SİYASƏT
Yaponiyanın nüfuzlu “Mainichi Şhimbun” qəzeti Azərbaycanın uğurlarından yazıb
Tokio, 21 fevral, AZƏRTAC
Yaponiyanın “Mainichi Shinbun” qəzetində Azərbaycanın Yaponiyadakı səfiri Gürsel İsmayılzadənin yapon dilində məqaləsi dərc olunub.
Məqalədə ötən il müstəqilliyini bərpa etməsinin 25-ci ildönümünü qeyd edən Azərbaycanın əldə etdiyi uğurlardan geniş bəhs olunur. Prezident İlham Əliyevin rəhbərliyi altında ölkə iqtisadiyyatının sürətlə inkişaf etməsi, nəhəng abadlıq və quruculuq işlərinin aparılması barədə geniş məlumat verilir. Vurğulanır ki, Azərbaycan müxtəlif beynəlxalq tədbirlərin, musiqi və idman yarışlarının keçirildiyi mərkəzlərdən birinə çevrilib. 2016-cı ildə Azərbaycanda keçirilmiş Formula-1 Avropa Qran-prisi, idmançılarımızın Rio-de-Janeyroda keçirilmiş XXXI Yay Olimpiya Oyunlarında uğurlu iştirakı barədə ətraflı məlumat da məqalədə öz əksini tapıb. Xüsusən Olimpiya Oyunlarının güləş və cüdo yarışlarında Azərbaycan idmançılarının yapon həmkarları ilə apardığı gərgin və bərabərsəviyyəli mübarizənin Yaponiyada böyük əks-səda doğurduğu qeyd edilir.
Məqalədə Azərbaycan-Yaponiya ikitərəfli münasibətlərinin sürətlə inkişaf etdiyi, bu işdə qarşılıqlı rəsmi səviyyəli səfərlərin mühüm rol oynadığı vurğulanır. Cari ilin sentyabrında iki ölkə arasında diplomatik münasibətlərin qurulmasının 25 illiyinin qeyd ediləcəyi xatırlanır. İki dost xalq tərəfindən bu bayramın yüksək səviyyədə qeyd olunacağı bildirilir.
Məqaləyə redaksiya tərəfindən əlavə edilən qoşmada Azərbaycanın XIX əsrdə İran və Rusiya arasında baş verən müharibələr nəticəsində iki hissəyə bölündüyü, ötən əsrin sonlarında Dağlıq Qarabağ ərazisində Ermənistanın Azərbaycana qarşı hərbi əməliyyatlara başlaması və 1994-cü ildən atəşkəs rejiminin elan edildiyi haqqında məlumat da öz əksini tapıb.
Vüqar Ağayev
AZƏRTAC-ın xüsusi müxbiri
Tokio