İQTİSADİYYAT


Yaponiyanın dünya şöhrətli “HIS” şirkəti Azərbaycana ilk birbaşa tur təşkil edəcək

Tokio, 15 mart, AZƏRTAC

Yaponiyanın dünya şöhrətli “HIS” şirkəti cari ilin aprelində Azərbaycana ilk birbaşa tur təşkil edəcək. AZƏRTAC-ın Yaponiyadakı xüsusi müxbirinə bu barədə məlumat verən “HIS” şirkətinin baş meneceri Keniçi Kobayaşi və səfərin təşkilatçısı “Cross Border Club”ın prezidenti Kazuyasu İşida bildiriblər ki, əsas məqsəd regionun lider dövləti olan Azərbaycanı yapon turistlərə daha yaxından tanıtmaqdır.

“HIS” şirkəti haqqında məlumat verən K.Kobayaşi bildirib ki, bu şirkət Yaponiyada xarici səfərlərin təşkili üzrə ən böyük turizm agentliyidir. Təsadüfi deyil ki, əhatə dairəsinə və turistlərin sayına görə bizim şirkət “Ginnesin rekordlar kitabı”na daxil edilib. Şirkətimiz 37 ildən çoxdur ki, fəaliyyət göstərir. Yaponiya daxilində 300, xarici ölkələrdə isə 120-dən çox filialımız var. İşçilərin ümumi sayı 15 min nəfərdən çoxdur. Son zamanlar yapon turistlər arasında Mərkəzi Asiya, Qafqaz və Azərbaycana maraq artıb. Bu ilədək biz Azərbaycana səfərləri Qafqaz və ya Birləşmiş Ərəb Əmirlikləri turunun tərkibində təşkil edirdik. Lakin ölkənizə artan maraq ilk dəfə olaraq Azərbaycana xüsusi turun təşkilinə təkan verdi. Bu məsələdə “Cross Border Club”ın prezidenti Kazuyasu İşidanın xüsusi rolunu vurğulamaq istərdim. Məhz onun təşkilatçılığı və verdiyi məlumatlar sayəsində Azərbaycan turu ərsəyə gəldi. Söz yox ki, Azərbaycanın sürətli inkişafı, ölkənizin zəngin tarixi, mədəniyyəti və insanların yüksək qonaqpərvərliyi bu məsələdə mühüm əhəmiyyətə malikdir. Azərbaycanın dünya miqyasında tanınması, burada keçirilən beynəlxalq tədbirlər, aparılan böyük quruculuq işləri ölkənizə çox böyük maraq yaradıb. Mən özüm bir neçə dəfə Azərbaycanda olmuşam və böyük məmnuniyyətlə ölkənizi yenə də ziyarət etməyə hazıram.

Azərbaycana ilk müstəqil tur barədə məlumat verən Kazuyasu İşida isə bildirib ki, ilk dəfə ölkəmizə dörd il bundan əvvəl səfər edib. İlk səfərdən insanlarınızın qonaqpərvərliyi, buradakı tarixi keçmişlə müasir inkişafın üzvi vəhdəti məni özünə heyran etdi. Mətbəxinizə isə söz ola bilməz. Düşündüm ki, yaponlar mütləq bu gözəl ölkəni tanımalıdırlar. Həm Qafqaz, həm də Birləşmiş Ərəb Əmirliklərinə turlara Azərbaycanı da əlavə etdik. Bu günədək ölkənizə 10 dəfədən çox səfər etmişəm. Əvvəlki səfərlərdə mənimlə birlikdə turlara qatılanlar da Azərbaycana heyran olduqlarını və bu ölkəyə dəfələrlə səfər etməyə hazır olduqlarını bildiriblər. Bundan əlavə, 2014-cü ilin noyabrında Bakıda yapon iş adamlarının iştirakı ilə təşkil etdiyimiz “Birinci Yaponiya biznes festivalı” çox uğurla nəticələndi. Bütün bunları nəzərə alaraq, Azərbaycana ilk müstəqil turun təşkilini qərara aldıq. Bu tur çərçivəsində paytaxt Bakı ilə yanaşı turizm baxımından çox əlverişli olan tarixi Şəki şəhərinə də səfər edəcəyik. Həmin səfər zamanı keçəcəyimiz yol Yaponiyanın nüfuzlu “Asahi TV” kanalı tərəfindən martın 1-dən 31-dək hər axşam reklam çarxında nümayiş olunur.

Yapon milli mətbəxi Vaşokunun UNESCO-nun məhz Bakı toplantısı zamanı Dünya Mədəni İrsi Siyahısına daxil olunduğunu xatırladan K.İşida qeyd edib ki, cari ilin oktyabrında Bakıda Yaponiya qida məhsulları sərgisi də təşkil olunacaq. Həmin sərgidə 100-dək yapon iş adamının iştirakı gözlənilir.

Son illər Yaponiya ilə Azərbaycan arasında əməkdaşlıq əlaqələrinin genişləndiyini qeyd edən K.Kobayaşi Bakıdan birbaşa Komatsuya açılan karqo reysinin buna parlaq nümunə olduğunu bildirib. Vurğulayıb ki, yapon dilinin Azərbaycan universitetlərində öyrədilməsi təhsilini davam etdirmək üçün Yaponiyaya gələn azərbaycanlı gənclərin sayının artmasına mühüm təsir göstərib. Bütün bu məqamlar iki ölkə arasında diplomatik münasibətlərin qurulmasının 25-ci ildönümünün qeyd edildiyi 2017-ci ildə əlaqələrimizin daha da artacağını deməyə əsas verir. Düşünürük ki, bundan sonra yapon turizm şirkətləri Azərbaycana daha böyük maraq göstərərək bu gözəl ölkəyə birbaşa turların sayını artıracaqlar.

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.