Kiyev, 22 sentyabr (AZƏRTAC). Ukraynanın paytaxtında P.L.Şupik adına Ukrayna Diplomdansonrakı Təhsil Milli Tibb Akademiyası Böyük Elmi Şurasının xüsusi iclasında həmvətənimiz, tibb elmləri doktoru, professor Aydın Salmanov yekdilliklə mikrobiologiya və epidemiologiya kafedrasının rəhbəri seçilib. Səsverməyə elmi şuranın 128 üzvü, o cümlədən 28 akademik və 94 professor qatılıb. Elmi şuranın iclasında Ukraynanın səhiyyə naziri Oleq Musi iştirak edib.

Diplomdansonrakı Təhsil Milli Tibb Akademiyası Şərqi Avropada ən böyük təhsil müəssisəsidir. Burada 28 akademik, 175 professor, 488 tibb elmləri namizədi çalışır. Onların arasında 2 Ukrayna Qəhrəmanı, 33 əməkdar elm və texnika xadimi, 33 Dövlət Mükafatı laureatı, 87 əməkdar həkim, təhsil işçisi və səmərələşdirici var. Hər il akademiyada Azərbaycan, Almaniya, Yunanıstan, Gürcüstan, Hindistan, İran, Kanada, Çin, ABŞ, Fransa və digər ölkələrdən 25 mindən çox həkim və əczaçı təhsil alır.

Xatırladaq ki, professor Aydın Salmanov Ukraynada Zərifə Əliyeva adına Beynəlxalq Elmi-Tibbi Mərkəzin rəhbəridir. Ona Azərbaycanın şanlı qızı, görkəmli oftalmoloq alim Zərifə xanım Əliyevanın rəhbərliyi altında həkimlik peşəsini təkmilləşdirmək nəsib olub. A.Salmanov Zərifə xanım Əliyevanın nurlu xatirəsinə həsr olunan “Cərrahlıqda risklərin idarə edilməsi” və “İnfeksiya nəzarəti standartları” kitablarının müəllifidir.

Həmvətənimiz Dünya Səhiyyə Təşkilatının Avropa bürosu yanında Ukraynanın milli əlaqələndiricisi, Ukrayna Səhiyyə Nazirliyinin Lisenziya Komissiyasının və Mərkəzi Formulyar Komitəsinin eksperti, Barselonadakı Avropa Mikrobioloqlar və İnfeksiyaçılar Cəmiyyətinin üzvüdür. O, Milli İnfeksiya Nəzarəti Konsepsiyasının, Ukraynanın iki qanunu və 27 normativ hüquq aktının, 215-dən çox elmi işin, o cümlədən tibb universitetlərinin tələbələri üçün 11 monoqrafiya, dərslik və metodiki vəsaitin müəllifidir. Çox sayda təltifləri vardır.

Zeynal Ağazadə

AZƏRTAC-ın xüsusi müxbiri

Kiyev