SİYASƏT
AZƏRBAYCANIN AVROPA İTTİFAQI İLƏ ƏLAQƏLƏRİNİN DAHA DA İNKİŞAF ETDİRİLMƏSİNƏ DAİR GENİŞ FİKİR MÜBADİLƏSİ APARILMIŞDIR
Xarici İşlər Nazirliyinin mətbuat mərkəzindən AZƏRTAC-a bildirmişlər ki, görüşdə Azərbaycan ilə ATƏT-in əməkdaşlığı, Ermənistan-Azərbaycan, Dağlıq Qarabağ münaqişəsinin həlli istiqamətində aparılan sülh danışıqları prosesi, ölkəmizdə həyata keçirilən sosial-iqtisadi islahatlar və əldə olunan uğurlar, müvəffəqiyyətlə reallaşdırılan irimiqyaslı nəqliyyat və enerji layihələri, Xəzərin statusu və sair məsələlər ətrafında geniş fikir mübadiləsi aparılmışdır.
Brüsseldə Avropa İttifaqının rəsmiləri və həmçinin Strasburqda Avropa Şurası Nazirlər Komitəsinin 115-ci sessiyasında iştirakı zamanı keçirdiyi görüşləri qonaqların diqqətinə çatdıran nazir E.Məmmədyarov, görüşlərdə Avropa Qonşuluq Siyasəti çərçivəsində Azərbaycan ilə Avropa İttifaqı arasında Fəaliyyət Planı üzrə danışıqların başlanması, Ermənistan-Azərbaycan, Dağlıq Qarabağ münaqişəsi və ümumiyyətlə, Cənubi Qafqaz regionundakı vəziyyətlə əlaqədar aparılmış müzakirələr barədə ətraflı məlumat vermişdir. Nazir qeyd etmişdir ki, Azərbaycan ilə Avropa İttifaqı arasında əməkdaşlıq üzrə fəaliyyət planı ilə əlaqədar danışıqlar çox güman ki, bu il baş tutacaqdır.
Ermənistan–Azərbaycan, Dağlıq Qarabağ münaqişəsi ilə bağlı qonaqları maraqlandıran suallara cavabında nazir hazırkı sülh danışıqları prosesi haqqında geniş məlumat vermiş, ilk öncə işğal edilmiş ərazilərin boşaldılması və qaçqın və məcburi köçkünlərin öz doğma torpaqlarına qaytarılmasının münaqişənin sülh yolu ilə həllində vacib amil olduğunu diqqətə çatdırmışdır. Nazir qeyd etmişdir ki, müasir dövrdə beynəlxalq səviyyədə tanınmış sərhədlərin güc yolu ilə dəyişdirilməsi qəbuledilməzdir.
Pyer Şevalye Ermənistan və Azərbaycan xarici işlər nazirlərinin Lyublyanada planlaşdırılan görüşünün müsbət başa çatacağına ümidvar olduğunu bildirmişdir.
Son zamanlar ölkəmizdə əldə edilmiş iqtisadi nailiyyətlərdən heyranlıqla söz açan qonaq, bu inkişafın perspektivləri barədə geniş fikir mübadiləsi aparmışdır.
Nazir E.Məmmədyarov demişdir ki, hazırda Azərbaycan hökuməti qarşısında neftdən əldə edilmiş gəlirlərin səmərəli istifadəsi sayəsində iqtisadiyyatın digər sahələrinin inkişaf etdirilməsi kimi böyük və ağır vəzifələr durur. Hazırda ölkəmiz Şərq-Qərb (Bakı-Tbilisi-Ceyhan, Bakı-Tbilisi-Qars və Bakı-Tbilisi-Ərzurum) və Şimal-Cənub kimi irimiqyaslı enerji və nəqliyyat-ticarət layihələri üzərində işləyir.
Müzakirələr zamanı, həmçinin regionda reallaşan irimiqyaslı enerji layihələrinin təhlükəsizliyi məsələləri də diqqət mərkəzində olmuşdur.
Sonra nazir E.Məmmədyarov ölkə iqtisadiyyatının digər sahələri - neft-kimya, tikinti, xüsusi ilə kənd təsərrüfatının inkişaf etdirilməsi istiqamətində görülən işlər, güzəştli kreditlər və aqro-lizinqlərin tətbiqi və sair məsələlər barədə qonaqlara ətraflı məlumat vermişdir.
Görüşdə qarşılıqlı maraq doğuran bir sıra digər məsələlər də müzakirə olunmuşdur.