DÜNYA
Yaponiyanın Haçiyoci şəhərində ənənəvi yay festivalı keçirilib
Tokio, 7 avqust, AZƏRTAC
Yaponiyada yay festivalları həm möhtəşəmliyi, həm də əcnəbi və yerli turistləri cəlb etməsi ilə diqqəti cəlb edir. Belə festivallardan biri də öz tarixi ilə seçilən Haçiyoci festivalıdır. Festivalla bərabər diqqətimizi bu şəhərə yönəldən başqa bir məqam burada məşhur həmyerlimiz, Azərbaycan-Yaponiya Dostluq Mərkəzinin sədri, Dünya Azərbaycanlılarını Əlaqələndirmə Şurasının üzvü Xəlil Kələntərin yaşamasıdır. Məhz Xəlil bəyin köməyi ilə biz həmin festivala qatılaraq bu ənənəvi yapon bayramı barədə məlumat əldə etdik.
Xəlil Kələntər bildirdi ki, hər il avqustun birinci həftəsinin sonunda keçirilən festival Yaponiya tarixinin ən böyük, maraqlı bayramlarından biridir. Üç gün davam edən festivalda ənənəvi yapon arabaları, gecə bazarı, tayko barabanlarını çalanlar, əjdaha rəqsləri çoxsaylı qonaqları əyləndirir. Şəhərin müxtəlif rayonlarından gələn 19 araba mərkəzi küçələrlə hərəkət edir, onların içərisində və üzərində olan artistlər isə müxtəlif rəqs və mahnılarla bayram iştirakçılarını əyləndirirlər.
Bayramın birinci günü əsasən uşaqların iştirakı ilə olan tamaşalar nümayiş etdirilir. Bu, Haçiyocidə yaşayan balacaların milli musiqini, rəqsləri, adət-ənənələri öyrənmələri baxımından çox əhəmiyyətlidir.
Tarixi qədimliyi ilə diqqəti cəlb edən şəhər əsasən iki hissəyə bölünüb - aşağı məhəllə və yuxarı məhəllə. Hər məhəllənin öz məbədi var. İkinci gün həmin məhəllələrdəki məbədlərdən gələn arabalar şəhərin mərkəzində görüşərək küçəboyu birlikdə hərəkət edirlər. Üçüncü gün daha möhtəşəm çıxışlarla diqqəti cəlb edir. Bu il festival Haçiyoci bələdiyyəsinin yaradılmasının 100 illiyi ilə üst-üstə düşdüyünə görə bu dəfə bayram daha möhtəşəm hazırlanıb. Əjdaha rəqsləri, milli musiqi nömrələri günboyu davam edir. Festivala yerli qruplarla yanaşı qonşu ölkələrdən gələn rəqs və musiqi qrupları da qatılırlar. Məsələn, builki festivalda Tayvandan gəlmiş rəqs qrupunun iştirakı böyük maraqla qarşılandı. Təşkilatçıların bildirdiyinə görə, ümumilikdə festivalda 80 minə yaxın qonağın iştirakı gözlənilir. Belə festivallara qatılan, fərqli ölkələrdən gəlmiş əcnəbilər və yerli turistlər Yaponiyanın adət-ənənələri ilə yaxından tanış olurlar.
Günün sonuna doğru arabalar şəhərin mərkəzində bir sıraya düzülürlər. Burada həm arabada olanların, həm də əllərində müxtəlif fiqurları, bayraqları tutan rəqqasların ifaları tamaşaçılar tərəfindən böyük coşqu ilə qarşılanır.
Bayramın davam etdiyi mərkəzi küçənin kənarlarında təşkil edilmiş köşklərin təklif etdiyi milli yeməklər, şirniyyat və şirələr tamaşaçılar tərəfindən böyük maraqla qarşılanır. Bu yeməklərin tamına baxmaq üçün uzun növbələr yaranır.
Vüqar Ağayev
AZƏRTAC-ın xüsusi müxbiri
Tokio