İQTİSADİYYAT
Yeni tədris ilinin ilk günü Bakı Nəqliyyat Agentliyi gücləndirilmiş iş rejimində çalışacaq
Bakı, 14 sentyabr, Elvin Camalov, AZƏRTAC
2016-2017-ci tədris ilinin başlanması ilə əlaqədar yollarda nəqliyyat vasitələrinin və piyadaların sıxlığının artacağı ehtimalını nəzərə alaraq Bakı Nəqliyyat Agentliyi sentyabrın 15-də gücləndirilmiş iş rejimində fəaliyyət göstərəcək.
AZƏRTAC xəbər verir ki, bu barədə Bakı Nəqliyyat Agentliyinin mətbuat xidmətinin rəhbəri Nuridə Allahyarova deyib.
O bildirib ki, məqsəd - ilk dərs günü xüsusən də səhər saatlarında paytaxt yollarında yarana biləcək avtomobil sıxlığının qarşısını almaq, avtonəqliyyat vasitələrinin təhlükəsiz və intensiv hərəkətini təmin etməkdir.
N.Allahyarovanın sözlərinə görə, bunun üçün paytaxtın küçə və prospektlərinə, xüsusən də ali və orta təhsil müəssisələrinin yerləşdiyi ərazilərə nəzarət gücləndiriləcək. Bu ərazilərdə avtomobillərin dayanmaması, sıxlığın və tıxacların yaranmaması üçün işıqforlarda “yaşıl dalğa” tətbiq ediləcək.
“Bununla yanaşı səhər saatlarında yarana biləcək sərnişin sıxlığının minimuma endirilməsi və əhalinin təhsil müəssisələrinə, iş yerlərinə vaxtında rahat çatmasını təmin etmək üçün Bakı şəhərində müntəzəm sərnişindaşınma ilə məşğul olan daşıyıcı şirkətlərə xüsusi göstəriş verilib. Göstərişə əsasən sərnişin avtobuslarının hərəkət intervalı mümkün qədər azaldılmalı, zərurət yarandığı halda günün pik saatlarında avtonəqliyyat vasitəsinin sayı artırılmalıdır”, - deyə N.Allahyarova vurğulayıb.
Mətbuat xidmətinin rəhbəri qeyd edib ki, Bakı Nəqliyyat Agentliyi, həmçinin sürücülərdən xahiş edir ki, təhsil müəssisələrinə yaxın, bitişik ərazilərdə avtomobillərin park edilməsi qaydalarına və sürət həddinə ciddi əməl etsinlər.