RƏSMİ XRONİKA
AZƏRBAYCAN PREZİDENTİ İLHAM ƏLİYEV ALMANİYANIN İQTİSADİYYAT VƏ YENİ TEXNOLOGİYALAR NAZİRİ MİXAEL QLOSUN BAŞÇILIQ ETDİYİ NÜMAYƏNDƏ HEYƏTİNİ QƏBUL ETMİŞDİR
Azərbaycan Respublikasının Prezidenti İlham Əliyev oktyabrın 19-da Prezident sarayında Almaniya Federativ Respublikasının iqtisadiyyat və yeni texnologiyalar naziri Mixael Qlosun başçılıq etdiyi nümayəndə heyətini qəbul etmişdir.
Prezident İLHAM ƏLİYEV qonaqlara müraciətlə dedi:
- Hörmətli cənab nazir, hörmətli qonaqlar mən sizin hamınızı ürəkdən salamlayıram, Azərbaycana xoş gəlmisiniz. Mən bizim görüşümüzü yaxşı xatırlayıram. Bu ilin əvvəlində biz sizinlə Almaniyada görüşdük, birlikdə biznes forumda iştirak etdik. O vaxt belə bir qərara gəldik ki, siz böyük heyətlə Azərbaycana gələcəksiniz və bizim aramızda olan və artan iqtisadi əlaqələr bu səfərdən sonra daha da sürətlənəcəkdir. Biz sizin səfərinizə çox böyük əhəmiyyət veririk. Hesab edirik, bu səfər onu göstərir ki, Almaniya ilə Azərbaycan arasında olan iqtisadi əlaqələrin çox böyük perspektivləri var, çox böyük qarşılıqlı maraqlar var və əməkdaşlıq üçün yeni perspektivlər açılır. Biz çox şadıq ki, Almaniya şirkətləri tərəfindən Azərbaycana iqtisadi maraq artır, biz bunu alqışlayırıq və öz növbəmizdə, ikitərəfli iqtisadi əlaqələrin inkişafı üçün də əlimizdən gələni etməyə hazırıq.
Bir daha xoş gəlmisiniz və əminəm ki, səfəriniz uğurlu keçəcək və çox mühüm nəticələr olacaqdır.
Nazir MİXAEL QLOS təşəkkür edərək dedi: Cənab Prezident, ilk növbədə, Sizə öz təşəkkürümü bildirmək istəyirəm ki, vaxt ayırıb məni qəbul etdiniz. Mən Sizin səfəriniz çərçivəsindəki görüşümüzdə demişdim ki, Azərbaycan ilə Almaniya arasında iqtisadi əməkdaşlığın perspektivlərini çox müsbət görürəm və söz verdim ki, bu sahədə əlimdən gələn töhfəni verəcəyəm. Sizin səfəriniz buna çox böyük bir təkan vermiş oldu. Mən əminəm ki, biz bu gözəl əməkdaşlıq ənənələrini davam etdirəcəyik və nəinki iqtisadiyyat səviyyəsində ölkələrimiz, eyni zamanda, bu əməkdaşlıq vasitəsilə xalqlarımız da bir-birinə daha yaxın olacaqdır.
Cənab Prezident, ümumiyyətlə, hansısa ölkəyə maraq göstərəndə, yəni əməkdaşlıq etmək istəyəndə, ilk növbədə, onun tarixinə nəzər salırsan. Sizin ölkənizin tarixinə nəzər salanda görürük ki, Azərbaycan arxada çox böyük bir tarix qoyub, gərgin yollardan keçibdir. Əlbəttə ki, Sizin atanız, rəhmətlik Prezident Heydər Əliyevin apardığı düzgün siyasət nəticəsində və Sizin indi onu davam etdirməyiniz sayəsində ölkəniz həmin çətinliklərin öhdəsindən çox gözəl gəldi. Biz bunun qarşısında baş əyirik.