Bakı, 24 fevral, Həsrət Mahmudova, AZƏRTAC

“Bakı-2017” IV İslam Həmrəyliyi Oyunlarının “Grassroots” proqramı çərçivəsində həyata keçirilən “Yaxın hiss et” (Feel Closer) layihəsinə fevralın 24-də ADA Universitetində yekun vurulub.

AZƏRTAC xəbər verir ki, fevralın 20-dən icra olunan layihə çərçivəsində IV İslam Həmrəyliyi Oyunlarının idmançı səfirlərinin Azərbaycan Dillər, Azərbaycan Dövlət Neft və Sənaye, Bakı Dövlət, Azərbaycan Dövlət İqtisad və ADA universitetlərində tələbələrlə görüşləri təşkil olunub.

Layihə çərçivəsində keçirilən görüşlərdə idmançı səfirlər tələbələrə uğur hekayələrindən danışıb, onlarla fikir mübadiləsi aparıb, suallara cavab veriblər.

ADA Universitetinin prorektoru Fariz İsmayılzadə qeyd edib ki, bu təhsil ocağının tələbələri və müəllimləri qarşıdan gələn IV İslam Həmrəyliyi Oyunlarını səbirsizliklə gözləyirlər. Müxtəlif dinlərə, millətlərə hər zaman böyük hörmət və diqqətlə yanaşan Azərbaycan multikultural dəyərləri ilə dünyanın bir çox ölkələrinə nümunədir. Ölkəmizdə 2015-ci ildə keçirilən ilk Avropa Oyunları və bu il təşkil olunacaq IV İslam Həmrəyliyi Oyunları bunun bariz nümunəsidir.

Prorektor maraqlı fikir mübadiləsinə görə idmançı səfirlərə təşəkkürünü bildirib.

“Bakı-2017”nin “Grassroots” proqramı və daxili əlaqələr üzrə menecer Ülviyyə Əkbərova IV İslam Həmrəyliyi Oyunları haqqında ətraflı məlumat verib. O, “Bakı-2017”nin İslam dünyasını birləşdirən çoxnövlü maraqlı idman yarışı olduğunu qeyd edib.

Tədbirdə iştirak edən idmançı səfirlər – sərbəst güləşçi Hacı Əliyev, paracüdoçu İlham Zəkiyev, taekvandoçular Fəridə Əzizova, Radik İsayev, futbolçu Ruslan Abışov IV İslam Həmrəyliyi Oyunlarının “Sülh”, “Hörmət”, “Birlik” və “Mükəmməllik” dəyərləri haqqında tələbələrə ətraflı məlumat veriblər.

Görüşdə IV İslam Həmrəyliyi Oyunlarına və idmançı səfirlərin nailiyyətlərinə həsr edilən videoçarxlar nümayiş olunub, tələbələrin sualları cavablandırılıb.

Futbolçu səfir Ruslan Abışov isə görüşlə bağlı təəssüratlarını bölüşərkən deyib: “Yaxın hiss et” layihəsi yenilik idi və bu görüşlər bizim üçün istər səfir, istərsə də idmançı olaraq, çox əhəmiyyətlidir. Əminəm ki, uğur qazanmağı bacaran hər bir insan onun sirlərini də bölüşməkdən çəkinməməlidir”.

Taekvandoçu Fəridə Əzizova isə bildirib: “Azərbaycan bayrağını daim zirvələrdə görmək hər birimiz üçün qürurvericidir. Beynəlxalq turnirlərdə Azərbaycan bayrağını dalğalandıran idmançı olmaq isə nəinki qürurverici, eyni zamanda, böyük şərəfdir. Həmin anları sözlə ifadə etmək mümkün deyil. O anları yalnız yaşamaq lazımdır. Arzu edirəm ki, bayrağımız daim zirvələrdə dalğalansın”.