REGİONLAR


Yay istirahət mövsümünü Qaxda keçirmək arzusunda olanların sayı ildən-ilə artır

A+ A

Qax, 15 avqust, Mustafa Dadaşov, AZƏRTAC

Yay aylarında Qax rayonunun qonaq-qarası nəzərəçarpacaq dərəcədə çoxalır. Rayonun mülayim və saf dağ iqlimi, zəngin mineral bulaqları, gözəl təbiət mənzərələri, çayları, şəlalələri, dağ meşələri yerli və xarici turistlərin diqqətini özünə cəlb edir. Təbiətlə canlı ünsiyyət turistlərin istirahətini daha da mənalı edir.

AZƏRTAC-ın müxbiri rayonda fəaliyyət göstərən turizm obyektlərində qonaqlara göstərilən xidmətin səviyyəsi ilə maraqlanıb.

Hazırda Qax rayonunda 12 turizm obyekti fəaliyyət göstərir. Bu obyektlərdə yerlərin sayı 800-ə çatdırılıb. Rayon mədəniyyət və turizm şöbəsinin müdir əvəzi Dilarə Əzizovanın bildirdiyinə görə, cari ilin ötən dövründə rayona 18 mindən çox turist gəlib. Bu, ötən ilin müvafiq dövrü ilə müqayisədə 3 min nəfər çoxdur. Əvvəlki illərdən fərqli olaraq, bu yay rayona gələn xarici turistlərin sayı da nəzərəçarpacaq dərəcədə artıb.

İlisu kəndindəki “Uludağ” Turizm və İstirahət Mərkəzində eyni vaxtda 130-140 nəfərin yerləşməsi üçün hər cür şərait var. İstirahət mərkəzində bir nəfər üçün bir günlük qalmaq və xidmət haqqı səhər yeməyi də daxil olmaqla, 30 manat təşkil edir. Bu qiymət turistləri də qane edir. Mərkəzin direktoru Zabit Əhmədovun sözlərinə görə, yay mövsümünün başlanğıcından buradakı kotteclər demək olar ki, hər gün dolu olur. İndiyədək burada 5 minə yaxın turist dincəlib. Onların arasında İraq, Birləşmiş Ərəb Əmirlikləri, Türkiyə, Küveyt və digər ölkələrdən gələn turistlər də olub.

“Səngər qala” Ailəvi-İstirahət Mərkəzində bu yay mövsümündən 7 mərtəbəli 90 yerlik yeni otel binası fəaliyyət göstərir. Buradakı 2 nəfərlik mənzillərin qiyməti 80 manatdan başlayır. Bu qiymətə səhər yeməyi də daxildir. Mərkəzin həyətində turistlər üçün kənd mühitini xatırladan istirahət guşələri yaradılıb. Mərkəzin direktoru Məmməd Məmmədovun dediyinə görə, burada dincələnlər əsasən, yerli turistlərdir. Mərkəz turizm marşrutunun üzərində yerləşdiyi üçün buranı vaxtaşırı olaraq tur-ekskursiyalar çərçivəsində xarici turistlər də ziyarət edir.

“İlisu” pansionatında bu ildən böyüklər və uşaqlar üçün yeni əyləncə guşələri, o cümlədən “macəralar parkı”, “möcüzələr adası”, velosiped meydançası fəaliyyət göstərir. Bu yay ilk dəfə olaraq alpinistliyə maraq göstərənlər üçün dağ yolu ilə gəzinti marşrutları da müəyyənləşdirilib. Pansionatın direktoru Nizami Həşimov bildirib ki, turistlər 300, 600, 800, 1200 və 3000 metr uzunluğunda dağ cığırları ilə gəzintiyə çıxırlar. Bu cığırlar pansionatın səviyyəsindən 1000 metr yüksəkliyədək uzanır.

Qeyd edək ki, pansionatda eyni vaxtda 90 nəfər yerləşə bilir. Buradakı kotteclərin hər biri dörd nəfərlikdir. Gündə 3 dəfə yemək daxil olmaqla, bir nəfərin bir günlük qalma xərci 30 manat təşkil edir. Hazırda buradakı kotteclərdə boş yer yoxdur.

Nizami Həşimovun dediyinə görə, Zaqatala Beynəlxalq Hava Limanı yay aylarında müntəzəm fəaliyyət göstərərsə, bölgəyə xarici turistlərin axını daha da güclənər.

Yay istirahət mövsümünü “El Resort” otelində keçirənlər də yaradılan şəraitdən razılıq edirlər. Otelin meneceri Şamil Əfəndiyevin bildirdiyinə görə, havaların isti keçməsi ilə əlaqədar burada dincəlmək istəyənlərin sayı xeyli artıb. Şənbə və bazar günləri müraciətlərin sayı xüsusilə çoxalır. Yerli turistlərlə yanaşı, bu il xarici turistlərin, xüsusilə ərəb ölkələrindən gələn turistlərin sayında xeyli artım müşahidə olunur. Otelin qonaqları əyləncə mərkəzlərinin xidmətindən tam istifadə edirlər. Eyni zamanda, qonaqlar üçün rayonun tarixi məkanlarına səyahət turları da təşkil olunur.

İki korpusdan ibarət olan bu oteldə 134 otaq var. Otel gündəlik 280-300 nəfər qonaq qəbul etmək imkanına malikdir.

Rayona gələn turistlər tarixi məkanlara baş çəkməyi, təbiət qoynunda dincəlməyi çox sevirlər. Qədim tarixi-memarlıq abidəsi olan Ulu körpünün ətrafı günün isti vaxtlarında həmişə insanla dolu olur. Burada qonaqlara atla gəzinti və digər xidmətlər də təklif edilir.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.