MƏDƏNİYYƏT


Yunus Əmrə Mərkəzinin direktoru Tərcümə Mərkəzində

A+ A

Bakı, 8 fevral, AZƏRTAC

Fevralın 8-də Yunus Əmrə İnstitutu Bakı Türk Mədəniyyət Mərkəzinin direktoru İbrahim Yıldırım Azərbaycan Respublikasının Nazirlər Kabineti yanında Tərcümə Mərkəzində olub.

Tərcümə Mərkəzindən AZƏRTAC-a bildirilib ki, görüşdə qurumun Türkiyə ədəbiyyatı üzrə gördüyü işlərdən – əsərləri zaman-zaman Azərbaycan dilinə çevrilmiş və qurumun “Xəzər” dünya ədəbiyyatı jurnalında nəşr edilmiş Nazim Hikmət, Fazil Hüsnü Dağlarca, Səid Faiq Abasıyanıq, Xalidə Ədib Adıvar, Haldun Tanər, Orhan Pamuk, Osman Çeviksoy, Səbahəddin Əli, Bəkir Yıldız və Camal Şakar kimi türk ədiblərinin ölkəmizdə tanıdılması və sevilməsi, həmçinin ötən il təqdimatı Ankarada baş tutan ikicildlik “Müasir Azərbaycan ədəbiyyatı antologiyası”ndan söz açılıb.

Mərkəzin direktoru Afaq Məsud qonağa, hazırda tərcüməsi başa çatdırılmış və bu ilin aprel ayında işıq üzü görməsi nəzərdə tutulmuş “Türk ədəbiyyatı antologiyası” kitabı haqqında da məlumat verib, bu istiqamətdə işlərin genişləndiriləcəyini qeyd edib.

Rəhbərlik etdiyi qurumun başlıca qayəsinin türk ədəbiyyatının dünyada tanıdılması olduğunu bildirən İbrahim Yıldırım Azərbaycanda ilk dəfə işıq üzü görəcək “Türk ədəbiyyatı antologiyası” kitabının Mərkəz tərəfindən ərsəyə gətirilməsini yüksək dəyərləndirib: “Ədəbiyyat xalqlarımız arasında olan sevgini, birliyi, doğmalığı, qardaşlığı daha aydın və rahat büruzə verən nəcib bir körpüdür. Azərbaycan ədəbiyyatının Türkiyəyə, Türkiyə ədəbiyyatının Azərbaycana daşınması və sevdirilməsi xalqlarımız arasında olan bu sevgini və qardaşlığı daha da möhkəmləndirir. Bu mənada Mərkəzin ədəbiyyatlararası mübadilələr istiqamətində ərsəyə gətirdiyi işlər təqdirəlayiqdir. Bu gün 56 ölkədə Yunis Əmrə Türk Mədəniyyəti Mərkəzinin nümayəndəliyi fəaliyyət göstərir. Odur ki, mərkəzlərimiz arasında faydalı əməkdaşlıq üçün kifayət qədər perspektivlər və imkanlar var”.

Görüşdə, həmçinin Türkiyə-Azərbaycan ədəbiyyatları arasında mübadilələrin davamı olacaq növbəti layihələr müzakirə olunub.

Sonda Yunus Əmrə Türk Mədəniyyəti Mərkəzinin qədim türk tarixi motivlərini özündə əks etdirən hədiyyəsi A.Məsuda təqdim olunub.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.