Lerik, 1 sentyabr, Bağır Əliyev, AZƏRTAC

Mədəniyyət və Turizm Nazirliyinin həyata keçirdiyi “Yeni söz karvanı” layihəsi çərçivəsində növbəti tədbir Lerikdə keçirilib.

AZƏRTAC xəbər verir ki, Lerik Rayon Mədəniyyət evində keçirilən mərasimi Heydər Əliyev Mərkəzinin direktoru Hüsaməddin Abbasov açıb. Bildirilib ki, Mədəniyyət və Turizm Nazirliyi tərəfindən 2008-ci ildən başlayaraq hər il ənənəvi olaraq respublikanın şəhər və rayonlarında tanınmış şair və yazıçıların, ədiblərin və muğam ifaçılarının iştirakı ilə keçirilən tədbirlər insanların geniş rəğbətini qazanıb. Məqsəd xalqımızın mədəniyyətinin, ədəbiyyatının təbliği ilə yanaşı, ölkənin regionlarında yaşayan insanların respublikanın yaradıcı ziyalıları ilə birbaşa ünsiyyətini təmin etmək, yeni ədəbi nümunələrlə tanış olmasına imkan yaratmaqdır.

Şair Çingiz Əlioğlu çıxışında Prezidenti İlham Əliyevin rəhbərliyi ilə sürətlə inkişaf edən respublikamızın, o cümlədən regionlarımızın gündən-günə gözəlləşdiyini, tikinti-quruculuq işlərinin vüsət aldığını, bu inkişafın Lerik rayonunda da yüksək səviyyədə olduğunu bildirib.

Sonra tanınmış şairlər Əsəd Cahangir, Əhməd Qəşəmoğlu, Yusif Nəğməkar çağdaş Azərbaycan ədəbiyyatının inkişaf tendensiyaları haqqında fikirlərini bildirib, şerlərini oxuyublar. Tədbir iştirakçılarının arzusu ilə əsərləri dünyanın bir çox ölkələrində nəşr olunmuş şair Çingiz Əlioğlu yaradıcılığından bəzi nümunələri təqdim edib.

Tədbirdə Heydər Əliyev Fondunun prezidenti Mehriban xanım Əliyevanın qayğı və diqqəti ilə əhatə olunan muğam sənəti, keçirilən muğam festivalları haqqında məlumat verilib, muğamın Azərbaycan xalqının milli sərvəti olduğu diqqətə çatdırılıb. Muğam müsabiqəsinin iştirakçıları olan gənc ifaçılar Sədəf Budaqova və Sərxan Bünyadzadə bir-birindən maraqlı musiqi nömrələri ifa ediblər.

Mədəniyyət və Turizm Nazirliyinin əməkdaşı Elbəy Əli tədbirin yüksək səviyyədə təşkilinə görə minnətdarlığını bildirib.

Rayon icra hakimiyyətinin başçısı Rövşən Bağırov çızxışında Prezident İlham Əliyevin rəhbərliyi ilə son illər bütün sahələrdə olduğu kimi, xalqımızın milli adət-ənənələrinin, milli-mənəvi dəyərlərinin təbliği və inkişafı istiqamətində həyata keçirilən tədbirlər barədə danışıb, Bakının beynəlxalq mədəniyyət mərkəzinə çevrildiyini, hər il dünya səviyyəli beynəlxalq elmi, mədəni, dini forumların ölkəmizdə keçirilməsinin bunun əyani təsdiqi olduğunu vurğulayıb.

R.Bağırov Qəbələdə, Şəkidə, Masallıda və digər regionlarda hər il ənənəvi olaraq beynəlxalq musiqi festivallarının, ötən il ilk dəfə olaraq Lerik rayonunda uzunömürlülərin yaradıcılıq və “Plov” festivallarının keçirilməsini dövlətimizin başçısının mədəniyyətimizin inkişafına, milli-mənəvi dəyərlərimizin, adət-ənənələrimizin təbliği və qorunmasına göstərdiyi yüksək qayğı və diqqətin nəticəsi kimi dəyərləndirib.