Yığma futbol komandamız yeni ildə ilk görüşünü Ukrayna millisi ilə keçirə bilər. Komandamızın baş məşqçisi Şahin Diniyevin AZƏRTAC-a verdiyi məlumata görə, komandaların martın 1-də Bakıda görüşməsi barədə razılaşma Ukrayna Futbol Federasiyası ilə artıq əldə olunmuşdur. Lakin 2008-ci il Avropa çempionatının qrup seçmə mərhələsinin yanvarın 27-də İsveçrənin Montre şəhərində keçiriləcək püşkatmasından sonra, Ukrayna və Azərbaycan yığmalarının bir qrupa düşəcəyi halda, oyun baş tutmayacaqdır.

Xatırladaq ki, yığmamızın yoxlama oyununun, ilk öncə, Gürcüstan millisinə qarşı keçirilməsi nəzərdə tutulsa da, sonradan bu, yalnız 21 yaşlılardan ibarət yığma komandaya şamil edilmişdir. Gənclərdən ibarət yığmamız fevralın 7-i və 9-da Tbilisidə gürcüstanlı həmyaşıdları ilə yoxlama oyunları keçirəcəklər.

Baş məşqçi Avropa çempionatının qrup seçmə mərhələsinin püşkünə də toxunaraq bildimişdir ki, o, əsasən, gənclərdən təşkil olunmuş millimizin oyunçularının təcrübə toplamaları üçün Avropanın ən güclü kollektivləri ilə qarşılaşmasını istəyir.

“Neftçi”nin “Birlik kuboku” turnirində çıxışını diqqətlə izləyən yığmamızın baş məşqçisi komandanın bütün oyunlarından razı qaldığını bildirmişdir. O, ölkə çempionunun heyətində çıxış edən yığma komanda üzvlərinə də münasibətini bildirmişdir: “Əlbəttə, yığma üzvləri, 100 faiz olmasa da, görüşlərin əksəriyyətində çox yaxşı təsir bağışladılar”.