SİYASƏT
Yeni əsrin lideri
Prezident İlham Əliyevin daxili və xarici siyasətinin başlıca məqsədi Azərbaycanı müasirləşdirmək, dünyanın inkişaf etmiş ölkələri sırasında görmək, beynəlxalq aləmdə nüfuz və söz sahibinə çevirməkdir.
Tarixi nailiyyətimiz olan dövlət müstəqilliyinin bərpasından 23 ildən artıq vaxt keçib. Prezident İlham Əliyevin Milli Mətbuat Günü münasibətilə jurnalistlər üçün inşa olunmuş binanın mənzillərinin paylanması mərasimində söylədiyi bu fikirləri bir daha xatırlatmaq istərdik: “Müstəqilliklə bağlı olan mövzulara daha da geniş yer verilməlidir. Müstəqilliyin üstünlükləri nədən ibarətdir. Düzdür, bu mövzularla bağlı vaxtaşırı yazılara, materiallara rast gəlmək olar. Amma mən hesab etmirəm ki, bu, kifayətdir. Çünki bu mövzu daim gündəlikdə olmalıdır. Müstəqilliyin üstünlükləri, müstəqilliyin əlamətləri və gələcək həyatımızla bağlı fikirlər, mülahizələr, fikir mübadiləsi çox vacibdir. Çünki bir daha demək istəyirəm ki, bizim nəslimizin ən böyük xoşbəxtliyi ondan ibarətdir ki, biz müstəqil dövlətdə yaşayırıq. Bizdən əvvəlki nəsillər də bu arzularla yaşamışlar. Ancaq bu arzulara çata bilməmişlər. Bizim xoşbəxtliyimiz ondadır ki, müstəqil, azad dövlətdə Azərbaycan Respublikasının vətəndaşı kimi yaşayırıq. Biz bunu qiymətləndirməliyik və müstəqilliyi hər şeydən üstün tutmalıyıq. Müstəqillik, dediyim kimi, sadəcə olaraq dövlət atributları deyildir. Müstəqillik müstəqil həyatdır, müstəqil siyasətdir, dövlətin və milli maraqların qorunmasıdır”.
Azərbaycanın dövlət müstəqilliyinin qorunması və möhkəmləndirilməsi dahi şəxsiyyət Heydər Əliyevin adı ilə bağlıdır. 1993-cü ildə xalqın təkidli tələbi ilə hakimiyyətə qayıdan ulu öndər Heydər Əliyev uğurlu daxili və xarici siyasəti ilə Azərbaycanı həmin dövrün bəlalarından, çətinliklərindən xilas etdi, bir sözlə, dünya xəritəsində bir müstəqil dövlət olaraq varlığını təsdiqlədi. Məhz bu gün Azərbaycan möhkəm təməl üzərində biri-birindən əhəmiyyətli uğurlara imza atır, yeni-yeni hədəfləri gerçəkləşdirməklə inkişaf etmiş ölkələr sırasında addımlamaq istəyini ortaya qoyur.
2003-cü ildən sonrakı dövrün böyük yolun davamı kimi dəyərləndirilməsi də səbəbsiz deyil. Dövlətimizin başçısı 2003-cü ildə keçirilən andiçmə mərasimində bu inamı böyük qətiyyətlə ifadə etmişdi: “Azərbaycan gələcəkdə çox zəngin və qüdrətli ölkəyə çevriləcəkdir. Neft strategiyasını davam etdirərək, qısa müddət ərzində ölkəmizi hərtərəfli inkişaf etdirəcəyik”. Bu fikirlərin davamı olaraq o da qeyd edilmişdir ki, bizdə bütün imkanlar vardır - təbii sərvətlər, insan potensialı, ən önəmlisi, xalqın iradəsi. Biz hamımız birləşərək və bir nöqtəyə vuraraq Azərbaycanı zəngin, qüdrətli dövlətə çevirəcəyik.
