Bakı, 17 iyul, AZƏRTAC

Azərbaycan Triatlon Federasiyasının idarə heyətinin sədri Azər Məhərrəmov “Bakı-2015” birinci Avropa Oyunlarının yekunları və triatlonçularımızın çıxışları ilə bağlı AZƏRTAC-ın suallarını cavablandırıb. Müsahibəni təqdim edirik.

- Azər müəllim, Azərbaycanın və ümumilikdə Avropanın idman həyatında ən mühüm hadisələrdən biri olan “Bakı-2015” birinci Avropa Oyunları uğurla başa çatdı. Oyunlarda böyük maraq doğuran və gərgin idman mübarizəsinin yaşandığı yarışlardan biri də triatlon idi. Ümumilikdə “Bakı-2015”in əhəmiyyəti, Oyunlarda triatlon yarışlarının təşkili və bu barədə əcnəbi atletlərin və federasiya rəsmilərinin fikirləri, idmançıların çıxışları barədə fikirlərinizi bilmək maraqlı olardı.

- Çox sağ olun. Həqiqətən, Azərbaycan birinci Avropa Oyunları kimi mötəbər beynəlxalq idman yarışına uğurla ev sahibliyi etdi. Azərbaycan vətəndaşı olaraq bundan sonsuz qürur hissi duyuram. Bu mötəbər yarışın əhəmiyyətini bəlkə də bu gün kifayət qədər dərindən dərk etmirik. Bunun üçün bəlkə də bir qədər vaxt lazımdır. Bu mühüm yarışın əsl mahiyyəti, əhəmiyyəti zaman keçdikcə daha da aydın olacaq.

Azərbaycan bu mötəbər idman yarışını nəinki yüksək səviyyədə təşkil etdi, Avropanın və dünyanın idman tarixində yeni bir səhifə yazdı. Bu, sözsüz ki, böyük qələbədir. Azərbaycanımızın, xalqımızın, dövlətimizin qələbəsidir. Ən əvvəl bu, Azərbaycan Milli Olimpiya Komitəsinin prezidenti, dövlətimizin başçısı İlham Əliyevin zəfəridir.

Bu qələbə bir neçə hissədən ibarətdir. İlk öncə, Azərbaycan belə mötəbər idman yarışına ev sahibliyi etmək hüququnu qazandı. Bundan sonra qarşıda duran əsas hədəf birinci Avropa Oyunlarına qısa müddətdə hazırlıq idi. Təxminən iki il yarım ərzində inanılmaz işlər görüldü. Dünyada mötəbər idman tədbirlərinə hazırlıq prosesi ilə müqayisə etsək məlum olur ki, Azərbaycanda həmin dövrdə görülən işlərin misli yoxdur. Son olaraq, biz “Bakı-2015” ilk Avropa Oyunlarının təntənəli açılışını, gərgin və maraqlı yarışları, möhtəşəm bağlanış mərasiminin şahidi olduq. Bu, həqiqətən hər bir vətəndaş üçün böyük tarixi və şərəfli hadisədir.

Triatlon barədə danışarkən əvvəlcə onu qeyd etmək istəyirəm ki, idmanın bu növünün birinci Avropa Oyunlarının proqramına salındığını eşidəndə çox sevindik. Bu gün triatlon dünyada sürətlə inkişaf edir. Triatlon Olimpiya idman növləri sırasına 2000-ci ildə daxil edilib. Dünya idmanında triatlonun artıq çox mühüm və vacib yeri var.

Azərbaycanda triatlonun inkişaf etdirilməsi işinə böyük həvəslə başladıq. Bir il yarım ərzində Azərbaycan Triatlon Federasiyası yarandı. Bu vaxt ərzində federasiya həm Avropa, həm də dünya triatlon ittifaqına üzv oldu, bütün prosedurlardan keçdi. Bu dövrdə, həmçinin tanınmış məşqçiləri və idmançıları ölkəmizə dəvət etdik. Eyni zamanda, azərbaycanlılardan ibarət gənc komanda yaratdıq. Birinci Avropa Oyunlarında Azərbaycan yığma komandasının kapitanı Rostislav Pevtsovun qazandığı nailiyyəti - bürünc medalı biz böyük uğur kimi qəbul edirik. Azərbaycan idmançısının dünyada güclü triatlon ənənələri və uğurları olan ölkələrin atletləri ilə fəxri kürsüdə bir sırada dayanması olduqca sevindirici bir hal idi. Çünki

triatlon üzrə dünyada zəngin və çoxillik təcrübəsi olan xeyli ölkə var. Azərbaycanın qısa müddətdə triatlonun inkişaf etdiyi ölkələr sırasına daxil olması bizim üçün ən böyük nailiyyətdir. Bu, ölkəmizin, Azərbaycan Milli Olimpiya Komitəsinin, Gənclər və İdman Nazirliyinin, idman ictimaiyyətinin qələbəsidir. “Bakı-2015” ilk Avropa Oyunlarında qazanılan bu bürünc medal bizim üçün yeni yollar açır, bizə yeni şanslar bəxş edir.

