Bakı, 15 avqust, Fidan Əlizadə, AZƏRTAC

Əsrlərdən bəri yaranıb inkişaf edərək bəşəriyyətin söz sənəti xəzinəsinə incilər bəxş etmiş Azərbaycan ədəbiyyatının, eləcə də dünya ədəbiyyatının humanizm ruhlu seçmə nümunələri olan kitab hər bir şəxs üçün əsl həyat məktəbidir. Kitabın insan həyatındakı rolu əvəzsizdir. Həyatımız boyu kitabın dünyagörüşümüzdə, hərtərəfli inkişafımızdakı rolunu hiss edirik. Kitabların saxlandığı kitabxanalar isə ictimai həyatda xüsusi əhəmiyyət kəsb edir. Ulu Öndər Heydər Əliyevin dediyi kimi, kitabxana xalq, millət üçün, cəmiyyət üçün müqəddəs bir yer, mənəviyyat, bilik, zəka mənbəyidir. Ona görə də kitabxanaya daimi hörmət xalqımızın mədəniyyətini nümayiş etdirən amillərdən biridir.

Bakı Dövlət Universitetinin AZƏRTAC-da təcrübə keçən tələbəsi Fidan Əlizadə Ağcabədi rayon Miryaqub Kərimov adına Mərkəzi Kitabxanasında olub və kitabxananın fəaliyyəti ilə yaxından maraqlanıb.

Ağcabədi rayon mərkəzi kitabxanası 1938-ci ildən fəaliyyət göstərir. Kitabxana Birinci Qarabağ müharibəsində şəhid olan Miryaqub Kərimovun adını daşıyır. Əvvəllər Kənd Təsərrüfatının binasında yerləşən kitabxana hazırda Ağcabədi Rayon Təhsil Şöbəsinin tərkibində fəaliyyət göstərir. Ağcabədi rayonunda 1974-cü ildə kitabxana-informasiya şəbəkəsinin mərkəzləşdirilməsi işi həyata keçirildi. Kənd kitabxana filialları və rayon Mərkəzi kitabxanası birləşdirilərək vahid rayon Mərkəzləşdirilmiş Kitabxana Sistemi (MKS) yaradıldı. Kitabxana dörd otaqdan ibarətdir. Hazırda bir mərkəzi kitabxana, otuz səkkiz kənd kitabxana filialı, iki qəsəbə filialı fəaliyyət göstərir. Demək olar ki, bütün dillərdən olan kitablar bu fondda toplanılıb. Azərbaycan, dünya, azsaylı xalqların kitabları həm kənd kitabxana filialında, həm də mərkəzi kitabxanada saxlanılır. Burada 6 şöbə fəaliyyət göstərir. Ağcabədi rayonu Mərkəzləşdirilmiş Kitabxana Sisteminin fondunda 254 min 52 nüsxə, Ağcabədi rayonu Mərkəzi Kitabxanasının fondunda isə 51 min 643 nüsxə qorunur.

100 yaşlı bina

Həyətə daxil olan zaman köhnə təmirli bir bina ilə qarşılaşdım. Bir azdan bu binada çalışanların işlərinə qarşı necə məsuliyyətli yanaşdıqlarının şahidi olacağıq.

Kitabxananın rəhbəri Məhəbbət Əliyeva bizə kitabxananın fəaliyyəti və buradakı imkanlar barədə məlumat verdi. O qeyd etdi ki, onlar xalqımızdan bizə yadigar qalan, xarici ölkələrdən ədəbiyyatları toplayıb, zənginləşdirib, gələcək nəsillərə ötürürlər. Kitabxanada dünya uşaq ədəbiyyatı seriyası adı altında müxtəlif müəlliflərin əsərləri toplanıb. Keçmişdə çap olunan, kiril əlifbalı əsərlərin hamısını qoruyub saxlayırlar. Onların arasında yaşı 80-90 olan kitablar da var. Ədəbiyyatımızı, tariximizi əks etdirən kitablar da rəflərdə öz yerini alır. Burada fəal oxucularla bağlı xüsusi guşə yer alırdı. Həmin guşədə oxucuların fotoları və ad, soyadları qeyd olunub. Pandemiya dövründə kitabxanaçılar səyyar xidmət göstərərək oxucuları kitabsız qoymayıblar. Sərgini gəzən zaman Ağcabədinin məşhur yazıçıları - Rəşad Məcid, Ənvər Əhməd, Yusif Kamal, Tofiq Zeynal, Əşrəf Seyidovun kitablarını görürəm.