Proqram xarakterli bu fikirlər növbəti illərdə görüləcək işlərə aydınlıq gətirdi. Dövlətimizin başçısı prezidentliyinin ilk dövründə (2003-2008) hər vədinin arxasında konkret əməli iş dayandığını bir daha nümayiş etdirdi. Prezident İlham Əliyev qarşıya qoyduğu məqsədə yüksək səviyyədə nail olmaq üçün regionların malik olduğu potensialdan səmərəli istifadəni ön plana çəkdi. Regional inkişaf proqramı qəbul olundu və 2004-2008-ci illər ərzində 600 min yeni iş yerinin açılması qarşıya mühüm vəzifə kimi qoyuldu. Artıq sənədin icrası başa çatdıqda bu rəqəm 700 mini ötmüşdü. Bu onu göstərdi ki, məqsəd uğurlara nail olmaq üçün stimulverici amildir. Prezident İlham Əliyevin jurnalistlərə ilk müsahibəsində vurğuladığı kimi, zaman dəyişir, qarşıya yeni-yeni tələblər qoyulur. Məhz bu tələblər yeniləşməni, modernləşməni daha da aktuallaşdırır. Birinci proqramın uğurlu icrası ikinci sənədin qəbulunu zərurətə çevirdi. Artıq cari ildən üçüncü Dövlət Proqramının icrasına başlanılıb. Regional inkişaf proqramlarının icrası nəticəsində hazırda yeni iş yerlərinin sayı bir milyon 300 mindən çoxdur. Bunların 900 mini daimi iş yeridir. Son on ildə iqtisadiyyat 3,4 dəfə, sənaye istehsalı 2,7 dəfə, kənd təsərrüfatı 1,5 dəfə artıb. Yoxsulluq 49 faizdən 5,3 faizə enib. İşsizlik 5 faiz təşkil edir. Ölkəmizə 160 milyard dollar investisiya cəlb olunub. Təkcə cari ilin ötən dövründə iqtisadiyyata 19 milyard dollar sərmayə qoyulub ki, bunun da 11 milyard dolları daxili sərmayədir. Müqayisə üçün qeyd edək ki, 2003-cü ildə ölkə iqtisadiyyatına yatırılan sərmayələrin həcmi 15 milyard dollar təşkil edirdi. Dövlət başçısı İlham Əliyev bu faktı çıxışlarında daim diqqətə çatdırır: “Heç kəsə sirr deyil ki, sərmayələr, xüsusilə xarici sərmayələr sabitlik olan ölkələrə qoyulur. Çünki hər bir sərmayədar o qədər də risk etmək istəmir. Bu baxımdan da Azərbaycan sərmayə qoyuluşu üçün çox münasib ölkədir. Azərbaycanda hökm sürən sabitlik, ictimai-siyasi asayiş sərmayələrin cəlb olunması istiqamətində böyük addımlar atmağa imkan veribdir”.
Göründüyü kimi, Azərbaycanda sabitlik hökm sürür, ulu öndər Heydər Əliyevin müəllifi olduğu neft strategiyasının uğurlarını yaşamaqla dünyanın diqqət mərkəzində dayanır. Azərbaycanın etibarlı tərəfdaş kimi qəbul olunmasında da iqtisadi uğurlar, sabitlik, eyni zamanda demokratik inkişafı həlledici rol oynayır. Ulu öndər Heydər Əliyev bildirirdi ki, sabitlik, iqtisadi tərəqqi, ictimai-siyasi əmin-amanlıq olmasa, təbii ki, demokratiyanın ömrü uzun ola bilməz. Son on bir ildə bu siyasətin Prezident İlham Əliyev tərəfindən uğurlu davamı Azərbaycanın demokratiya təcrübəsinin digər ölkələrə nümunə göstərilməsi ilə təsdiqlənir. İstər insan hüquqlarının qorunması, azad mətbuatın inkişafı, istər vətəndaşlara sərbəst seçim hüququnun verilməsi, çoxpartiyalı sistemin yaradılması, istərsə də seçkilərin beynəlxalq standartlara uyğun keçirilməsi istiqamətində atılan addımlara diqqət yetirsək, bir məqsəd, amal özünü təsdiqləyir ki, atılan bu addımlar Prezident İlham Əliyevin vurğuladığı kimi, hansısa dövlətə, təşkilata xoş gəlmək üçün deyil, Azərbaycanın uğurlu gələcəyi üçündür. Beynəlxalq əməkdaşlıq fonunda qəbul olunan qanunlara edilən əlavə və dəyişikliklər, yeni qanunların qəbul olunması Azərbaycanın bu gününə və gələcəyinə xidmət göstərir.
