Qusar, 18 may, Elxan Yusifli, AZƏRTAC

Mayın 18-də Azərbaycan Dövlət “Yuğ” Teatrı qusarlı tamaşaçılara yazıçı Pərvin Nurəliyevanın pyesi əsasında hazırlanmış “Sonuncu” adlı tamaşanı təqdim edib.

AZƏRTAC-ın bölgə müxbiri xəbər verir ki, “Sərhədsiz teatr” III Şəki Beynəlxalq Teatr Festivalı çərçivəsində təqdim olunan tamaşa Qusar Mədəniyyət Mərkəzinin səhnəsində oynanılıb.

Xalq Artisti Ramiz Həsənoğlunun quruluşu əsasında hazırlanan tamaşada rolları Əməkdar Artist Fərhad İsrafilov, aktyorlar Hikmət Rəhimov və Ləman Novruzova ifa edib.

Səhnə əsərində qoca və tənha aktyor onun şərəfinə keçirilən benefisdən sonra yatıb teatrda qalır. Bu zaman onun yatdığı məkana gənc teatrşünas gəlir və onların arasında teatr, aktyorun keçmişi, oynadığı rollar, uğurlu tamaşalar, yaşadığı gənclik illəri, nakam məhəbbəti, sənətə vurğunluğu haqqında söhbətlər başlayır.

“Azərbaycan teatrı 2009-2019-cu illərdə” Dövlət Proqramı çərçivəsində reallaşan festival ümummilli lider Heydər Əliyevin anadan olmasının 95, Azərbaycan Xalq Cümhuriyyətinin yaradılmasının 100 və Azərbaycan milli peşəkar teatrının 145 illiyinə həsr olunub.

Mayın 19-dək davam edəcək festivalda ölkə teatrları ilə yanaşı, İran, Gürcüstan, Kolumbiya və Rusiyanın tanınmış teatr kollektivləri də iştirak edirlər.

Festival iki istiqamət üzrə - milli və beynəlxalq mərhələdə keçirilir. Milli proqram çərçivəsində Azərbaycanın 19 teatr kollektivi mayın 18-dək respublikanın müxtəlif bölgələrində tamaşalar nümayiş etdirir.