Bakı, 30 iyun (AZƏRTAC). Azərbaycan Respublikası xarici işlər nazirinin müavini Xələf Xələfov “Korrupsiyaya qarşı mübarizə: beynəlxalq standartlar və milli təcrübələr” mövzusunda beynəlxalq konfransda iştirak etmək üçün ölkəmizdə səfərdə olan Beynəlxalq Antikorrupsiya Akademiyasının icraçı katibi Martin Kreutner ilə görüşmüşdür.

Xarici İşlər Nazirliyinin mətbuat xidmətindən AZƏRTAC-a bildirmişlər ki, görüşdə Xələf Xələfov Azərbaycan hökumətinin milli və beynəlxalq səviyyədə korrupsiyaya qarşı mübarizəyə xüsusi önəm verdiyini qeyd etmişdir. O, qlobal xarakter daşıyan bu təhlükəyə qarşı beynəlxalq əməkdaşlığın mühüm əhəmiyyət kəsb etdiyini deyərək Azərbaycan ilə Beynəlxalq Antikorrupsiya Akademiyası arasındakı əməkdaşlığın səviyyəsindən məmnunluğunu bildirmişdir.

Korrupsiyaya qarşı mübarizə sahəsində milli səviyyədə görülmüş tədbirlərdən danışan nazir müavini ümumilikdə dövlət strukturlarının fəaliyyətində şəffaflığın təmin edildiyini, Vətəndaşlara Xidmət Və Sosial İnnovasiyalar Üzrə Dövlət Agentliyinİn - “ASAN xidmət”in yaradıldığını, vətəndaşlara göstərilən dövlət xidmətlərinin elektronlaşdırıldığını və Azərbaycan Respublikasının Baş Prokurorluğu yanında Korrupsiyaya Qarşı Mübarizə Baş İdarəsinin təsis edildiyini diqqətə çatdırmışdır.

Martin Kreutner Azərbaycanın Beynəlxalq Antikorrupsiya Akademiyası ilə əməkdaşlığının yüksək qiymətləndirildiyini bildirmişdir. O, Azərbaycanın korrupsiyaya qarşı mübarizə sahəsindəki milli təcrübəsinin təqdirəlayiq olduğunu qeyd etmişdir.

M.Kreutner Azərbaycanın Avropa Şurasının Nazirlər Komitəsinə sədrliyi çərçivəsində korrupsiyaya qarşı mübarizəni prioritet istiqamətlərdən biri kimi bəyan etməsinin və bu çərçivədə Bakıda “Korrupsiyaya qarşı mübarizə: beynəlxalq standartlar və milli təcrübələr” mövzusunda beynəlxalq konfransın keçirilməsinin, eləcə də ölkəmizin Beynəlxalq Antikorrupsiya Akademiyasının üzv dövlətlərinin assambleyasının III sessiyasına ev sahibliyi etməsinin Azərbaycanın korrupsiyaya qarşı mübarizə sahəsində beynəlxalq səyləri yaxından dəstəkləməsinin bariz nümunəsi olduğunu vurğulamışdır.

Görüşdə Azərbaycan ilə Beynəlxalq Antikorrupsiya Akademiyası arasında əməkdaşlığın inkişaf etdirilməsi və Akademiyanın üzv dövlətlərinin assambleyasının III sessiyasının Bakıda keçirilməsi ilə əlaqədar məsələlər müzakirə edilmişdir.