Dünyaya inteqrasiya siyasətini həyata keçirən Azərbaycan beynəlxalq əməkdaşlığa bütün sahələrdə önəm verir. Məhz ulu öndər Heydər Əliyevin qətiyyəti sayəsində 1994-cü ilin 20 sentyabrında “Əsrin müqaviləsi”nin imzalanması ilə beynəlxalq əməkdaşlığa açılan yol bu gün uğurla davam edir. Cari ilin 20 sentyabrında “Əsrin müqaviləsi”nin 20 illiyində “Cənub” qaz dəhlizinin təməlinin qoyulması da bunun bariz nümunəsi, eyni zamanda 20 ildə görülən işlərin zirvəsi kimi dəyərləndirildi. Vaxtilə çoxlarına əfsanə kimi görünən BTC və BTƏ neft-qaz kəmərlərinin istifadəyə verilməsi Azərbaycan dövlətinin qətiyyətini, iradəsini dünyaya nümayiş etdirdi. Azərbaycan bu gün təşəbbüsləri gerçəkliyə çevirən ölkə kimi nüfuz qazanıb və beynəlxalq münasibətlər sistemində yerini və rolunu möhkəmləndirib.
Təbii ki, Azərbaycanın uğurlarından bəhs edərkən ulu öndər Heydər Əliyevin uzaqgörənliklə yaratdığı Dövlət Neft Fondunun fəaliyyətini xüsusi qeyd etməliyik. Prezident İlham Əliyev 2003-cü ildə keçirilən andiçmə mərasimində gələcəyə bəslədiyi inamı da ifadə etmişdir: “Gələcəkdə Azərbaycan öz iqtisadi potensialını inkişaf etdirdikcə, Azərbaycanda yeni neft yataqları kəşf olunandan sonra, BTC neft kəməri istismara veriləndən sonra, əlbəttə, ölkəmizin imkanları daha da artacaqdır. Hər il Azərbaycana milyardlarla dollar vəsait daxil olacaqdır. Bu vəsaitlə Azərbaycanda bütün sahələrdə quruculuq işləri aparılacaq, sosial problemlərin həlli istiqamətində böyük işlər görüləcəkdir”. 2003-cü ildə aktivləri 800 milyon dollar olan Dövlət Neft Fondunda bu gün toplanan vəsaitlərin həcmi 36 milyard dollardan çoxdur. Dövlət siyasətinin prioritetlərini müəyyənləşdirən Fondun vəsaitləri hesabına reallaşdırılan sosial-iqtisadi layihələr Azərbaycanın hərtərəfli inkişafına xidmət edir.
Güclü sosial siyasətlə tamamlanan iqtisadi islahatların zamanın tələblərinə uyğunlaşdırılması Azərbaycanı dünyaya sosial dövlət kimi tanıdır. Vətəndaş amilinin dövlət siyasətinin önündə saxlanılması ölkəmizin ev sahibliyi etdiyi beynəlxalq əhəmiyyətli tədbirlərdə, həmçinin beynəlxalq qurumların hesabatlarında təqdir olunur. Prezident bildirir ki, həyata keçirilən uğurlu sosial-iqtisadi islahatlar bir məqsədə xidmət edir: Ölkənin hərtərəfli inkişafı təmin edilsin, insanlar daha rahat və yüksək rifah şəraitində yaşasın. Bir əsas məqamı da qeyd etməliyik ki, 2009-cu ildə keçirilən referendumda Konstitusiyanın “Dövlətin ali məqsədi” maddəsinə edilən əlavə dövlətin siyasətində insan amilinə verilən önəmi bir daha təsdiqlədi.
Azərbaycanın davamlı uğurlarına daim öz töhfələrini verən ulu öndər Heydər Əliyevin yaradıcısı, Prezident İlham Əliyevin sədri olduğu Yeni Azərbaycan Partiyasının da fəaliyyət istiqamətlərindən biri insan amilinə dəyərdən qaynaqlanan mühüm əhəmiyyətli layihələrdir. Məhz öz fəaliyyətində dövlətə, xalqa xidməti əsas tutmasının nəticəsidir ki, bu gün Yeni Azərbaycan Partiyasının sıralarında 640 mindən artıq üzv birləşib. Bütün fəaliyyəti dövründə ölkənin davamlı inkişafı, əhalinin sosial rifahının daha da yaxşılaşdırılması başlıca məqsəd olub. Məhz bu səbəbdən 2011-ci ildə Yeni Azərbaycan Partiyasının təşkilatçılığı ilə keçirilən “Modernləşmə siyasəti: yeni iqtisadi və sosial çağırışlar” mövzusunda beynəlxalq konfrans partiyanın məqsəd və məramına, ölkədə və beynəlxalq aləmdə nüfuzuna işıq saldı. Konfransda əsas diqqət günün aktual problemi olan yoxsulluqla mübarizəyə yönəldilərək bildirildi ki, Azərbaycanın bu sahədə təcrübəsi digər ölkələrə nümunədir. Bu fikir daha çox səsləndirildi ki, kasıb yox, yaxşı idarə olunmayan ölkələr var. Dövlətin düşünülmüş siyasəti sayəsində Azərbaycan qarşılaşdığı çətinliklərdən uğurla çıxır, hər sahədə əldə etdiyi nəticələr növbəti uğurlara yol açır. Beynəlxalq maliyyə qurumlarının Azərbaycan üçün verdiyi proqnozlar hər zaman özünü doğruldur. Asiya İnkişaf Bankının ölkəmizlə bağlı proqnozunu xatırladaq. Qurumun Azərbaycandakı daimi nümayəndəliyi bildirir ki, Azərbaycan iqtisadiyyatı son illər ərzində sürətlə inkişaf edir, 2020-ci ildə ÜDM-in həcminin 130 milyard dollara çatacağı gözlənilir. Ölkə infrastrukturunun inkişafına yatırılan investisiyanın həcmi isə 40 milyard dollara bərabər olacaq.
