Bakı, 6 iyun, Nihad Budaqov, AZƏRTAC

Qətər ilə bəzi ərəb ölkələri arasında yaşanan böhran qlobal miqyasda mayeləşdirilmiş təbii qaz (liquefied natural qaz-LNG) bazarına təsir edəcək.

AZƏRTAC xəbər verir ki, bunu “Gazprom”un idarə heyətinin sədr müavini Aleksandr Medvedev deyib.

O bildirib ki, Qətər həcm baxımından dünyanın ən mühüm LNG ixracatçılarından biridir: “Qətər ilə bəzi ərəb ölkələri arasında yaşanan böhranla əlaqədar qlobal LNG bazarları mənfi təsir görəcək. Lakin tam fikir bildirmək üçün hələ çox tezdir”.

Qeyd edək ki, 2016-cı ildə dünyada ən çox LNG ixrac edən ölkə isə (77,2 milyon ton) Qətər olub.

Xatırladaq ki, ilk olaraq Səudiyyə Ərəbistanı, Misir, Bəhreyn və BƏƏ Qətəri terror təşkilatlarını dəstəkləməkdə və bu ərəb ölkələrində daxili sabitliyi pozmaq cəhdlərində ittiham edərək onunla diplomatik və konsulluq əlaqələrini kəsdiklərini elan ediblər. Yəmən və Liviya bir sıra ərəb ölkələrinin Qətərə münasibətdə qəbul etdikləri qərara qoşulublar. Bununla da Qətərlə diplomatik əlaqələri kəsən ölkələrin sayı 6-ya çatıb.