YouTube yeni texnologiyalar sayəsində ekstremizmlə bağlı videoların 98 faizini aşkarlayıb
Bakı, 17 yanvar, AZƏRTAC
YouTube kompaniyası yeni texnologiyaların tətbiqi sayəsində ekstremizmlə bağlı videoçarxların 98 faizini aşkarlaya bilib.
AZƏRTAC RİA Novosti informasiya agentliyinə istinadla xəbər verir ki, bunu şirkətin dövlət strukturları ilə əlaqələr üzrə direktoru xanım Cuniper Dauns deyib. O, ABŞ Senatının ticarət komitəsindəki dinləmələrdə çıxışı zamanı bildirib ki, YouTube son aylar ekstremizm elementlərinə malik videoları avtomatik rejimdə müəyyənləşdirməyə imkan verən texnologiyalar tətbiq edib. Bu da mütəxəssislərin əvvəlkinə nisbətən beş dəfə çox materialı öyrənməsinə şərait yaradıb.
“Hazırda biz alqoritmlərimiz hesabına ekstremizmlə bağlı 98 faiz videonu aşkarlaya bilmişik”, - Dauns belə deyib.
Twitterin dövlət strukturları ilə əlaqələr üzrə direktoru Karlos Monye də həmin dinləmələrdə məlumat verib ki, “ekstremizmlə bağlı akkauntların 75 faizini onlarda ilk məlumatlar peyda olanadək aşkarlamaq və ləğv etmək mümkün olub”.
Bölmənin digər xəbərləri