Ölkə iqtisadiyyatının aynası dövlət büdcəsidir. Son on bir ildə dövlət büdcəmizin 20 dəfədən çox artması uğurlu sosial-iqtisadi islahatlara əsaslanır. Prezident İlham Əliyev bildirir ki, qarşıdakı ilin büdcəsi əvvəlki ildən daim kəmiyyət və keyfiyyət baxımından üstün olmalıdır. Təhlillər fonunda dövlət büdcəmizin ildən-ilə artdığının şahidi oluruq. Artıq cari ilin dövlət büdcəsi də təsdiqlənib. Gələn ilin dövlət büdcəsinin gəlirləri 19 milyard manat, xərcləri isə 21 milyard manat nəzərdə tutulub. Azərbaycan Qafqaz regionunda ən güclü iqtisadiyyata malik olduğunu nümayiş etdirir. Qeyd edək ki, ölkəmiz region iqtisadiyyatının 85 faizinə sahibdir.
Ölkəmizin iqtisadi və siyasi mövqeyini möhkəmləndirməsi ən ağrılı problemimiz olan Ermənistan-Azərbaycan, Dağlıq Qarabağ münaqişəsinin həllinə də yol açır. Azərbaycanın haqlı mövqeyini dəstəkləyən dövlətlərin və təşkilatların sayının artması Prezident İlham Əliyevin qətiyyət və səyinin nəticəsidir. Diplomatik mübarizədə qələbə qazanan ölkəmizin münaqişənin həllində hərb siyasətini seçdiyi təqdirdə də qələbəsi şəksizdir. Bu gün tam əminliklə deyə bilərik ki, Azərbaycanın çox güclü, qüdrətli, beynəlxalq standartlara cavab verən ordusu var.
Azərbaycanın 2011-ci ildə 155 ölkənin dəstəyini qazanaraq BMT Təhlükəsizlik Şurasına qeyri-daimi üzv seçilməsi də beynəlxalq dəstəyin yüksək səviyyədə olduğunun göstəricisidir. Beynəlxalq Humanitar Forumlar üçün ideal məkan seçilən Azərbaycan ötən il Ümumdünya İqtisadi Forumuna ev sahibliyi etdi. Forumdakı çıxışlarda bu fikir xüsusi qeyd olundu ki, tədbirin Bakıda keçirilməsi bir tərəfdən Azərbaycanın beynəlxalq aləmdə artan nüfuzunun, digər tərəfdən həyata keçirdiyi iqtisadi islahatlar nəticəsində əldə olunan uğurlara dəyərin təzahürüdür.
Bu gün böyük inam hissi ilə qeyd edə bilərik ki, Azərbaycan beynəlxalq aləmdə yerini və rolunu möhkəmlətməklə yanaşı, öz milli mənəvi dəyərlərini, tarixini, mədəniyyətini və incəsənətini yüksək səviyyədə qoruyan və təbliğ edən ölkələr sırasındadır. Müxtəlif mədəniyyətlərin və sivilizasiyaların qovuşuğunda yerləşən ölkəmiz eyni zamanda dünyada idman ölkəsi kimi də tanınır. Avropa Olimpiya Komitəsinin 2015-ci ildə birinci Avropa Oyunlarının Bakıda keçirilməsi ilə bağlı qərarı da buna bariz nümunədir. Azərbaycanın ev sahibliyi etdiyi tədbirlərin hər biri mahiyyəti və ölkəmizlə bağlı həqiqətlərin dünyaya təqdimatı baxımından xüsusi əhəmiyyət kəsb edir.
