SİYASƏT
Yaponiya mətbuatında 28 May-Respublika Gününə həsr olunmuş məqalələr dərc edilmişdir VİDEO
Tokio, 31 may (AZƏRTAC). Azərbaycanın Yaponiyadakı səfirliyinin təşkilatçılığı ilə bu ölkənin bir sıra nüfuzlu qəzetlərində Azərbaycan Xalq Cümhuriyyətinin yaradılmasının 96-cı ildönümünə həsr edilmiş məqalələr dərc olunmuşdur.
İngilis dilində nəşr olunan və əsasən Yaponiyadakı diplomatik korpusun və beynəlxalq təşkilatların nümayəndələri üçün nəzərdə tutulan “The Japan Times” qəzetində səfir Gürsel İsmayılzadənin “Azərbaycan-sürətlə inkişaf edən gələcəyin ölkəsi” və iqtisadiyyat və sənaye naziri Şahin Mustafayevin “Azərbaycan regionda güclü sənaye mərkəzinə çevrilir” adlı məqalələri dərc edilmişdir.
Səfir G.İsmayılzadənin məqaləsində Azərbaycanın ötən əsrin əvvəllərində müstəqilliyini qazanmasının böyük tarixi nailiyyət olduğu qeyd edilmiş, müsəlman dünyasında ilk demokratik və dünyəvi respublikanın yaradılmasına nəzər salınmış, parlamentin təsis edildiyi, qadınlara əksər ölkələrdən əvvəl səsvermə hüququnun verildiyi vurğulanmışdır. 1991-ci ildə müstəqilliyini bərpa etmiş Azərbaycanın uğurla həyata keçirilmiş sosial-iqtisadi islahatlar nəticəsində sürətlə inkişaf edən ölkələrdən birinə çevrilməsi, qlobal enerji siyasətinin formalaşması və beynəlxalq əhəmiyyətli layihələrin Avropanın enerji təhlükəsizliyinin təmin olunmasında mühüm rol oynadığı bildirilmişdir.
Məqalədə Azərbaycanın tarixin bütün dövrlərində tolerantlıq nümunəsi olduğu vurğulanmış, Yer kürəsindəki on bir iqlim qurşağından doqquzunun Azərbaycanda olduğu qeyd edilmiş, ölkəmizin turizm potensialı, o cümlədən mədəniyyət nümunələri, tarixi abidələr, sağlamlıq mərkəzləri, ləziz mətbəxi barədə geniş məlumat verilmişdir. Məqalədə 2015-ci ildə ilk Avropa Oyunlarına məhz Azərbaycanın ev sahibliyi edəcəyi, ölkəmizin beynəlxalq tədbirlərin təşkil edildiyi mərkəzə çevrildiyi vurğulanmışdır.
Səfir məqalədə Azərbaycan-Yaponiya münasibətlərinə dair məlumat vermiş, ikitərəfli əlaqələrin yüksələn xətlə inkişaf etdiyini vurğulamışdır. Bildirilmişdir ki, Azərbaycan Yaponiya ilə çoxtərəfli əməkdaşlığın genişləndirilməsində maraqlıdır.
İqtisadiyyat və sənaye naziri Ş.Mustafayevin məqaləsində Azərbaycanın son 10 ildə iqtisadi inkişafı, ölkəmizin regionda güclü sənaye mərkəzinə çevrilməsindən bəhs edilir.
Məqalədə vurğulanır ki, Prezident İlham Əliyev tərəfindən uğurla həyata keçirilən sosial-iqtisadi siyasət nəticəsində müstəqil Azərbaycan dövləti sürətli inkişaf dövrünü yaşayır, dünya iqtisadi sisteminə fəal inteqrasiya yolu seçmiş iqtisadiyyatımız tərəqqi edir. Son illər Azərbaycanın bir çox uğurlara imza atması, BMT Təhlükəsizlik Şurasına qeyri-daimi üzv seçilməsi, kosmosa süni peyk çıxaran məhdud saylı dövlətlər sırasına daxil olması, bazar iqtisadiyyatına keçidin başa çatdırılması, xarici ölkələrə investisiya yatıran ölkəyə, regionun siyasi, iqtisadi və mədəni mərkəzinə çevrilməsi məqalədə qeyd edilir.
Azərbaycanın sosial-iqtisadi inkişafının əsas istiqamətlərini özündə əks etdirən “Azərbaycan 2020: gələcəyə baxış” İnkişaf Konsepsiyasında iqtisadiyyatın şaxələndirilməsinin sürətləndirilməsi, ümumi daxili məhsulun artımına əsasən qeyri-neft sektoru hesabına nail olunması hədəfləri barədə məlumat verilir. Nüfuzlu reytinq agentlikləri “Fitch Ratings”, “Moody’s Investors Service” və “Standard and Poor’s” tərəfindən dünya ölkələrinin rəqabət qabiliyyətliliyi reytinqində Azərbaycanın yeri xüsusi qeyd edilir.
Məqalədə vurğulanır ki, Prezident İlham Əliyev tərəfindən 2014-cü ilin Azərbaycanda “Sənaye ili” elan edilməsi sənayenin inkişafını əsas prioritetlərdən biri kimi müəyyən etməklə, sənayeləşmə siyasətinin uğurla davam etdirilməsini, ölkəmizin regionun sənaye mərkəzinə çevrilməsini təmin edəcəkdir. Eyni zamanda, məqalədə Azərbaycan ilə Yaponiya arasında sənaye sahəsində əməkdaşlığın perspektivlərinə nəzər salınır.
Yapon dilində nəşr olunan nüfuzlu “Nikkey” qəzetində də səfir Gürsel İsmayılzadənin 28 may – Respublika Günü münasibətilə “Gələcəyin ölkəsi-Azərbaycan” adlı məqaləsi dərc edilmişdir.
Məqalədə 1918-ci ildə Azərbaycan Xalq Cümhuriyyətinin yaradılması, fəaliyyət göstərdiyi dövrdə Qərbə inteqrasiyası, region və digər ölkələrlə diplomatik əlaqələri barədə ətraflı məlumatlar öz əksini tapmışdır.
Ötən əsrin sonlarında müstəqilliyini bərpa etmiş Azərbaycanda həyata keçirilmiş uğurlu sosial-iqtisadi islahatlar nəticəsində onun regionun lider ölkəsinə və dünyanın mühüm enerji mərkəzlərindən birinə çevrilməsi barədə yapon oxuculara geniş məlumat verilir. Son 10 ildə ölkə ərazisində mühüm infrastruktur və quruculuq işlərinin aparıldığı, qeyri-neft sektorunun inkişaf etdirilməsi istiqamətində əhəmiyyətli islahatlar həyata keçirildiyi qeyd edilir.
Azərbaycan-Yaponiya münasibətlərinə geniş yer verilmiş məqalədə ikitərəfli əlaqələrin yüksələn xətlə inkişaf etdiyi vurğulanır. Məqalədə hər iki ölkənin qarşılıqlı hörmət, inam və etimad prinsiplərini rəhbər tutan siyasi, iqtisadi, humanitar və digər sahələrdə, eləcə də beynəlxalq təşkilatlar çərçivəsində əməkdaşlığın genişləndirilməsində də maraqlı olduğu və bu istiqamətdə bütün səylərin səfərbər ediləcəyi qeyd edilir.
Vüqar Ağayev
AZƏRTAC-ın xüsusi müxbiri
Tokio