İQTİSADİYYAT


"Tomson Reuters" agentliyi Azərbaycanın elmi jurnalının təsir əmsalını yüksəldib

Bakı, 14 iyun, AZƏRTAC

ABŞ-ın “Clarivate Analytics” şirkəti ("Tomson Reuters" agentliyi) tərəfindən bu günlərdə açıqlanan 2016-cı il üçün hesabata əsasən, Nəqliyyat, Rabitə və Yüksək Texnоlogiyalar Nazirliyinin (NRYTN) dəstəyi ilə nəşr olunan və Azərbaycanı təmsil edən “Applied and Computational Mathematics” (Tətbiqi və Hesablama Riyaziyyatı) jurnalının təsir əmsalı (impact factor) 0.717-dən 1.333-ə yüksəlib.

Nəqliyyat, Rabitə və Yüksək Texnоlogiyalar Nazirliyindən AZƏRTAC-a bildirilib ki, bu agentliyin tanıdığı jurnallara dünyanın bütün universitetləri, elmi-tədqiqat mərkəzləri istinad edir. Bu istinadların sayı da jurnalın qeyd olunan reytinqini müəyyən edir.

Qeyd edək ki, “Applied and Computational Mathematics” jurnalı “impact factor” göstəricisinə görə regionda liderliyi qoruyur.

NRYTN, Bakı Dövlət Universitetinin Tətbiqi Riyaziyyat Elmi-Tədqiqat İnstitutu və Azərbaycan Milli Elmlər Akademiyasının təsis etdiyi bu jurnal hələ ki, təsir əmsalına malik ilk və yeganə Azərbaycan jurnalıdır.

2002-ci ildən ingilis dilində nəşr olunan jurnalda tətbiqi riyaziyyatın müxtəlif sahələrinə aid yüksək səviyyəli, əsaslı rəydən keçən elmi məqalələr dərc edilir.

Nəşr olunduğu 16 il müddətində “Applied and Computational Mathematics” jurnalı 45 ölkədən 200-dən çox beynəlxalq elm və təhsil müəssisələri ilə elmi mübadilə həyata keçirib.

Elmi İnformasiya İnstitutu kimi fəaliyyətə başlayan "Tomson Reuters" 1964-cü ildə beşcildlik ilk Elmi İstinadlar İndeksini çap etdirməklə 50 ildən artıq bir müddətdə elmi cəmiyyətə öz töhfəsini verib. Hökumət agentlikləri, nazirliklər, siyasi qurumlar və bütövlükdə dünya elm aləmindəki yenilikləri öyrənmək üçün məhz "Thomson Reuters"in məlumat bazasına etibar edir. Qeyd edək ki, məşhur "Reuters" İnformasiya Agentliyi təşkilatın strukturuna daxildir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.