CƏMİYYƏT
Yevlaxda icbari tibbi sığorta ilə bağlı keçirilən səyyar kurslar başa çatıb
Bakı, 8 noyabr, AZƏRTAC
Səhiyyə Nazirliyinin təşəbbüsü ilə Əziz Əliyev adına Azərbaycan Dövlət Həkimləri Təkmilləşdirmə İnstitutunun (ADHTİ) ailə təbabəti kafedrası icbari tibbi sığortanın tətbiqi ilə bağlı Yevlaxda yerli mütəxəssislər üçün səyyar kurslar təşkil edib.
İnstitutdan AZƏRTAC-a bildirilib ki, kurslarda proqrama uyğun olaraq ADHTİ-nin əməkdaşları mühazirələr oxuyub, praktiki məşğələlər aparıblar. Mövzunu daha yaxşı qavramaq üçün həkimlərə audio-vizual üsullardan başqa, xüsusi mulyaj və trenajorlardan istifadə etmək imkanı yaradılıb. Məşğələlər zamanı müdavimlər təcrübi vərdişlərə yiyələniblər.
Kurslar başa çatdıqdan sonra imtahandan müvəffəqiyyətlə keçmiş dinləyicilərə müvafiq sertifikatlar verilib.
Qeyd edək ki, Nazirlər Kabineti yanında İcbari Tibbi Sığorta üzrə Dövlət Agentliyi aparılan araşdırmalar və əlaqədar dövlət qurumları ilə müzakirələr nəticəsində Mingəçevir şəhərini və Yevlax rayonunu icbari tibbi sığortanın tətbiqi üçün pilot ərazilər seçib. Pilot layihənin tətbiqində məqsəd əhalini və tibb müəssisələrini icbari tibbi sığorta sisteminə keçidə hazırlamaq, tibbi xidmətin maliyyələşməsində yeni mexanizmlərin tətbiqini sınaqdan keçirməkdir.