Yeni Azərbaycan Partiyası xalqımızın milli maraqlarını ifadə edən avanqard təşkilatdır
Bakı, 1 noyabr, AZƏRTAC
Yeni Azərbaycan Partiyası (YAP) Zəngilan rayon təşkilatının IX konfransı keçirilib.
AZƏRTAC xəbər verir ki, Abşeron rayonu Masazır qəsəbəsində Zəngilan rayonundan olan məcburi köçkünlərin məskunlaşdıqları şəhərcikdəki Mədəniyyət Evində keçirilən konfransı YAP Zəngilan rayon təşkilatının sədri Əsəd Hüseynov açaraq hesabat məruzəsi ilə çıxış edib. O bildirib ki, müstəqil Azərbaycan Respublikasının memarı, ümummilli lider Heydər Əliyevin müəyyənləşdirdiyi siyasi kursun Prezident İlham Əliyev tərəfindən qətiyyətlə davam etdirilməsi nəticəsində ölkəmiz ildən-ilə qüdrətlənir və inkişaf edir.
Qeyd edilib ki, hazırda rayonda 52 ərazi ilk partiya təşkilatı, 2035 partiya üzvü var. Ötən konfransdan indiyədək YAP rayon təşkilatına 550 nəfər üzv olub ki, onların da 330 nəfərini qadınlar, 220 nəfərini gənclər təşkil edir.
Sonra nəzarət-təftiş qrupunun sədri Hidayət Həsənov qrupun fəaliyyəti barədə məlumat verib.
Rayon Ağsaqqallar Şurasının sədri Xuduş İsgəndərov, YAP Zəngilan rayon təşkilatının sədr müavini Həsən Ələkbərov, Yeni Azərbaycan Partiyası rayon təşkilatı Qadınlar Şurasının sədri Almaz Orucova, partiyanın Gənclər Birliyinin sədri Şənlik Əliyev və başqaları məruzə ətrafında çıxış edərək rayon təşkilatının hesabat dövründəki fəaliyyətini qənaətbəxş qiymətləndiriblər.
YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə konfrans iştirakçılarını partiyanın yaranmasının 25 illik yubileyi münasibətilə təbrik edərək Yeni Azərbaycan Partiyasının yaranma zərurətindən, keçdiyi inkişaf yolundan geniş söhbət açıb. O deyib: “Hər kəsə yaxşı məlumdur ki, müstəqilliyin ilk illərində Azərbaycan çətin vəziyyətdə idi. Ölkədə qarışıqlıq, anarxiya hökm sürürdü. Belə bir ərəfədə Azərbaycanın gələcəyini düşünən 91 nəfər ziyalı ümummilli lider Heydər Əliyevə müraciət etdi. Məhz bu müraciətdən sonra Naxçıvanda 550 nəfər nümayəndənin iştirakı ilə 1992-ci ilin 21 noyabr tarixində Yeni Azərbaycan Partiyasının təsis konfransı keçirildi”.
Qeyd edilib ki, Azərbaycan xalqının tarixində çox mühüm rol oynayan bu hadisə ölkədə yeni ictimai-siyasi vəziyyətin yaranmasının, dövlətçiliyimizin xilasının başlanğıcı olub. Tarixi zərurət nəticəsində yaranan YAP çox qısa müddətdən sonra Azərbaycanda hakimiyyət partiyasına çevrilib və o zamandan da məhz xalqımızın rifahı, dövlətimizin inkişafı naminə çox geniş fəaliyyəti ilə cəmiyyətin hər bir təbəqəsinin möhkəm dəstəyini qazanıb. Yeni Azərbaycan Partiyasının hakimiyyətdə olduğu illər ərzində ölkə həyatında əhəmiyyətli dəyişikliklər müşahidə olunub və hər bir vətəndaşın yaşayış səviyyəsində ciddi irəliləyişlər baş verib.
Vurğulanıb ki, ümummilli lider Heydər Əliyevin siyasi kursu bu gün Azərbaycan Prezidenti, Yeni Azərbaycan Partiyasının sədri İlham Əliyev tərəfindən uğurla davam etdirilir. Dövlət başçısı respublikamızın bütün dünyada tanınmasına nail olub. Prezident İlham Əliyevin iştirakı ilə Heydər Əliyev Mərkəzində Xəzər dənizinin Azərbaycan sektorunda “Azəri”, “Çıraq” yataqlarının və “Günəşli” yatağının dərinlikdə yerləşən hissəsinin birgə işlənməsi və neft hasilatının pay bölgüsü haqqında yeni Sazişin imzalanması, bu günlərdə Bakı-Tbilisi-Qars dəmir yolu xəttinin istismara verilməsi çox böyük tarixi hadisələrdir.
YAP Siyasi Şurasının üzvü Misirxan Vəliyev YAP Zəngilan rayon təşkilatının fəaliyyətini yüksək qiymətləndirərək partiyanın fəaliyyətindən, ölkəmizin sürətli inkişafından söz açıb: “YAP ölkəmizin siyasi-sosial həyatında həmişə ön sırada olan söz sahibi, yeni cəmiyyət quruculuğunun hərəkətverici qüvvəsi, xalqımızın milli məfkurəsinin ideoloji bazası olub. Məhz xalqın istək və arzularının əvəzsiz ifadəçisi olan partiyamız indiyə qədər keçirilmiş bütün siyasi tədbirlərdə, parlament, prezident, bələdiyyə seçkilərində, referendumlarda parlaq qələbələr qazanıb”.
Zəngilan Rayon İcra Hakimiyyətinin başçısı Ramiz Həsənov qeyd edib ki, Heydər Əliyev ideyalarına sadiq olan və bu ideyalar əsasında fəaliyyət göstərən Yeni Azərbaycan Partiyası Prezident İlham Əliyevin sədrliyi ilə böyük inkişaf yolu keçib. Bu gün YAP milli siyasi iradəni təmsil edən və xalqımızın milli maraqlarını ifadə edən vahid və avanqard siyasi qüvvəyə çevrilib: “Azərbaycan bu gün xalq-iqtidar birliyinin nəticəsində Ulu Öndərin müəyyən etdiyi strateji xətlə inamla inkişaf edir. Bu xətti əzmlə irəli aparan isə ulu öndər Heydər Əliyevin layiqli davamçısı, dünya miqyasında böyük hörmət və nüfuza malik Prezident İlham Əliyevdir”.
Milli Məclisin deputatı İmamverdi İsmayılov bildirib ki, ümummilli lider Heydər Əliyevin qurucusu olduğu Yeni Azərbaycan Partiyası ötən dövrdə şərəfli yol keçib, bu günün və gələcəyin ən böyük partiyasına çevrilib. YAP ulu öndər Heydər Əliyevin həyata keçirdiyi siyasətin avanqard qüvvəsi kimi xalqımızın qarşısında dayanan vəzifələrin həll edilməsinə layiqli töhfəsini verir.
Sonra təşkilati məsələyə baxılıb. 30 nəfərdən ibarət Şura, 18 nəfərdən ibarət İdarə Heyəti və nəzarət-təftiş qrupunun üzvləri seçilib. Nizami Mövsümov YAP Zəngilan rayon təşkilatının sədri, Əsəd Hüseynov və Həsən Ələkbərov sədrin müavinləri seçiliblər.
Sonda Prezident, Yeni Azərbaycan Partiyasının sədri İlham Əliyevə müraciət qəbul olunub.
Bölmənin digər xəbərləri