Ulu Öndər Heydər Əliyevin və akademik Zərifə Əliyevanın 100 illik yubileyi münasibətilə xüsusi stendlərdə onlara aid “Heydər Əliyev mənim həyatımda”, “Heydər Əliyev və kitabxana işi”, “Heydər Əliyev və Azərbaycan Nitq Mədəniyyəti” və “Akademik Zərifə Əliyeva” kimi kitablar nümayiş olunur.

Şuşa- nəğməm mənim

Azərbaycanın alınmaz qalası, incisi Şuşa- mədəniyyət məbədi olan bu qədim şəhər özü boyda tarixi abidədir. Şərq ölkələrinin mədəniyyət mərkəzlərindən olan, milli memarlıq üslubu ilə seçilən, orta əsrlər şəhərsalma sənətinin qiymətli abidəsi adlandırılan mədəniyyətimizə, ədəbiyyatımıza , incəsənətimizə bəxş etdiyi tarixi şəxsiyyətləri ilə seçilən, muğamımızın beşiyi sayılan Şuşa Türk dünyasının mədəniyyət paytaxtıdır. Kitabxana buna biganə qala bilməzdi. “Şuşa- nəğməm mənim” adlı stenddə nümayiş olunan ədəbiyyatların hamısı Şuşanın qədim tarixinə, mədəniyyətinə, abadlaşmasına, gözəlliyinə həsr olunub. Burada çoxsaylı yazıçıların əsərlərini görmək mümkündür.

Nağıllar dünyası

Diqqətimizi ən çox cəlb edən burada olan nağıl otağı idi. Otağa daxil olarkən sehrli nağıllar aləminə düşdüyünü hiss edirsən. İşçilərin zövqlə ərsəyə gətirdikləri oyuncaqları, fiqurları izləmək insana zövq yaşadır. Burada divardan asılan kürk xüsusi maraq kəsb edir. Bu kürk XIX əsrə məxsusdur. Maraqlısı o dövrdən qalıb və dəfələrlə tədbirlərdə istifadə olunmasına baxmayaraq, öz keyfiyyətini qoruyub saxlamasıdır. Bundan başqa müxtəlif tərəvəzlərdən hazırlanan qopuzlar, heyvanlar və müxtəlif göz oxşayan əşyalar var idi. Bir nüansı da xatırladım ki, kitabxananın işçisi bura gələn uşaqlar üçün kitablardan müxtəlif nağıllar oxuyur. Onun öz stolu və şalı var. Bu balaca dinləyicilərin marağını daha çox artırır. Kitabxananı gəzdikdən sonra yuxarı mərtəbədə yerləşən qalereya ilə də tanış olduq. Qalereya fondu əsas və köməkçi olmaqla iki hissədən ibarətdir. Əsas fondda 120 ədəd sənət əsəri yer alır. Nazirlikdən göndərilən barkodlar tabloların arxasına yerləşdirilib. Qalereyada yerli rəssamların əsərləri sərgilənir. Qalereyanın yetirmələri bir çox müsabiqə və tədbirlərdə iştirak edirlər. Qalereyanın 12 nəfər üzvü var. Üzvlər 6 yaşdan yuxarı şəxslərdir. Xüsusi yaş məhdudiyyəti yoxdur. Buranı gəzən zaman azyaşlı şagirdlərin çəkdiyi şəkillər zövq oxşayır. Sonda binanın içərisində fəaliyyət göstərən klubun rəhbəri ilə həmsöhbət olduq. Klubda şahmat, rəqs, qiraət dərnəkləri fəaliyyət göstərir. Hər birinin 12-14 üzvü var. İçəridə musiqi alətləri və şahmat lövhələrini görmək mümkündür. Oradan xoş təəssüratlarla ayrıldıq.