CƏMİYYƏT
“Yaşıl çay” jurnalının iyul nömrəsi çapdan çıxıb
Bakı, 27 iyul, AZƏRTAC
Aylıq elmi-praktik, publisistik “Yaşıl çay” jurnalının iyul nömrəsi çapdan çıxıb.
AZƏRTAC xəbər verir ki, jurnalın “Bakı-2015” birinci Avropa Oyunlarına həsr edilmiş bu nömrəsi 1000 tirajla “Adiloğlu” nəşriyyatı tərəfindən çapdan buraxılıb.
Jurnalın bu sayı nəşrin təsisçisi və baş redaktoru Araz Yağubovun “Əkinçi ənənələrinə sadiqlik” adlı yazısı ilə açılır. Yazıda Azərbaycan Respublikasının Prezidenti İlham Əliyevin milli mətbuatımızın 140 illik yubileyinin keçirilməsi haqqında Sərəncamı ilə bağlı fikirlər əksini tapıb.
Sonra oxuculara ilk Avropa Oyunları barədə “Atəşgahdan başlayan alov festivalı”, “Naxçıvanda möhtəşəm alov festivalı”, “Bakı-2015”in məşəli Lənkəranda”, “Məşəlin Bakı estafeti”, “İlk Avropa Oyunlarının möhtəşəm açılışı”, “Lənkəranlılar birinci Avropa Oyunlarının açılış mərasimini böyük sevinclə qarşıladılar”, “Böyük hünər, möhtəşəm zəfər”, “Karatenin “brilyantı” Rəfael Ağayev”, “Birinci Avropa Oyunlarının bağlanışı” sərlövhəli maraqlı yazılar təqdim olunub.
Bu nömrədə maraqlı yazılardan biri də Lənkəranda keçirilən III Gənclər Festivalına həsr edilib. “Tarixin canlı səhifələri” devizi ilə keçirilən festival barədə yazıda faşizm üzərində Qələbənin 70 illiyi ilə bağlı müharibə veteranlarının gənclərlə görüşündən, dövlətimizin müharibə veteranlarına qayğısından, yeni nəslin vətənpərvərlik ruhunda tərbiyəsindən söhbət açılıb.
Milli Qurtuluş Gününə, Uşaqları Beynəlxalq Müdafiə Gününə həsr olunmuş yazılar da bu nömrədə əksini tapıb.
Əməkdar jurnalist Həmzə Vəliməmmədovun “Lerik ağsaqqallarına Heydər Əliyev qayğısı”, Prezident təqaüdçüsü Şirvan Əbilovun “Heydər Əliyev – Azərbaycanın əbədi günəşi”, Lənkəran Rayon Qadınlar Şurasının sədri Elduzə Əhmədovanın “Ulu Öndərlə görüşlərim heç vaxt yadımdan çıxmayacaq” sərlövhəli məqalələri də jurnalın bu nömrəsinin diqqəti çəkən yazılarındandır.
“Yaşıl çay” fermer təsərrüfatında ilk dəfə çay yığımı”, “Astara çayının şöhrəti geri qayıdır” adlı yazılarda çayçılığın inkişafı sahəsində görülən işlərdən və qarşıda duran vəzifələrdən söhbət açılıb.
Bölgənin mədəniyyət, səhiyyə, idman həyatına dair maraqlı yazıların yer aldığı jurnalın bu nömrəsi el arasında “Yapon portağalı” və ya “Müdriklərin qidası” adlandırılan kinkan meyvəsinin faydaları haqqında yazı ilə tamamlanıb.