Bakı, 5 avqust, AZƏRTAC

Yüksək texnologiyalar sahəsində innovativ düşüncəyə malik insanların, xüsusilə gənclərin uğur əldə etmələrində texnoparkların böyük rolu var. Məhz texnoparklar mövcud ideyanı layihəyə çevirmək, həmin layihəni inkişaf etdirərək bazara çıxarmaq yollarını startapçılara göstərərək onları doğru istiqamətləndirirlər.

Bu fikri Bakıda səfərdə olan Türkiyənin Erciyes Texnoparkının baş direktoru Bilgin Yazlık Azərbaycan Milli Elmlər Akademiyası (AMEA) Yüksək Texnologiyalar Parkının (YTP) əməkdaşlarına keçdiyi təlimdə səsləndirib.

AMEA-dan AZƏRTAC-a bildirilib ki, təlim zamanı texnoparkın idarə edilməsi, startapçıların maarifləndirilməsi, investisiyaların təşviqi, investorlarla sahibkarların əlaqələrinin genişlənməsi mövzularına toxunulub. Erciyes Texnoparkının Biznes İnkubasiya Mərkəzi olan SERA-nın qurulması, fəaliyyəti, mövcud iş prosesi barədə ətraflı məlumat verilib. Qeyd edilib ki, 217 min kvadratmetr açıq, 30,5 min kvadratmetr qapalı əraziyə sahib texnoparkda 203 bina mövcuddur. Buradakı firmaların əksəriyyəti öz fəaliyyətlərini beynəlxalq, iqtisadi münasibətlər və texnoloji sahələr üzərində qurublar. Eyni zamanda, enerji, kimya və qida sənayesi ilə məşğul olan şirkətlər də var.

B.Yazlık ikigünlük təlim zamanı startapçıların layihələrini biznesə çevirmək üçün ehtiyacı olduqları mövcud qaynaqları düzgün araşdırmağın yollarını göstərib. O, prototipi əldə etdikdən sonra pilot layihə olaraq istehsal prosesinin texnoparkların öhdəsinə düşdüyünü bildirib. 2005-ci ildən fəaliyyət göstərən Erciyes Texnoparkının bu sahədə keçdiyi təcrübəni nümunə göstərərək, təmsil etdiyi qurumun Türkiyənin beşinci böyük texnoparkı olduğunu bildirib.

Bakıya səfəri zamanı AMEA Yüksək Texnologiyalar Parkı ilə yaxından tanış olan qonağa texnoparkda yaradılan şərait, imkanlarla bağlı geniş məlumat verilib. AMEA YTP-nin direktoru Vüqar Babayev Erciyes Texnoparkı ilə arasında daha öncə yaradılan əməkdaşlıq əlaqələrinin davamı olaraq rəhbərlik etdiyi YTP ilə səmərəli əməkdaşlığın qurulmasının vacibliyini vurğulayıb.