İDMAN
Yeni Zellandiya gimnastları Bakıda təlim-məşq toplanışında iştirak ediblər
Bakı, 19 aprel, AZƏRTAC
Yeni Zellandiya Gimnastları Bakıda, Milli Gimnastika Arenasında təlim-məşq toplanışındadırlar. Bu, Milli Gimnastika Arenasının dünyada müasir idman qurğusu kimi məşhurlaşdığını göstərir.
Bədii gimnastika üzrə təlim-məşq toplanışlarında iştirak etmək üçün ölkəmizə gələn Marni Sterner və onun yetirmələri - Kelli Makdonald, Lidiya Xinqston şəhərimizin gözəlliyinə və arenada yaradılmış yüksək şəraitə valeh olduqlarını bildiriblər.
AZƏRTAC məşqçi Marni Sternerin 2005-ci ildə Bakıya ilk səfəri, Yeni Zellandiyada bədii gimnastikanın inkişafı və digər maraqlı məqamlarla bağlı Azərbaycan Gimnastika Federasiyasının saytına verdiyi müsahibəni təqdim edir.
- Səfərinizin məqsədi haqda danışa bilərsinizmi? Milli Gimnastika Arenasında təşkil olunan təlim-məşq toplanışlarından necə xəbər tutdunuz?
- Əslində bizim yerli yarışlarımız digər ölkələrə nisbətən gec başlayır. Çünki milli çempionatımız oktyabrda, daha sonra dekabrda olur. Yanvarda isə qızların yay tətilləri başlayır. Bilirəm ki, bu, digər insanları çaşdıra bilər. Qızlar tətildən qayıdarkən ciddi məşq etməyə başladılar və gördüm ki, onlar daha çox işləmək istəyirlər. Beləliklə, universiadaya qədər əlavə məşqlər təşkil etməyi qərarlaşdırdıq. Rəfiqəm Monika Quzman (Meksika yığma komandası) Bakıda, Milli Gimnastika Arenasındakı şərait, burada hər şeyin ən yüksək səviyyədə olması haqda danışmışdı. Qərara gəldik ki, ki, gimnastlarımız üçün Bakıya səfər təşkil edək. Bunun üçün mən yarışların təqvimi haqda maraqlandım. Buradan sonra biz Serbiyaya hazırlaşırıq, buna görə də texniki səviyyəni yaxşılaşdırmağa çalışırıq. Burada onlar yaxşı xalça üzərində, güclü gimnastlarla bərabər məşq edirlər.
- Milli Gimnastika Arenası haqda təəssüratlarınız necədir?
- Arena çox möhtəşəmdir. Sizin bəxtiniz gətirib. Bizim zalı görsə idiniz...
- Yeni Zellandiyada bədii gimnastika necə inkişaf edir?
- Bizim 1980-ci illərdə dünya çempionatlarında, Olimpiya Oyunlarında, 1990-cı illərdə isə dünya çempionatının fərdi proqramında iştirak edən gimnastlarımız olub. 2005-ci ildə Bakıda təşkil olunan dünya çempionatına qədər, gimnastlarımızı beynəlxalq yarışlara göndərmirdik. 2005-ci ildən yenə Olimpiya Oyunlarında, dünya çempionatlarında iştirak etmirik. Buna baxmayaraq, biz bədii gimnastika üzrə yerli yarışlar təşkil edirik.
- Yetirmələriniz qarşıdakı hansı yarışlarda iştirak etməyi planlaşdırırlar?
- K.Makdonald universiadada iştirak etməyi nəzərdə tutur. Buna görə o, öncə gələn həftə Serbiyada keçiriləcək yarışda çıxış etməlidir. Bundan sonra K.Makdonal Sofiyada və Budapeştdə keçiriləcək dünya kuboku mərhələlərində və Türkiyədə təşkil olunacaq digər yarışda iştirak edəcəyinə ümid edir. İdmançımız iyunda dünya çempionatında çıxış etməyə cəhd göstərəcək.
K.Makdonald Yeni Zellandiyada ən güclü gimnastdır. Mən 11 ildir onun məşqlərinə rəhbərlik edirəm və bu, uzun müddətdir. O, çox güclü gimnastdır, inadkar olmasına baxmayaraq, psixoloji cəhətdən də güclü və bacarıqlıdır.
Lidiyaya gəldikdə isə o, il yarım öncə başqa şəhərdən gəlib. O, Avstriyada keçiriləcək yerli çempionata hazırlaşır. Lidiya dünya kubokunda da çıxış etməyə ümid bəsləyir.
- Bakıdakı təlim-məşq toplanışları yeni nələr öyrəndiniz?
- Texniki cəhətdən yeniliklər öyrəndim, bu, bizim idmanda çox vacibdir. Sizin gimnastlarınızın 8 saat məşq etməsi məni çox təəccübləndirdi. Biz də üz ifadələri üzərində işləyirik. Əslində, mən də qızlarımıza məsləhət görürəm ki, mimikadan istifadə etsinlər. Sizin məşqçiləriniz bizə texniki cəhətdən və digər məsələlərdə kömək oldular.
- Bu, sizin Bakıya ilk səfəriniz deyil. Sonuncu səfərinizdən sonra şəhər çoxmu dəyişib? Təəssüratlarınız necədir?
- Düşünürəm ki, şəhər çox dəyişib. Mən ilk dəfə Bakıya 2005-ci ildə təşkil olunan dünya çempionatında iştirak etmək üçün gəlmişdim. Şəhəri gəzmək üçün bir-iki gün vaxtım oldu. Şəhər, xüsusən də mərkəz çox müasir olub. Əvvəllər burada yalnız milli mətbəxin nümunələrini təqdim edən restoranlar var idi. İndi isə suşi-barlar, çin və digər ölkələrin mətbəxini təqdim edən restoranlar daha çoxdur. Bakı çox maraqlı şəhərdir.
- Yenidən gəlməyi planlaşdırırsınızmı?
- Ümid edirəm ki, gələcəyik. Əgər hər şey plan üzrə getsə, biz iyulun sonu-avqustun əvvəlində bir daha gələcəyik.