- “Bakı-2015” ilk Avropa Oyunlarının triatlon yarışlarında Azərbaycana yeganə medalı kişilərin mübarizəsində Rostislav Pevtsov qazandırdı. İdmançımızın bu uğurunu necə dəyərləndirirsiniz? Bu yarışlarda idmançılarımızdan gözləntiləriniz nə idi?

- Bu, idmandır. Təbii ki, heç kəs idmanda nəticənin necə olacağını əvvəlcədən bilmir. Amma sözsüz ki, ümidimiz var idi və medal gözləyirdik. Çünki gecə-gündüz bir məqsəd üçün çalışırdıq. Deyə bilmərəm ki, bu, gözlənilməz oldu. Çünki il yarım ərzində Rostislav Pevtsov və əsas komandamızın iki üzvü dünya üzrə bəzi nailiyyətləri - Afrika Kubokunda qızıl medal, ondan sonra Pan-Amerika kuboku yarışlarının gümüş medalını qazanmışdı. İdmançılarımız bir neçə Avropa və dünya çempionatlarının müxtəlif mərhələlərində qızıl və gümüş medallar qazanıblar. Buna görə də rahatlıqla deyə bilərik ki, biz birinci Avropa Oyunlarında qazandığımız bürünc medala addım-addım, səbirlə gəlib çıxdıq. Yəni, bu uğur təsadüfi deyildi. Bunun üçün səylə çalışmaq lazım idi. Həqiqətən triatlonçumuz öz üzərində çox ciddi çalışırdı.

İdmanın bu növünün özünəməxsus xüsusiyyətləri var. Burada demək olar ki, istirahətə vaxt qalmır. İdmançılar il ərzində təlim-məşq toplanışlarında çalışırlar. Həmin toplanışlar çərçivəsində keçirilən yarışlarda iştirak edirlər. İdmançılarımız Kipr, Ukrayna, İspaniya və başqa ölkələrdə toplanışlarda olurlar. Bu cür toplanışlar, məşqlər, yarışlar olmasa, idmançılar öz ölkələrində hazırlıq keçsə, bu, triatlonda yetərli olmaz.

- Birinci Avropa Oyunlarının triatlon yarışları yüksək səviyyədə təşkil olundu. “Bakı-2015”in Azərbaycanda triatlonun inkişafına töhfələri barədə nə deyə bilərsiniz? Gələcəkdə ölkəmizdə idmanın bu növü üzrə irimiqyaslı yarışların təşkili planlaşdırılırmı?

- Bilirsiniz, hər bir Olimpiya Oyunları, eləcə də “Bakı-2015” ilk Avropa Oyunları kimi mötəbər idman yarışı, eləcə də regional, beynəlxalq turnirlər başa çatdıqdan sonra özündən sonra böyük irs qoyur. “Bakı-2015” də özündən sonra böyük, mükəmməl bir irs qoydu. Yəni, Azərbaycanda yaradılan idman arenaları, əldə edilən vacib və zəngin təcrübə, könüllülərin xidməti, mükəmməl idarəçilik, yaradılan imkanlar, - bütün bunlar zəngin irsin tərkib hissələridir. Bu da o deməkdir ki, Azərbaycan yaxın gələcəkdə daha böyük idman tədbirlərini təşkil etməyə can atır. Şübhə etmirik ki, Azərbaycan yaxın gələcəkdə Olimpiya Oyunlarına ev sahibliyi etmək hüququnu da əldə edəcək. Buna heç bir şübhəmiz yoxdur.

Birinci Avropa Oyunları Azərbaycan triatlonu üçün də zəngin irs miras qoydu. İl yarım ərzində triatlon inkişaf etdirildi. Bundan biz istifadə etməliyik. Hazırda əsas komandamızın yanında, gənclərdən ibarət 8 nəfərlik komanda da var. Onlar da xarici ölkələrdə yarışlara qatılır və uğurlu nəticələr əldə edirlər. Bu yaxınlarda idmançılarımız Ukraynada, Macarıstanda, Ruminiyada keçiriləcək yarışlara qatılacaqlar. Nailiyyətlərimiz olur. Bu sahənin inkişaf etdirilməsinə çalışırıq. Əsas bazamız olan Şağan Olimpiya İdman Kompleksində mütəmadi yarışlar keçirilir. Ölkəmizdə triatlonun daha sürətli inkişafında bu zəngin irsdən bəhrələnəcəyik və buna böyük ümid bəsləyirik.

- Olimpiya idman növü olan triatlon Azərbaycanda da inkişaf edir. İdmanın bu növünün inkişafı istiqamətində görülən işlərdən, mövcud imkanlardan, idmançıların hazırlıq səviyyəsindən danışmağınızı xahiş edirik. Triatlon üzrə idman infrastrukturunun təkmilləşdirilməsi və idmanın bu növünün ölkəmizdə populyarlaşdırılması istiqamətində hansı işlər görülür?