Qeyd etdiklərimiz son on ildə əldə olunan uğurlara qısa baxışdır. Təbii ki, uğurlarımızın miqyası o qədər genişdir ki, onları bir yazıda əhatə etmək qeyri-mümkündür. Ümumiləşdirilmiş fikir budur ki, uğurların davamlılığının təmin olunması dövlətin siyasətində prioritet məsələdir. Azərbaycanın 20 illik müstəqillik tarixində qazandığı uğurların fonunda qarşıdakı on ilin prioritetlərini müəyyənləşdirən dövlət başçısı İlham Əliyevin Sərəncamı ilə təsdiqlənən “Azərbaycan 2020: gələcəyə baxış” İnkişaf Konsepsiyası bu məqsədə xidmət edir. Azərbaycanı yaxın zamanlarda inkişaf etmiş ölkələr sırasında görmək, yüksək gəlirli ölkəyə çevirmək başlıca hədəfdir. Ümumi daxili məhsulun qarşıdakı on ildə daha 2 dəfə artırılması da əsas məqsəd kimi qarşıya qoyulur. “Azərbaycan 2020: gələcəyə baxış” İnkişaf Konsepsiyası davamlı inkişaf çağırışları üçün yol xəritəsi kimi dəyərləndirilir. Dünya Bankının təmsilçiləri bildirirlər ki, Azərbaycanda 2020-ci ilədək ÜDM-in iki dəfə artırılması böyük çağırışdır. Bunu etmək üçün ölkə kifayət qədər güclü potensiala malikdir və inanırıq ki, Azərbaycan bu yolda ciddi uğur qazanacaq. Azərbaycan bütün dünyaya nümunə ola biləcək yeni geoiqtisadi regional güc mərkəzi modelini yaradıb. Ölkəmizin iqtisadi inkişaf dinamikası əvvəlcə təbii resurslara əsaslanırdısa, hazırda iqtisadi şaxələndirmənin nəticəsi olaraq qeyri-neft sektoru üstün artım tempinə malikdir.
Uğurlarımız bu gerçəkliyi təsdiqləyir ki, Prezident İlham Əliyevin daxili və xarici siyasətinin başlıca məqsədi Azərbaycanı müasirləşdirmək, dünyanın inkişaf etmiş ölkələri ilə bir səviyyəyə yüksəltmək, beynəlxalq aləmdə nüfuz və söz sahibinə çevirməkdir. Dünya dövlətlərinin, təşkilatlarının rəhbərləri Azərbaycanın siyasi səhnəsində Prezident İlham Əliyevə alternativ görmür. Azərbaycana, onun Prezidentinə bu inamı qazandıran əsas amil düzgün qurulan siyasət və bu siyasətə xalqın dəstəyidir. Xalqın inamının böyük olduğu ölkədə Prezidentə milyonların sevgisi şəksizdir. 2013-cü ildə keçirilən andiçmə mərasimində Prezident İlham Əliyevin söylədiyi bu fikirlər gələcək barədə aydın təsəvvür yaradır: “Bizim siyasətimiz müstəqilliyin möhkəmləndirilməsinə istiqamətləndirilibdir. Bu gün Azərbaycan müstəqil dünya miqyasında özünə layiq yerini tuta bilibdir. Azərbaycan daha da güclü ölkə olmalıdır. Biz qüdrətli Azərbaycan dövləti qururuq və əminəm ki, quracağıq”.
Azərbaycanın uğurlarının bələdçisi olan, Prezident İlham Əliyevin rəhbərliyi altında sıralarını getdikcə möhkəmləndirən Yeni Azərbaycan Partiyası bu inkişafa, tərəqqiyə dəstək olmaq üçün ciddi səylər göstərir. Bu gün əsas şüarı “Rifah və quruculuq naminə” olan Yeni Azərbaycan Partiyasının ölkəmizdə keçirilən bütün seçkilərdə qələbəsini təmin edən də Azərbaycanın uğurlarıdır. Ölkəmizi qarşıdakı illərdə daha möhtəşəm uğurlar gözləyir.
Vüqar Rəhimzadə
YAP Siyasi Şurasının üzvü, “İki sahil” qəzetinin
baş redaktoru, Əməkdar Jurnalist