.

Şura iclasında müzakirəyə çıxarılan məsələ ilə əlaqədar qərar qəbul olunub.