- Maraqlı sualınıza görə çox sağ olun. İdman sadəcə arenalarda və ya stadionlarda oynanılmır və inkişaf etmir. İdman, eyni zamanda, həyat tərzidir. İnsanları idmana dəvət etmək, həvəsləndirmək lazımdır. İdmanın üstünlüklərini, faydasını insan sağlamlığı üçün nə qədər vacib olduğunu geniş təbliğ etmək zəruridir. Biz gənc nəsildən danışırıqsa, sözsüz ki, onların valideynləri, yaxınları, məktəblilər, tələbələr, ümumiyyətlə bütün təbəqələrdən olan insanlar bu işə cəlb olunmalıdır. Biz bu məqsədlə sosial şəbəkələrin imkanlarından geniş istifadə edirik. Artıq minlərlə insan bizi izləyir, suallar verir və cavab alırlar. O suallar, söhbətlər nəticəsində bizə edilən birbaşa müraciətləri dərhal cavablandırır, triatlonla maraqlananlara yol göstəririk. Bizim məşqçi heyətimiz, güclü komandamız var. Əsas məşqçini xaricdən dəvət etmişik. Onun rəhbərliyi ilə üzgüçülük, atletika və velosiped üzrə üç məşqçimiz var. Bizə müraciət edən uşaqlar aidiyyəti üzrə istiqamətləndirilir. Həmin uşaqlar yoxlanılır, ondan sonra qəbul olunurlar. Bundan əlavə, Azərbaycan Velosiped İdmanı, Azərbaycan Atletika və Azərbaycan Üzgüçülük federasiyaları ilə əlaqələrimiz də çox genişdir ki, bu da ölkəmizdə triatlonun inkişafı üçün vacibdir.

Həmçinin Avropanın bəzi federasiyaları ilə çox sıx, səmərəli əlaqələrimiz var. Rusiya, Türkiyə, Ukrayna kimi zəngin təcrübəsi olan ölkələrlə işbirliyi bizim üçün xüsusilə çox faydalıdır və biz həmin ölkələrlə uğurlu əməkdaşlıq edirik. Həmin ölkələrin nailiyyətlərində istifadə edirik, ondan yararlanırıq, görüşlər keçiririk və nəticədə ortaya çıxan ideyaları həyata keçiririk.

- Hazırda bütün idmançıların diqqəti “Rio-2016” Olimpiya Oyunlarına yönəlib. Azərbaycan idmançılarının Rio Olimpiadasında iştirakını necə qiymətləndirirsiniz? Bunun üçün hazırlıqlara start verilibmi? Rioda Azərbaycanın neçə idmançı ilə təmsil oluna bilər?

- Çox vacib sualdır. Triatlonun özünəməxsus şərtləri var. İdmanın bu növü üzrə lisenziya qazanmaq olduqca çətindir. “Rio-2016” Olimpiya Oyunlarının triatlon yarışlarına lisenziya xallarının toplanmasına ötən ilin mayında başlanılıb. Bu müddət gələn il mayın 31-də başa çatır. Məhz həmin tarixdə nəticələr elan oluacaq və biz lisenziya sahiblərinin adlarını biləcəyik. Lakin mən bir qədər də risk edərək bu gün bunu deyə bilərəm ki, bizim idmançılarımız arasında lisenziyanı qazananlar olacaq. Çünki lisenziya qazanmaq üçün bizim geniş imkanlarımız var. Bir lisenziya da qazansaq, bu, bizim üçün uğur hesab edilməlidir.

- Birinci Avropa Oyunlarının yarışlarını, idmançılarımızın qələbələrini, ən yaddaqalan anları, o cümlədən triatlonçumuz Rostislav Pevtsovun uğurunu Azərbaycan və dünya oxucularına ilk çatdıran media qurumları arasında AZƏRTAC xüsusilə fərqlənirdi. AZƏRTAC “Bakı-2015”in rəsmi media tərəfdaşı kimi, Oyunların hərtərəfli işıqlandırılmasında səylə çalışdı. Bu barədə fikirlərinizi bilmək bizim üçün maraqlı olardı.

- Azərbaycan mətbuatında peşəkarlığı, qazandığı güvəni və etibarlılığı ilə KİV-lər arasında seçilən AZƏRTAC məhz bu xüsusiyyətlərinə görə “Bakı-2015” ilk Avropa Oyunlarının rəsmi media tərəfdaşı oldu. Operativ, dəqiq və yoxlanılmış informasiyanın ötürülməsi AZƏRTAC-ın iş prinsipində əsas amillərdir. Triatlonçumuz Rostislav Pevtsovun bürünc medal qazanması ilə bağlı ilk xəbəri də məhz Oyunların rəsmi tərəfdaşı olan AZƏRTAC yaydı. Mühüm əhəmiyyət daşıyan hər bir xəbərə dəqiqlik və ciddiliklə yanaşan AZƏRTAC-a bundan sonrakı fəaliyyətində uğurlar arzu edir və agentliyin idmandakı qələbələrimizin daim ilk carçısı olacağına əminəm.