CƏMİYYƏT


Yoqurt alarkən onun saxlanma müddətinə diqqət edilməlidir

Bakı, 5 iyul, AZƏRTAC

Süd məhsulları qrupuna daxil olan yoqurt zülal və kalsiumla zəngin olan qida məhsuludur. Yoqurtlar müxtəlif formalarda südlü, kərəli, meyvəli, dietik və s. formalarda olurlar. Onu hər gün 200 qramdan çox olmamaq şərtilə yemək məsləhətdir. Yoqurtun qəbulu immun sistemini gücləndirir və sümüklərin möhkəmlənməsinə kömək edir.

Yoqurt istehsalı nəzərdə tutulmuş texniki və texnoloji qaydalara, sanitar norma və qaydaları gözləmək şərtilə standartın tələblərinə uyğun olaraq hazırlanmalıdır. Yoqurt sadə, şirinləşdirilmiş və meyvə təamları əlavə edilməklə istehsal olunur. Yoqurtlardan uşaq qidalarının hazırlanmasında da istifadə edilir. İstehsal müəssisəsindən onlar 4±2ºC temperaturda çıxmalıdır.

Yoqurt dövlət orqanlarının icazəsi ilə qablaşdırma materiallarına müxtəlif tutumlarda yerləşdirilir. Onu məhsulun saxlanmasını təmin edəcək səviyyədə qablaşdırırlar. O, kombinə olunmuş materiallardan kağız paketlərdə, qutularda, fincanlarda və s. qablaşdırılır və markalanır. Markalanarkən məhsulun etiketində istehsalçının adı və ünvanı, əmtəə nişanı, saxlama şəraiti, yararlılıq müddəti, məhsulun xalis və tara ilə çəkisi, standartı, uyğunluğunu təsdiq edən məlumat öz əksini tapmalıdır.

İqtisadiyyat Nazirliyinin Antiinhisar Siyasəti və İstehlakçıların Hüquqlarının Müdafiəsi Dövlət Xidmətindən AZƏRTAC-a bildiriblər ki, yoqurtun tez xarab olan məhsulların daşınması ilə bağlı qaydalara uyğun olaraq xüsusi nəqliyyat vasitələrində daşınması təmin olunmalı və bu nəqliyyat vasitələrinin üstü bağlı olmalıdır.

Ticarət şəbəkəsindən bu məhsulu əldə edərkən mütləq onların saxlama müddətinə diqqət yetirin. Nəzərə alın ki, bu və ya digər növ yoqurtun saxlama müddəti istehsalçı tərəfindən müəyyən edilir və məhz bu müddət ərzində onun keyfiyyətinə təminat verilir. Adətən yoqurtların saxlama müddəti 5-7 gün olur. Lakin bəzi növ yoqurtlar düzgün saxlama şəraitində 30 günədək qala bilərlər.

Ticarət şəbəkələrində yoqurtlar soyuducuda saxlanmalıdırlar. Bu məhsullar üçün optimal saxlanma temperaturu müsbət 4-6ºC-dir. Yoqurtdan olan məhsullara gəldikdə isə onlar müsbət 4-25ºC temperaturda saxlanıla bilər. Alındıqdan sonra ev şəraitində də yoqurtları qeyd olunan temperatur rejimində saxlamaq məsləhətdir. Soyuducunun qapısındakı gözlər bu məhsulları saxlamaq üçün uyğun deyil.

Tez xarab olan məhsullardan olduğuna görə yoqurt alarkən, xüsusilə onların saxlanma müddətinə, qabının əzilməsi və cırılmasına, onların saxlanma şəraitinə və temperaturuna diqqət edin. Nəzərə alın ki, keyfiyyətsiz yoqurtların istehlakı sizin və uşaqlarınızın sağlamlığı üçün təhlükəlidir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.